Ҳар саҳар Ватан деб ташласанг қадам, Сўнгра уйга қайтсанг, меҳрдан ёна

Бахт

Ҳар саҳар Ватан деб ташласанг қадам,

Сўнгра уйга қайтсанг, меҳрдан ёна.
Бундан ортиқ нима хоҳлайди одам,
Бундан ортиқ бахтинг бормикан яна?!

Майли, ҳар кун ема ёғли паловни,

Майли, сал кечроқ мин темир уловни,
Рисқин тунамасанг, ахир, бировни,
Бундан ортиқ бахтинг бормикан яна?!

Пулга сотилмасанг, юртни сотмасанг,

Нафсингга ўралиб, чоҳда ётмасанг,
Ўзгалар ортидан ғийбат отмасанг,
Бундан ортиқ бахтинг бормикан яна?!

Сололмасанг ҳамки данғиллама уй,

Яхшилик қасрига тамал тоши қўй,
Юрт учун, халқ учун, инсон учун куй,
Бундан ортиқ бахтинг бормикан яна?!

© Вафо Мўмин