Боғланишлар* Муқаддима I боб. Бухгалтерия ҳисоби ҳисобварақлар режасининг умумий тавсифи

Қисқа муддатли кредитлар ва қарзларни ҳисобга
олувчи счётларнинг (6800) боғланиши

Қисқа муддатли кредитлар ва қарзларни ҳисобга олувчи счётлар корхона томонидан Ўзбекистон Республикаси ва чет элдаги банклар ва қарз берувчилардан сўмда ва чет эл валютасида олинган турли қисқа муддатли (12 ой муддатгача) кредит ва қарзларнинг ҳолатлари тўғрисидаги ахборотни умумлаштириш учун мўлжалланган.

Ҳисоб қуйидаги счётларда амалга оширилади:
6810 "Қисқа муддатли банк кредитлари";
6820 "Қисқа муддатли қарзлар";
6830 "Тўланадиган облигациялар";
6840 "Тўланадиган векселлар".
6810 "Қисқа муддатли банк кредитлари" счётида корхонанинг банклардан олган турли қисқа муддатли кредитлари ҳисобга олинади.
Олинган қисқа муддатли банк кредитларининг суммалари 6810 "Қисқа муддатли банк кредитлари" счётининг кредитида ва пул маблағларини ҳисобга олувчи тегишли счётларнинг дебетида акс эттирилади. Қайтарилган қисқа муддатли банк кредитлари суммаси 6810 "Қисқа муддатли банк кредитлари" счётининг дебет томонида пул маблағларини ҳисобга олувчи счётлар билан боғланган ҳолда акс эттирилади.
6820 "Қисқа муддатли қарзлар" счётида Ўзбекистон Республикаси ва чет элдаги қарз берувчилардан - бошқа корхона ва ташкилотлардан (банкдан ташқари) 12 ойдан кўп бўлмаган муддатга олинган қарзлар ҳисобга олинади.
Қарз берувчилардан (банкдан ташқари) тушган маблағлар пул маблағларини ҳисобга олувчи счётларнинг дебети ва 6820 "Қисқа муддатли қарзлар" счётининг кредити бўйича қайд қилиб борилади. Олинган қарзларни қайтариш 6820 "Қисқа муддатли қарзлар" счётининг дебетида ва пул маблағларини ҳисобга олувчи счётларнинг кредитида акс эттирилади.
6830 "Тўланадиган облигациялар" счётида тўлов муддати 12 ойдан ортиқ бўлмаган облигацияларни муомалага чиқариш ҳисобига корхонага жалб этилган маблағлар ҳисобга олинади. Агар маблағларни жалб қилиш облигацияларни номинал қийматидан юқори баҳога сотиш йўли билан амалга оширилса, унда облигацияларни сотиш баҳоси билан номинал қиймати ўртасидаги фарқ 6220 "Мукофот (устама)лар кўринишидаги кечиктирилган даромадлар" счётининг кредитида ҳисобга олинади.
6840 "Тўланадиган векселлар" счётида қоплаш муддати 12 ойдан ортиқ бўлмаган берилган векселлар ҳисобга олинади. Корхонада берилган векселларни ҳисобга олиш операциялари 6840 "Тўланадиган векселлар" счётининг кредити ва пул маблағларини ҳисобга олувчи счётларнинг дебетида акс эттирилади. Вексель бўйича операциялар натижасида қарз берувчидан олинган пул маблағларининг корхона томонидан қайтарилиши 6840 "Тўланадиган векселлар" счётининг дебетида пул маблағларини ҳисобга олувчи счётлар билан боғланган ҳолда акс эттирилади.