1-tema. Auditke uliwma sipatlama

1.3. Audit hám auditorlıq iskerliginiń áhmiyeti
Hár qanday túsinik, ásirese ilimiy atama óziniń mazmunın bildiriwshi táriypine iye bolıwı kerek.

Auditorlıq iskerligi hám auditorlıq kásibiniń táriypi Ózbekistan Respublikasınıń jańadan ózgertilgen «Auditorlıq iskerligi haqqında»ǵı nızamında tómendegishe keltirilgen:

Auditorlıq iskerligi degende auditorlıq shólkemleriniń auditorlıq tekseriwlerin ótkeriw hám usı nızamnıń 17-statyasında názerde tutılǵan professional xızmetler kórsetiw boyınsha isbilermenlik xızmeti túsiniledi.

Ózbekistanda mámleketlik hákimiyat hám basqarıw organlarına auditorlıq iskerligin ámelge asırıw nızam menen qadaǵan etilgen.

Auditor – auditor qánigelik sertifikatına iye bolǵan fizikalıq tarep bolıp tabıladı.

Eger auditor auditorlıq shólkeminiń shtatında turǵan bolsa yamasa auditorlıq shólkemi ol menen puqaralıq-huqıqıy kórinistegi shártnamanı dúzgen bolsa, ol auditorlıq tekseriwin ótkeriwge tartılıwı múmkin.

Auditor auditorlıq tekseriwin sapasız ótkergenligi, kommercialıq sırın áshkar etkenligi hám de basqa da háreketleri aqıbetinde auditorlıq shólkemine zıyan keltirgenligi ushın nızam hújjetlerine muwapıq auditorlıq shólkemi aldında juwapker boladı.

Sonday-aq, nızamnıń 4-statyasına muwapıq «auditor járdemshisi auditor qánigelik sertifikatına iye bolmaǵan hám auditorlıq esabatında, auditorlıq juwmaǵında, auditordıń ekspert juwmaǵında hám de auditorlıq tekseriwin ótkeriw menen baylanıslı bolǵan basqa rásmiy hújjette imza qoyıw huqıqına iye bolmaǵan tárizde ayditordıń tapsırması menen auditorlıq tekseriwde qatnasıp atırǵan fizikalıq tárep bolıp tabıladı».

Auditor járdemshisiniń miynet shártleri nızam hújjetlerinde kórsetilgen tártipte miynet shártnaması menen belgilengen. Auditorlıq tekseriwin ámelge asırıwda alınǵan maǵlıwmatlardı áshkar etiw minnetlemesi auditordıń járdemshisine qarata da engiziledi.

Auditordıń járdemshisi sıpatında islengen waqıt auditor qánigelik sertifikatın alıw ushın zárúr bolatuǵın jumıs stajına qosıladı.