11-sabaq. Minezleme, ómirbayan
Download 207.26 Kb. Pdf ko'rish
|
11-Ozbet MTIJ
|
11-sabaq. Minezleme, ómirbayan MINEZLEME Minezleme mákeme administraciyasi yaki shólkemler tárepinen xızmetkerge bir qansha maqsetlerge baylanıslı (oqıwǵa kiriw, jumısqa kiriw, lawazımlarǵa ótiw, shet ellerde jumıs islew yaki basqa bir máseleler menen shet elge shıǵıw hám t.b.) beriledi. Minezlemede berilip atırǵan adam haqqında (qay jerde jumıs isleytuǵınlıǵı, lawazımı, partiya aǵzalıǵı, milleti) tolıq maǵlıwmatlar beriledi. Onıń jeke jetiskenlikleri, miynetke hám kásipleslerine qatnası, minez-qulqı tolıq, ashıq hám ayqın etip kórsetiledi. Minezleme tiykarǵı úsh bólimnen ibarat bolıp, onıń birinish bóliminde shaxstıń miynet jolı, yaǵnıy qánigeligi, jumıs ornınıń tolıq atı, qashannan baslap hám qashanǵa shekem qanday lawazımlarda jumıs islegenligi haqqında maǵlıwmat beriledi. Ekinshi bólimde shaxstıń jumısqa qatnası (eger jumıs islemegen bolsa, onda oqıwdaǵı jeke jetiskenlikleri, oqıwǵa qatnası), qánigeligi boyınsha sheberligi, shólkemlestiriwshilik uqıbı, jámiyetlik jumıslarǵa qatnası, semyalıq jaǵdayları, kásiplesleri arasındaǵı unamlı paziyletleri hám qanday húrmet sıylıqları menen sıylıqlanǵanlıǵı jazıladı. Sonday-aq bul bólimde shaxstıń kemshilikleri de keltirilip, usınıslar da bildiriledi. Úshinshi bólimde joqarıda aytılǵan pikirlerden juwmaq shıǵarılıp, minezlemeniń qanday maqset penen yaki ne ushın berilip atırǵanlıǵı kórsetiledi. Minezlemeniń teksti feyildiń 3-bet formasında dúziledi. Leksikası boyınsha «miynet súygish», «haq kewil», «aq kókirek», «tapsırmalardı óz waqtında orınlaydı», «shaqqan», «háreketsheń», «shólkemlestiriwshi», «ayrıqsha qabiletli», «kishi peyil», «ǵamxor» sıyaqlı anıqlawıshlar qollanıladı. Eger minezleme jámáát shólkemleri tárepinen májilislerde usınılǵan bolsa, sol májilistiń protokol nomeri hám sánesi kórsetiledi. Biraq tártip boyınsha minezlemeni eki shaxs: oqıw yaki bólim baslıǵı hám kásiplik shólkeminiń baslıǵı imza qoyadı hám gerb (domalaq) peчat penen tastıyıqlanadı. Minezleme iyesiniń qolına tapsırıladı yaki onı eskertken halda talap etilgen orınǵa usınıladı. Minezlemeniń zárúrli bólimleri tómendegilerden ibarat: 1. Minezleme berilip atırǵan adam haqqında tiykarǵı maǵlıwmatlar: a) ismi-sháriypi; b) tuwılǵan jılı; v) milleti; g) partiya aǵzalıǵı; d) maǵlıwmatı; e) lawazımı; j) ilimiy dárejesi hám ataǵı. 2. Hújjettiń atı (Minezleme). 3. Hújjettiń mazmunı. 4. Imzalar. 5. Hújjet tapsırılatuǵın sáne. 6. Mór (pechat). Úlgiler Ájiniyaz atındaǵı NMPI Túrkiy tilleri fakultetiniń pitkeriwshisi, 1993-jılı tuwılǵan, milleti qaraqalpaq D. Biyimbetovqa Minezleme Biyimbetov Damir Uzaqbaeviч kásip-óner kolledjin pitkergennen keyin 2013-jılı qaraqalpaq tili hám ádebiyatı qánigeligine oqıwǵa kirgen. Oqıw dáwirinde ol óziniń ziyrek, izleniwsheń hám shaqqanlıǵı menen kózge tústi. Bilim alıwǵa qunt penen kiristi, nátiyjede qaraqalpaq hám inglis tilleri boyınsha olimpiadalarǵa qatnasıp, sıylı orınlardı alıwǵa eristi. Ol institut rektoratı tárepinen bir neshe ret maqtaw qaǵazı menen sıylıqlandı. Sport hám ziyrekler tańlawlarında óziniń sawatlılıǵı menen názerge túsip fakultet dekanatı tárepinen kóp alǵıslar aldı. Damir Biyimbetov óziniń bilim dárejesin kóteriw ústinde tınbay shuǵıllanadı. «Jas tilshi» dógereginiń aǵzası, topar sardarı. Ol talapshań, sezimtallı, tuwrı sóz, saldamlı, joldaslarına hámme waqıt járdem etedi. Usı páziyletleri menen oqıtıwshılar hám talabalar arasında joqarı abırayǵa iye. Minezleme jumısqa ornalasıwı ushın berildi. Fakultet dekanı: (qolı) …………… Kásiplik shólkeminiń baslıǵı: (qolı) ………………(mór) 00.00.0000. Ájiniyaz atındaǵı NMPI Tariyx fakultetiniń talabası, 2003- jılı tuwılǵan, milleti túrkmen, XDP aǵzası Xojaeva Gúlziya Niyetbaevnaǵa Minezleme Xojaeva Gúlziya Niyetbaevna fakultetimizde 2020-jıldan beri oqıydı. Ol tariyx páninen jaqsı oqıydı, sabaqlardı qaldırmaydı. Rus tilin jaqsı biledi. «Nókis pedinstitutı» gazetasında hár qıylı temalarda qosıqları, maqalalar basılıp turadı. Fakultettiń hayal-qızlar keńesiniń aǵzası. Jámiyetlik jumıslardı waqtında hám sapalı orınlaydı. Oqıtıwshılar hám talabalar arasında abırayǵa iye. Talapshań, kóp oqıydı, doslarına hámme waqıt járdem etedi. Minezleme Nókis qalalıq Jaslar shólkemine tapsırıw ushın beriledi. Fakultet dekanı: (qolı) ……………………… NMPI, Jaslar shólkemi xatkeri: (qolı) ……….. Kásiplik shólkeminiń baslıǵı: (qolı) ……………… (mór) 00.00.0000. Ájiniyaz atındaǵı NMPIdıń Shet tilleri fakultetiniń pitkeriwshisi, 1999-jılı tuwılǵan, milleti qazaq, partiyaǵa aǵza emes Qalbaev Marat Tolıbaevichqa Minezleme Qalbaev Marat Tolıbaevich fakultetimizge 2018-jılı oqıwǵa kirgen. Oqıw dáwirinde ol óziniń izleniwsheńligi menen oqıtıwshılar názerine tústi. Rus tilinen olimpiadalarǵa qatnasıp, joqarı orınlardı alıp dekanat tárepinen kóp alǵıslar aldı. Qalbaev M.T. kompyuterden jaqsı paydalana biledi, óziniń bilim dárejesin kóteriw ústinde tınbay shuǵıllanadı. Ol talapshań, sezimtal, minezi saldamlı, joldaslarına hámme waqıt járdem etedi. Oqıtıwshılar hám talabalar arasında joqarı abırayǵa iye. Minezleme jumısqa ornalasıwı ushın berildi. Fakultet dekanı: (qolı) ……………………… Kásiplik shólkeminiń baslıǵı (qolı) ……………… (mór) 00.00.0000. Ájiniyaz atındaǵı NMPInıń Pedagogika fakultetiniń 3 g kurs talabası, 2000-jılı tuwılǵan, milleti ózbek, jaslar shólkeminiń aǵzası Xalimova Rano Sarbarovnaǵa Minezleme Xalimova Rano Sarbarovnaǵa fakultetimizde 2020-jıldan beri oqıydı. Ol jaqsı oqıydı, sabaqlardı qaldırmaydı. Shet tillerin (inglis, rus) jaqsı biledi. Jámiyetlik jumıslardı waqtında hám sapalı orınlaydı. Fakultettiń hayal-qızlar keńesiniń aǵzası. Oqıtıwshılar hám talabalar arasında abırayǵa iye. Talapshań, kóp oqıydı, doslarına hámme waqıt járdem etedi. Gazetalarǵa maqalalar jazıp turadı. Xalimova Rano Sarbarovna mudamı óz bilimin arttırıw ushın sabırlılıq penen háreket etedi. Minezleme NMPIdıń kásiplik shólkemine tapsırıw ushın berildi. Fakultet dekanı: (qolı) ………………….. Jaslar shólkeminiń xatkeri: (qolı) ………………….. sáne ÓMIRBAYAN Ómirbayan – bul jazıp atırǵan adamnıń ómirindegi tiykarǵı hám dıqqatqa ılayıqlı dáwirleri sáwlelengen hújjet. Ómirbayannıń teksti avtor tárepinen erkin dúziledi. Ondaǵı bayanlaw feyildiń birinshi bet, birlik san formasında jazıladı hám qollanılǵan barlıq cifralar tek arab cifrasında keltiriledi. Ómirbayanda adamnıń familiyası, atı, ákesiniń atı, tuwılǵan sánesi, tuwılǵan jeri, milleti, ata-anası, shańaraǵı, áskeriy qatarında xızmet ótegeni, jumıs ornı, sıylıqları hám basqa da maǵlıwmatlar beriledi. Ómirbayan izbe-izlikti saqlap, anıq, qısqa hám túsinikli etip jazılıw kerek. Awızeki tildegi sóylem hám sózler, metaforalar, эpitetler, giperbolalar, jargonlar ómirbayanda qollanılmaydı. Sózler tek tuwrı mánilerinde jazıladı. Úlgi Ómirbayan Men, Nızanov Abatbay Jumabaeviч, 1970-jılı 20-yanvarda Qaraqalpaqstan Respublikası Shımbay rayonınıń Qamısarıq diyqan fermer xojalıǵında, xızmetker shańaraǵında tuwıldım. Ákem- Nızanov Jumabay Joldasbaeviч Shımbay rayonlıq xalıq bilimlendiriw bólimine qaraslı 1-sanlı mektepte rus tili hám ádebiyatı páni muǵallimi, anam- Raximova Ayparsha Eshmuratovna 5-sanlı balalar baqshasında tárbiyashı bolıp isleydi. 1977-jıldan 1987-jılǵa shekem Shımbay rayonlıq xalıq bilimlendiriw bólimine qaraslı 1- sanlı mektepte oqıdım. Oqıwdı pitkergennen keyin Shımbay mádeniyat sarayında instuktor bolıp jumıs isledim. 1988-1990-jılları armiya qatarında xızmet ettim. 1990-jılı Ájiniyaz atındaǵı Nókis mámleketlik pedagogikalıq institutınıń dene tárbiyası fakultetine oqıwǵa tapsırdım, 1994-jılı oqıwdı ayrıqsha diplom menen pitkerdim. Házirgi waqıtta Nókis qalalıq Xalıq bilimlendiriw bólimine qaraslı 9-sanlı ulıwma orta bilim beriw mektebinde dene tárbiyası oqıtıwshısı lawazımında jumıs islep atırman. 2009-jıldan Ózbekstan Respublikası xalıq bilimlendiriw aǵlasıman. 2010-jıldan «Milliy tiklanish» partiyasınıń aǵzasıman. Úylengenmen. Ómirlik joldasım – Seytimova Durdana, 1974-jılı tuwılǵan, Nókis qalalıq 2-sanlı balalar emlewxanada shıpaker bolıp isleydi. Qızım- Jumabaeva Párwaz, 2003-jılı tuwılǵan, TashITU Nókis filialınıń kásiplik tálim qánigeliginiń 4-kurs basqıshında tálim alıp atır. Balam- Jumabaevv Timur, 2013-jılı tuwılǵan, Nókis qalalıq 3-sanlı mektepte oqıydı. Mánzilim: 724002, Nókis, Massiv Sárbinaz 38-úy, 27-xana. Tel.: 226-35-80. 00.00.0000. (qolı) A. Nızanov Download 207.26 Kb. Do'stlaringiz bilan baham: 
|