2-tema: Annotaciya teksti, onıǹ dúzilisi. Tezis hám ilimiy maqala. Sın pikir teksti, onıǹ dúzilisi hám ózgeshelikleri

5.Sın pikir ústinde islew
Sın pikir jazıw analiz etpekshi bolǵan obyektti durıs taǹlay biliwden baslanadı. Obyekt taǹlanǵanınan soǹ onı talqılaw ushın zárúr dárekler jıynaladı. Usınday tayarlıq kóriw procesi sın pikirdiǹ tabıslı shıǵıwında áhmiyetli rol oynaydı. Máselen, teatr sınshıları sın pikir jazıw ushın itibardı shıǵarmanıǹ ózine qaratadı. Haqıyqattanda teatrǵa barıp spektakldi kóriw kerek, hátte repiticiyalardı baqlaw zárúr.
Sın pikir xarakterine kóre hár qıylı boladı. Máselen, keǹeytilgen annotaciya tipindegi sın pikirde shıǵarma tuwralı bibliografiyalıq maǵlıwmat beriledi. Kritikalıq yaki publicistikalıq mazmundaǵı sın pikirlerde konkret shıǵarma múnásibeti menen qandayda bir áhmiyetli másele tuwralı pikir júritiledi. Esse xarakterindegi sın pikirde sınshı óz pikir-tuyǵıların, shıǵarmanı oqıw waqtında payda bolǵan pikip-túsiniklerin lirikalıq tárizde sáwlelendiredi.
Rus sınshılari tariyxında sın pikirdiǹ rawajlanıwında V.G. Belinskiydiǹ roli úlken. Ol sın pikirdi haqıyqıy kórkem-óner dárejesine kóterdi.
Ózbek ádebiyatında sın pikir XX ásir baslarında baspa sóz benen teǹ rawajlana basladı hám eǹ áhmiyetli janrlardan biri bolıp qaldı. Aybek, Abdulla Qahhar, Shayxzada, Ǵafur Gulam kibi jazıwshılar, O.Hoshimov, S.Husayn, Ilimpaz Sharofiddin, V.Zohidov, I.Sultonov, H.Yoqubov, M.Qosjonov, Ozod SHarafiddinov, U.Normatov, N.Xudayberganov, I.Haqqulov hám basqa ilimpazlar ózbek ádebiy turmısında tereǹ iz qaldırǵan sın pikirlerdi jarattı.
Qaraqalpaq ádebiy sınınıń payda bolıwı hám nıǵayıw dáwiri 1930-1950- jıllarǵa tuwra keledi. Ádebiy sın menen ádebiyattanıwdıń basıp ótken jolın ádebiy izertlewshilik jaǵınan ańlap, túsinip alıwdı professor S.Axmetov óziniń «Qaraqalpaq ádebiy kritikası hám ádebiyat iliminiń tariyxınan» degen kitabında keltirdi. Bul kitap oqıw quralı retinde jarıqqa shıqtı. Bul jerde sın hám ádebiyattanıw tariyxı 30-jıllardan baslanadı hám 1970- jıllarǵa barıp taqaladı.
1932- jıldan baslap respublikada «Miynet ádebiyatı» degen arnawlı ádebiy- kórkem jurnaldıń basıp shıǵarılıwı milliy ádebiy-sın pikirdiń rawajlanıwı ushın úlken mumkinshiliklerdi ashıp berdi.
Tema boyınsha tapsırmalar
1.Sın pikirge qoyılatuǵın talaplar hám onıǹ tiykarǵı ózgeshelikleri tuwralı maǵlıwmat beriǹ.
2.Maqalalarǵa hám ilimiy jumıslarǵa jazılǵan eǹ jaqsı sın pikirlerdi talqılaǹ.