Muhammad-al xorazmiy nomidagi toshkent axborot texnologiyalari universiteti radio va mobil aloqa fakulteti

11.5. Aperiodik RCHKning prinsipial sxemasi

Yuklamasi rezistorlardan tashkil topgan kuchaytirgichlar esa aperiodik kuchaytirgichlar deb ataladi. Aperiodik kuchaytirgichlarning kuchaytirish koeffitsienti rezonans kuchaytirgichlarning kuchaytirish koeffitsientidan doimo kichik bo‘ladi.

Yuqori chastotalarda tranzistorlarning umumiy baza sxemasida ulanishi eng yaxshi xarakteristikalarga ega. Bu sxemada tranzistor ichki teskari aloqa hisobiga eng yaxshi chiziqlilikka ega. Bundan tashqari, uning chastotaviy xarakteristikasi kengayadi. Kollektor-emitter o‘tishning kichik sig‘imi kuchaytirgich sxemasining parazit o‘z-o‘zidan qo‘zg‘alishiga sharoitlarni hosil qilmaydi.
S xemaning barqarorligini qo‘shimcha oshirishga tranzistorli kaskadning kirishi va chiqishiga past chastotali filtrlarni qo‘yilishi bilan erishiladi. Bu filtrlar tranzistor kuchaytirish xususiyatlarini saqlaydigan butun chastotalar polosasiga mo‘ljallanadi. Natijada butun chastotalar polosasida fazalarning balansi bajarilmaydi va o‘z-o‘zidan qo‘zg‘alish mumkin bo‘lmaydi. Bu filtr tranzistorning kirish va chiqish qarshiliklarini 50 Om standart qarshilikka o‘zgartirishni amalga oshiradi. Kirish va chiqish sig‘imlari filtrning tarkibiga kiritiladi. Bunday radiochastota kuchaytirgichi sxemasiga misol 11.3- rasmda keltirilgan.


11.3- rasm. Umumiy bazali tranzistordagi 50 Om kirish va chiqish qarshilikli radiochastota kuchaytirgichining prinsipial sxemasi

Bu sxemada R1 … R3 rezistorlar tranzistorning o‘zgarmas tok bo‘yicha emitterli stabillashni amalga oshiradi. C2 kondensator tranzistor bazasini yuqori chastota bo‘yicha yerga ulanishini ta’minlaydi, C3 kondensator esa ta’minot zanjirlarini halaqitlardan himoyalaydi. L2 drossel VT1 tranzistor kollektorining yuklamasi hisoblanadi. U ta’minot tokini VT1 kollektor zanjiriga o‘tkazadi, lekin bunda radiochastota o‘zgaruvchan toki bo‘yicha ta’minot manbaini ajratadi. L1, C1 va C4, L3 past chastota filtrlari tranzistorning kirish va chiqish qarshiliklarini 50 Omga o‘zgartirilishini ta’minlaydi. Qo‘llanilgan past chastota filtri sxemasi uning tarkibiga kirish yoki chiqish sig‘imini kiritishga imkon beradi. VT1 tranzistorning kirish sig‘imi C1 sig‘im bilan birga kuchaytirgichning kirish filtrini hosil qiladi, bu tranzistorning chiqish sig‘imi esa C4 sig‘im bilan birga past chastotali chiqish filtrini hosil qiladi.