Иқтисодиёт / Қишлоқ хўжалиги]

8-боб. Малака ошириш курсларини тамомлаганлик тўғрисида ҳужжат
39. Ветеринария хизмати мутахассислари малака ошириш курсларидан ўтганлик тўғрисидаги сертификат (кейинги ўринларда сертификат деб аталади) мазкур Низомнинг 3-иловасидаги шакл бўйича 5 йил муддатга берилади.
40. Сертификат қатъий ҳисобга олинадиган ҳужжат ҳисобланади, ҳисоб серияси, рақами ва ҳимоя элементига эга бўлиши керак.
Сертификат бланкалари Малака ошириш маркази буюртмасига мувофиқ, белгиланган тартибда тайёрланади.
Малака ошириш маркази сертификатларнинг ҳисобини юритиш, сақлаш ва улардан мақсадли фойдаланилиши учун жавобгар ҳисобланади.
41. Малака ошириш курсларида ўқиш якунлари бўйича аттестациядан ўта олмаган ветеринария хизмати мутахассислари 6 ой мобайнида ўз маблағлари ҳисобига тўлов асосида ушбу курслардан ўтади.
Малака ошириш курсларидан такроран ўтган, лекин ўқиш якунлари бўйича аттестациядан ўта олмаган ветеринария хизмати мутахассисларининг малака тоифаси пасайтирилади ёки уларнинг эгаллаб турган лавозимига мувофиқлиги тўғрисидаги масала белгиланган тартибда кўриб чиқилади.
42. Аттестация комиссиясининг қароридан норози бўлган ветеринария хизмати мутахассислари натижалар эълон қилинган вақтдан бошлаб уч кун мобайнида апелляция комиссиясига ёзма равишда шикоят беришлари мумкин.
Апелляция комиссияси шикоятларни кўриб чиқиш учун институт ректори буйруғи билан ўқув йилининг биринчи ойида уч кишидан иборат таркибда ташкил этилади.
Апелляция комиссияси таркиби институтнинг раҳбар ходими, касаба уюшмаси вакили ва малака тоифасига эга бўлган бир нафар ветеринария мутахассисидан иборат бўлади.
Апелляция комиссияси таркибига аттестация комиссияси таркибидан аъзо киритилмайди.
Апелляция комиссияси йиғилишида комиссия аъзоларининг учдан икки қисми иштирок этса, унинг қабул қилган қарори қонуний кучга эга бўлади.
Шикоят рўйхатга олинган куннинг ўзида кўриб чиқилади.
Мурожаат этувчи апелляция комиссияси томонидан шикояти кўриб чиқилиши жараёнида иштирок этиши мумкин.
Апелляция комиссияси аттестация комиссияси қарорини ўзгартиришсиз қолдириш ёки уни бекор қилиб, қайта аттестация ташкил этиш ҳақида қарор чиқаради.