O’zbekiston respublikasi oliy ta’lim, fan va innovatsiyalar vazirligi namangan davlat pedagogika instituti

Savol va topshiriqlar:


Topshiriq. a) xat matnini o'qing, uning mazmunida nima ifodalanganini aniqlang.

A. Sirojiddinov nomidagi akademik litsey ma’muriyati va kasaba uyushmasi tashkiloti teatringizda 18- oktabrsoat 19:00 da namoyish etiladigan «Zebuniso» spektaklini tomosha qilish uchun litseyimiz talabalariga 120 (bir yuz yigirma) ta chipta ajratishingizni so‘raydi.

Chiptalar qiymati naqd pul bilan to‘lanadi.

b) ushbu iltimos xatining kimga jo‘natilganligini, kirn tomonidan imzolangani kabi zaruriy qismlarini qo‘yib daftaringizga ko‘chiring.

42-mavzu: Xizmat yozishmalari, xatlar

Reja:

1. 
   Xizmat yozishmalari.
   
2. 
   Manzil.
   
3. 
   Xatlar.
   

XIZMAT YOZISHMALARI

Xizmat yozishmalari mazmunan xilma-xil bo‘ladi. Ularda muassasa faoliyatining turli masalalari bilan bog‘liq talab, iltimos, taklif, kafolat kabilar aks ettiriladi. Bu ma’noda xizmat yozishmalari hujjatlarning yuqorida ko‘rsatilgan guruhlari bilan uzviy aloqadordir. Shularni hisobga olib, xizmat yozishmalari hozirgi zamon hujjatshunosligida mazkur guruhlardan keyin alohida guruh sifatida tasniflangan va bu mantiqan o‘rinli.
Har qanday yozishmada, umuman, ko‘plab hujjatlarda manzil yozishga to‘g‘ri keladi. Manzil aksariyat hujjatlarning tarkibiy qismidir.
MANZIL
Pochta jo‘natmalari (xat-xabar, buyum va pul jo‘natmalari kabilar) ustidagi yozuv bo‘lib, unda jo‘natma yetib borishi zarur bo‘lgan joy (qayerga), uni oluvchi shaxs yoki muassasa (kimga) nomi va jo‘natuvchi haqidagi ma’lumotlar (jo‘natuvchi manzili) ko‘rsatiladi.
Kishi manzilni yozish bilan bolalikdanoq tanishadi, chunki uyiga xat yoki boshqa pochta jo‘natmalari kelganda, ular ustidagi yozuvga ko‘zi tushadi, o‘quvchilik yillarida esa do‘stlari yoki qarindosh-urug‘lari bilan xat yozishadi, ulardan turli xil jo‘natmalar oladi yoki o‘zi yuboradi. Ana shunda manzil yozishni, ya’ni xatjild yoki boshqa jo‘natmalar ustiga ular yetib boradigan joyning va oluvchining nomini, shuningdek, o‘zi haqidagi ayni shunday ma’lumotlarni yozishni o‘rganadi. Buning ustiga, xatjildlar ustidagi yo‘naltiruvchi yozuv va belgilar ham manzil yozuvchining ishini yengillashtiradi.
Adres so‘zi yuqoridagi o‘rinda manzil so‘ziga muqobil bo‘lsa ham, har doim manzil so‘zining o‘rnini bosmaydi. Adres so‘zi rus tilida faqat jo‘natmalar ustidagi yozuvnigina ifodalab qolmay, shaxsning yashash joyi hamda muassasaning o‘rnashgan joyini, shuningdek, biron shaxsni tabriklab yozilgan matnni ham ifodalaydi. Shuning uchun o‘zbek tilida bu ma’nolarni farqlash uchun adres so‘zi bilan bir qatorda tegishli ravishda manzil, turarjoy, makon, tabriknoma so‘zlarini qo‘llash maqsadga muvofiqdir.
Xat-xabar va boshqa jo‘natmalarni tegishli joyga va egasiga tezroq hamda adashmay yetkazib berishda manzilni to‘g‘ri, aniq yozishning ahamiyati kattadir. Shu jihatdan rasmiy ish yuritishda, umuman, turmushda pochta jo‘natmalariga manzil yozish muhim o‘rin tutadi.
Shartli raqamlar xatjild chap tomonining pastki qismida ko‘rsatilgan katakchalarga yoziladi. Uning qanday yozilish shakli xatjild orqa tomonidagi namunada ko‘rsatilgan. Shartli raqam sariq, qizil va yashildan boshqa rangdagi siyoh bilan yoziladi.
Xat-xabardan boshqa pochta jo‘natmalari (bog‘lamli yuklar, tugunlar, qimmatli xatlar, buyum yoki pul jo‘natmalari) ga aloqa bo‘limi shartli raqamlari manzildan oldin oddiy raqamlar bilan yozilishi kerak. Telegrammalarda esa olti raqamli pochta indeksi qo‘yilmaydi, faqat shahar aloqa bo‘limining tartib raqamigina yoziladi. Masalan: Toshkent, 47; Marg‘ilon, 8.
Pochta manzili, Axborot texnologiyalari va kommunikatsiyalarini rivojlantirish vazirligi yo‘riqnomasiga muvofiq, quyidagi ko‘rinishda bo‘ladi: viloyat, respublika ahamiyatidagi shaharlarga yuborilayotgan pochta jo‘natmalarida shartli raqam yozilgandan so‘ng, avvalo, shahar nomi, keyin xat-xabarni yetkazib beruvchi aloqa bo‘limi (raqami yoki nomi) ko‘rsatiladi. Bulardan keyin ko‘cha nomi, uy va xonadon raqami va, nihoyat, oluvchining ismi, otaismi va familiyasi yoziladi. Oluvchining nomini yozganda, ko‘pincha uning ismi va otaismining bosh harflarini ko‘rsatish kifoya: uning familiyasi esa jo‘nalish kelishigida («ga» qo‘shimchasi bilan) yoziladi. Xatjildning quyi qismida esa jo‘natuvchining manzili bosh kelishikda rasmiylashtiriladi.
XATLAR
Muassasalar orasida xizmat aloqalarini amalga oshiruvchi asosiy hujjatdir. Xat orqali bajariladigan masalalar ko‘lami keng bo‘lib, bunday yozishmalar vositasida turli ko‘rsatmalar, so‘rovlar, javoblar, tushuntirishlar, xabarlar, takliflar, iltimoslar, kafolatlar beriladi yoki qabul qilinadi. Mazmun jihatdan turlicha bo‘lgan bunday hujjatlar umumlashtirilgan holda xizmat xatlari deb yuritiladi. Xizmat xatlari xususiyatlariga ko‘ra o‘zaro farqlanadi. Xatlarni bajaradigan vazifasiga qarab quyidagi turlarga bo‘lish mumkin:
javob xatni talab qiluvchi xatlar (da’vo xatlar, so‘rov xatlar, iltimos xatlar).
javob xatni talab qilmaydigan xatlar (ilova xat, tasdiq xat, eslatma xat, axborot xat, kafolat xat va boshqalar).
Ushbu xatlar ma’lum bir maqsadda yoziladi, masalan, kafolat xatlarda kafolat berish ifodalansa, ilova xatlarda xatga ilova qilinayotgan hujjatlar haqida axborot beriladi. Biroq shunday xatlar ham uchraydiki, uning mazmunida ham kafolat berish, ham iltimos, ham eslatish ma’nolari ifodalanadi.
Xizmat xatlari, odatda, xatlar uchun tayyorlangan bosma ish qog‘ozlariga yoziladi. Rasmiy ish qog‘ozlari bo‘lmagan hollarda xizmat xatlari xos ish qog‘oziga yoki oddiy qog‘ozga yoziladi. Xat oddiy qog‘oz varaqqa yozilsa, uning chap tomonidagi yuqori burchagiga xat jo‘natayotgan muassasa nomi ko‘rsatilgan to‘rtburchak muhr qo‘yiladi.
Zaruriy qismlari burchakda joylashgan bosma yoki xos ish qog‘ozlarida zaruriy qism avval o‘zbek tilida, so‘ng rus yoki ingliz tilida beriladi. Zaruriy qismlar uzunasiga (bo‘yiga) joylashgan bosma ish qog‘ozlarida ular chap tomonda o‘zbek tilida, o‘ng tomonida rus yoki ingliz tilida beriladi.
Xizmat xatlari quyidagi zaruriy qismlarni o‘z ichiga oladi:
O‘zbekiston Respublikasi gerbi.
Muassasaning ramziy belgi (emblema)si.
Mukofotlar.
Vazirlik, boshqarma nomi.
Tashkilot nomi.
Bo‘linma nomi.
Tasniflagich bo‘yicha hujjatning xos raqami.
Muassasaning xos raqami.
Pochta, telegraf manzili, bankdagi hisobraqami.
Sana.
Shartli raqam.
Kelgan hujjat shartli raqami.
Hujjatning kelish sanasi.
Hujjat jo‘natiladigan manzil (xatni oluvchi muassasaning nomi).
Munosabat belgisi (rezolyutsiya).
Nazorat haqida belgi.
Matn sarlavhasi (xatning qisqacha mazmuni).
Matn.
Ilovalar haqida belgi.
Imzo.
Rozilik belgisi (viza).
Kelishuv haqida belgi.
Bajaruvchi haqida belgi va uning telefon raqami.
Bajarilganlik haqida belgi.
Har qanday xizmat xati mantiqiy jihatdan o‘zaro bog‘liq bo‘lgan uch qismdan iborat bo‘ladi. Xatning birinchi (kirish) qismida, odatda, xat bilan tegishli muassasaga murojaat qilishga majbur etuvchi asosiy sabab ko‘rsatiladi. Ikkinchi qismida xatda qo‘yilayotgan masalani hal qilish zarurligi dalillar asosida bayon qilinadi. Xatning uchinchi (xulosa) qismida esa xat yozishdan ko‘zlangan asosiy maqsad ifodalanadi.
Xizmat xatlari imkoni boricha qisqa bo‘lishi, biroq bu qisqalik uning aniq va ravshanligiga ta’sir etmasligi kerak. Qoidaga ko‘ra, xizmat xatlari bir betdan oshmasligi lozim. Faqat juda muhim masalalar yozilgan, birmuncha mufassal bayon talab qiluvchi xatlargina istisno tariqasida uch betgacha bo‘lishi mumkin. Xizmat xatlari qog‘oz varag‘ining oldi va orqa tomonlariga yoziladi.
Rasmiy xatlarni tuzuvchi shaxs ma’lum malakaga ega bo‘lishi kerak. Rasmiy xatlarni to‘g‘ri va tez tuzish, avvalo, o‘zbek tilining o‘ziga xos xususiyatlarini, shuningdek, zamonaviy rasmiy uslubni va unga qo‘yiladigan talablarni bilishni taqozo etadi. Ushbu talablarni bajarmaslik, birinchidan, xatlar bilan ishlashni qiyinlashtiradi, ikkinchidan, ularning huquqiy va amaliy ahamiyatini yo‘qotadi.
Rasmiy xatlar matnida ikki xil mazmunda tushuniladigan jumlalar bo‘lmasligi uchun ko‘chma ma’nodagi so‘z va iboralarni qo‘llashda ehtiyotkorlik, sinchkovlik talab etiladi.
Rasmiy xatlar tilida aniqlik va qisqalik asosiy mezon hisoblanadi. Bunday xatlar tili va uslubi qonunlar tiliga qo‘yiladigan talablar darajasida bo‘lishi zarur.
Xizmat xatlari vazifasi va mazmuniga ko‘ra bir necha turga bo‘linishini yuqorida ta’kidlagan edik. Xatlarning o‘ziga xos xususiyatlaridan yana biri shundaki, ularning nomi (kafolat xati, ilova xat, taklif xat, so‘rov xat va boshqalar) yozilmaydi. Ularning qanday xat ekanligi matn mazmunidan bilinib turadi.