3-tema. Publicistikalıq stil. Tekst túrleri. Maqala hám onıǹ janrları. Prezentaciya tili. Internet tili. Reklama. Intervyu alıw hám reportaj tayarlaw Jobası

6-shınıǵıw. Oqıń. Publicistikalıq shıǵarmalardıń stillik ózgesheligine itibar beriń. Publicistikalıq stildiń rásmiy is qaǵazları hám kórkem ádebiyat stillerinen parqın aytıp beriń.
Búgingi kúnde zamanagóy matematıka, geometriya, trigonometriya, geografiya sıyaqlı pánler informaciyalıq kommunikaciya texnologiyaları tarawında erisilip atırǵan tabıslardıń negizgi tırnaǵı áyne Muhammed al-Xorezmiy tárepinen qoyılǵanı dúnya kóleminde tán alınǵan haqıyqat bolıp tabıladı (“Erkin Qaraqalpaqstan” gazetasınan).
Universitet hám Oraydıń strukturası jáne ustavı tastıyıqlasın hám belgilengen tártipte mámleketlik dizimnen ótkeriliwi támiyinlesin (“Erkin Qaraqalpaqstan” gazetasınan).
7-shınıǵıw. Tekstti oqıń. Publicistikalıq stilge tán ózgesheliklerge itibar beriń hám jámiyetlik-siyasiy terminlerdi anıqlaǹ.
Gazetalar XVII ásirdiń dáslepki jıllarınan aq zamanagóy kóriniske iye bolǵan. Biraq olar házirgi sıyaqlı “gazeta” atı menen atalmaǵan. Bunnan 389 jıl aldın, yaǵnıy 1631-jılı 30-may kúni Franciyada “La Gazette” atlı gazeta shıǵarıla baslaǵan, sonnan keyin “gazeta” sózi kóplegen Evropa tillerine bir mártelik jańalıqlardıǹ baspa sózde basılıwın ańlatıwshı termin sıpatında kirip keldi. “Gazeta” atı bolsa sol dáwirdegi Italyanıǹ mayda pul birligi bolǵan “gazetta” (“gaseta”) menen baylanıslı. Sebebi sonda, XVI ásirde jasaǵan bardamlı adamlar jámiyetke tiyisli xabarlar jazılǵan kúnlik qol jazbalardı (saray turmısına tiyisli waqıyalar, sawda jańalıqları hám basqa qońsılas qalalar haqqındaǵı maǵlıwmatlar) oqıw ushın bir gazeta, yaǵnıy eń kishi italyan teńgesi ornına gazetanı satıp alǵan. Teńge atı bolsa ol waqıttaǵı hákke qustıǹ (italyancha “gazza”) atınan alınǵan.Tariyxshılar pikirine kóre, “La Gazette” házirgi baspa ǵalaba xabar quralı dástúrleri hám standartlarına sáykes keletuǵın birinshi Evropa gazetalarınan esaplanadı. “La Gazette” Franciya sociallıq-siyasiy turmısında úlken áhmiyetke iye bolǵan. Hátte patshanıǹ ózi bul baspa ushın mámlekettiǹ xalıq aralıq hám ishki siyasatı menen baylanıslı zárúrli waqıyalarǵa arnalǵan arnawlı xabarlar jazǵan.