Ongli o’qishni ta’minlash usullari reja

O`qituvchi hikoyasi. Bu metod asar muallifi haqida ma`lumot berishda eng samarali hisoblanadi. Asar muallifi shoir va yozuvchilar haqida so`zlab berilayotganda ularning portretlari, bolalar uchun yozgan asarlari namoyish etilsa, o`quvchilarning muallif ijodiga qiziqishlari ortadi. O`qituvchi yozuvchi va shoirlar haqidagi ma`lumotlarni o`quvchilar saviyasiga mos qilib, hayajonli qilib hikoyalasa, o`quvchilarning badiiy asarni o`qishga ichki istagi kuchayadi, ularda kitob o`qishga muhabbat ortadi. Yozuvchi haqidagi ma`lumot 1- sinfdan 4- sinfga borgunga qadar ko`paytirilib, chuqurlashtrilib boriladi. Asarni o`qishga tayyorgarlik bevosita o`quvchilarning mustaqil izlanishlari asosida ham tashkil etiladi. Masalan, ”Kitobga ixlos” (4- sinf) asarini o`qishga tayyorgarlikda o`quvchilarning o`tmishda yashagan tarixiy shaxslar haqidagi tushunchalari aniqlangach, o`quvchilar xayolan sayohatga olib chiqiladi.O`qituvchi o`quvchilarni Buxorodagi tarixiy muzeyga taklif etadi.O`quvchilarni mustaqil izlanishga o`rgatishning Yana bir usuli o`quvchilarga oldindan yozuvchi yoki asar yozilgan davr haqida kitoblar, manbalar tavsiya etilib, ulardan ma`lumotlar to`platiladi, al’bomlar tayyorlatiladi, so`ng o`quvchilar o`zlari aniqlagan ma`lumotlarni o`qib oyi so`zlab beradilar.