Microsoft Word kr dunyoning ishlari ziyouz com doc

www.ziyouz.com кутубхонаси 
87
— Вой гиргиттонлар, вой ўзим гиргиттонлар! — деганча каловланиб ўрнидан турди. Қўли 
хамир юқи бўлгани учун билаги билан елка қоқиб кўришди. Пайтавани қалин ўраган эканман, 
пиймамни ечгунча қийналиб кетдим. Холпош хола бир зумда дастур-хон ёзди. Ханик четида 
чўнқайиб ўтириб ёнғоқ чақди, тут майиз, шинни қўйди... Ойим қизариб-бўзариб, аммам эса 
чимирилиб ўтирарди. У танча ичидан ойимнинг оёғига ўхшатибгина тепди шекилли, онамнинг 
ихчам гавдаси силкиниб кетди. 
— Кўп овора бўлаверманг, — деди баттар қизариб.— Биз бир юмуш билан келувдик. 
— Вой гиргиттон, овораси бор эканми? Эшонойимнинг оёқларига қўй сўйсак арзийди. 
Аммам: «Гапирасанми-йўқми?» деб қошини қоққан эди, ойим тутилиб-тутилиб гап бошлади: 
— Биз... Ҳалиги... Қулчиликка келувдик, айланай... 
Холпош хола бир зум довдираб қолди. Чой қуйиб узатаётган пиёласи ҳавода муаллақ туриб 
қолгандак эди. У ягона кўзи билан ойимга ҳайрон тикилди. 
— Шундоқ бўп қолди, — деди аммам жилмайишга уриниб. Унинг табассуми йиғидан баттар 
аянчли эди.— Шу, Афзалхон тушмагур Рисолатхондан бўлагига кўнмаяпти... Билмадим, мабодо 
тақдир қўшган бўлса... 
Холпош хола ягона кўзини аммамга қадаб пиёлани дастурхонга қўйди. 
— Албатта, сизга оғир, — деди ойим овози титраб.— Худо шоҳид, дилингизни оғритмоқчи 
эмасмиз. Биламиз, бу гапнинг мавриди эмас, ўзингизнинг оғзингиз тўла қон... 
Холпош хола бошини хам қилиб ўйга толди. 
— Рисолатни келинмас, қизим деганман, гиргиттон,— деди анчадан кейин. — Нима қилай, 
уруш жудо қилди ўғлимдан. Боламнинг ўрнига болам, деб этагидан тутган эдим. — Унинг овози 
титрай бошлади. — Майли, иложим қанча, мени деб ёш умрини ўтказса, Худо нима дейди. 
Аммам бошқача гап кутган экан шекилли, ранги ўчди. 
— Мен айтдим, — деди овозини баландлатиб. — «Ҳой, бола, ёшлик қилма, кейин шохинг синиб 
қолади», деб неча марта айтдим. 
— Албатта, тенг тенги билан деган гап бор. — Холпош хола ҳамон бошини қуйи солиб 
ўтирарди. — Ўғлингиз кўз очмаган йигит бўлса. Қизим... — У жимиб қолди. — Тағин ўзлари 
билишади. Икковининг кўнглида шу ният бўлса бизнинг қўлимиздан нима келарди. — У 
қандайдир ички сезги билан сергакланди.— Шошманг, гиргиттон, болам келди. Орифим келди. 
Чиндан ҳам эшик очилди-да, эски палтосининг устидан елкасига жилд осган Ориф пайдо 
бўлди. У телпагининг қулоқчинини томоғи остидан ўтказиб боғлаб олган, қошиқдек юзида 
кўзойнаги аллақандай кулгили ялтираб турарди. 
— Келдингми, болам, — Холпош хола дарров Орифнинг жилдини олди. 
— Совуқ қотиб кетибсан-ку, шакартойим. 
Ориф учинчида ўқийди. Уларнинг дарси тугаган бўлса, демак, мен ҳам тезроқ мактабга 
жўнашим керак. 
— Ойи, кетайлик, — дедим типирчилаб. 
— Ҳали вақтли, биз учта ўқидик. — Ориф елкамга қўлини ташлади. — Юр, қубба ўйнаймиз. 
— Майли, нариги уйга кира қолинглар, — деди Холпош хола дарров кўниб. — Катталарнинг 
гапига қулоқ солса уят бўлади, гиргиттонлар. 
Ориф иккаламиз қиров босган, деразасидан хира нур тушиб турган каталакдек уйга кирдик. Бу 
Рисолат опанинг хонаси бўлса керак, бурчакда стол, суянчиғи баланд стул бор эди. Стол устида 
дафтар-китоблар тахлаб қўйилган. Кирпеч осилган деворда Рисолат опанинг чуст дўппи кийган 
киши билан тушган сурати. Рисолат опа дўппили кишининг елкасига бошини хиёл эгиб 
жилмайиб турибди. 
— Бу ким? — дедим суратдаги кишини кўрсатиб. 
— Дадам! — Ориф токчадаги товоқдан бир ҳовуч ёнғоқ олди. — Ўйнайсанми? 
— Менинг ёнғоғим йўқ-ку. 
— Қарзга бериб тураман. — У ўнта ёнғоқни санаб ажратди. — Мен ган қўяман, хўпми? 

---

Дунёнинг ишлари (қисса). Ўткир Ҳошимов