Biznes reja

Yangidan faoliyat boshlayotgan tadbirkorlar tomonidan tashkil etilayotgan korxona uchun biznes-reja tuzishda quyidagi namunaviy tarkibiy tuzilmadan foydalanish tavsiya etiladi:

1. Titul varag‘i

2. Mundarija

3. Rezyume

4. Korxona tavsifi

5. Mahsulot va xizmatlar

6. Bozor va raqobatchilar tahlili

7. Marketing rejasi

8. Ishlab chiqarish rejasi

9. Tashkiliy tuzilma va xodimlar

10. Tavakkalchiliklar tahlili

11. Moliyaviy reja

12. Ilovalar

Titul varag‘i ortiqcha bezaklardan xoli bo‘lgan holda faqat korxona to‘g‘risidagi zarur birlamchi ma’lumotlarni aks ettirishi kerak.

Xususan, titul varag‘ida korxonaning to‘liq firma nomi, logotipi (agar mavjud bo‘lsa),

loyiha nomi (ya’ni, bir jumlada loyihaning mohiyati), korxonaning yuridik manzili, telefon raqami, elektron pochtasi, internet sayti (agar mavjud bo‘lsa), bog‘lanish uchun mas’ul shaxsning ismi-sharifi va biznes-reja tuzilgan sana ko‘rsatiladi.

Biznes-rejaning titul varag‘i birinchi galda ko‘zga tashlanishini inobatga olib, uni did bilan rasmiylashtirishga alohida e’tibor qaratish zarur. U o‘quvchida korxona kelgusidagi maqsadlarini amalga oshirishga tayyor ekanligi va bunga jiddiy kirishganligi to‘g‘risida fikr uyg‘otishi lozim.