Oziq-ovqat va Agrobiznes korxonalarini tashkil etish va boshqarish

1-mavzu. “Oziq-ovqat va Agrobiznes korxonalarini tashkil etish va boshqarish” fanining predmeti, oʻrganish usullari va vazifalari


Reja:

1. 
   Oziq-ovqat va Agrobiznes korxonalarini tashkil etish va boshqarish fanining predmeti va vazifalari.
   
2. 
   Qishloq xoʻjaligining respublika ijtimoiy iqtisodiyotida tutgan oʻrni va ahamiyati.
   
3. 
   Iqtisodiyotni modernizasiya qilish sharoitida agrar sohani rivojlantirish yoʻllari.
   
4. 
   Oziq-ovqat va Agrobiznes korxonalarini tashkil etish va boshqarish fanining oʻrganish usullari.
   

Ishlab chiqarish kuchlari va ishlab chiqarish munosabatlarini ilmiy asoslarini yaratish qishloq xoʻjaligini rivojlantirishda nihoyat muhim ahamiyat kasb etadi.

Qishloq xoʻjaligida talabga javob beradigan quyidagi huquqiy, tashkiliy iqtisodiy va ijtimoiy munosabatlar tizimi yaratildi, ya’ni:
-mulkchilikning turli shakllari barpo etilishi, natijasida erkin mulkiy munosabatlar vujudga keldi, tadbirkorlikning har xil turlarini yaratish, ularni rivojlantirish yoʻllari izlanmoqmoqda, yer-suv islohotlari amalga oshirilmoqda;
-tarmoqning cheklangan ishlab chiqarish resurslari (yer-suv, kapital, mehnat, tadbirkorlik qobiliyati)dan samarali foydalanish, ishlab chiqarilgan mahsulotlarni sotish, daromad, foyda va ularning taqsimlanishi, investisiyalarni jalb etish, ulardan samarali foydalanish, tarmoq ishlab chiqarishini maqsadga muvofiq joylashtirish, ixtisoslashtirish hamda agrosanoat integrasiyasini xalqaro munosabatlar asosida tashkil etish bilan bogʻliq boʻlgan iqtisodiy munosabatlar tizimi yaratilib, ular takomillashtirilmoqda,.
Yuqorida ta’kidlangan iqtisodiy munosabatlar tizimini yaratishda xalqimiz hamda qishloq xoʻjaligining oʻziga xos xususiyatlarini e’tiborga olgan holda tabiiy, ijtimoiy, iqtisodiy qonunlar, iqtisodiy kategoriyalar talablaridan oqilona foydalanish taqozo etiladi.
Qishloq xoʻjaligining barqaror iqtisodiy asosini, takror ishlab chiqarish jarayonini rivojlantirishni ta’minlaydigan iqtisodiy munosabatlar tizimini yaratish, ularni hayotga joriy etish masalalarini, yoʻllarini oʻrganish, qishloq xoʻjaligi ishlab chiqarishini ilmiy me’yorlar doirasida boshqarish va boshqarishni tashkil etish «Agrobiznes korxonalarini tashkil etish va boshqarish» fanining predmeti hisoblanadi.