Iqtisodiyot va menejment

10-chizma. Xrapovik samarasi.

Chizmadan ko‘rinadiki, yalpi talab AD₁ dan AD₂ga oshganda, muvozanat holati a dan s ga ko‘chadi, ishlab chiqarish hajmi Q₁dan Q₂ga ko‘payib, narx ham P₁dan P₂ darajaga qadar o‘sadi. Biroq, yalpi talab o‘zining dastlabki holatiga qaytsa, endi narx pasaymaydi, balki muvozanat yangi e holatiga ko‘chib, ishlab chiqarish hajmi o‘zining dastlabki Q₁ darajasidan ham pasayib, Q₂ darajasiga qadar tushib ketadi.

Shu o‘rinda nima uchun narx pasayish tamoyiliga ega emas, degan savolga aniq javob berish qiyin bo‘lsada, uning ayrim sabablarini ko‘rsatish mumkin.

Birinchidan, korxona umumiy xarajatlarining asosiy qismini (70-75 foiz) ish haqi tashkil qilib, u qisqa davr ichida pasayish tamoyiliga ega bo‘lmaydi. Chunki ishchilarning asosiy qismi shartnoma (kasaba uyushmalar orqali) bo‘yicha ishlab, shartnoma muddati tugagunga qadar ish haqini pasaytirish taqiqlanadi. Shuningdek, tadbirkorlarning o‘zlari ham ish haqi darajasini pasaytirishni xohlamasliklari mumkin. Buning ikkita sababi bor. Bir tomondan, ancha past ish haqi ishchilarning mehnat unumdorligiga salbiy ta’sir ko‘rsatishi mumkin. Shu bilan birga ancha past ish haqi mahsulot birligiga mehnat sarflarini kamaytirsa, ancha past mehnat unumdorligi esa mehnat sarflarini oshiradi. Agar ular ish haqini pasaytirishga qaror qilsalar, malakali ishchi kuchidan ajrab qolishlari mumkin.

Ikkinchidan, juda ko‘pchilik korxonalar etarli darajada monopol mavqega ega bo‘ladi va bu ularga talab kamayganda ham narxning pasayishiga qarshi turish imkonini beradi.

Ishlab chiqarilgan va sotib olingan mahsulot real hajmi teng bo‘lganda, iqtisodiyotda muvozanatlikka erishiladi.

O‘zbekistonda 2004 yildagi yalpi talab va yalpi taklifning o‘lchamlari quyidagi ma’lumotlar bilan tavsiflangan (mlrd. so‘m hisobida):¹

Yalpi taklif ko‘rsatkichlari	Miqdori, mlrd. so‘m	Yalpi talab ko‘rsatkichlari	Miqdori, mlrd. so‘m
Mahsulot ishlab chiqarish hajmi	5924,1	Uy xo‘jaliklari iste’mol sarflari	5874,6
Ko‘rsatilgan xizmatlar hajmi	4558,9	YAlpi xususiy ichki investitsiya sarflari	1498,0
		Davlat sarflari*	369,4
		Sof eksport	1037,0