P. Berdanova, P. Abdalieva, Sh. Oteniyazova Didaktika

ÓZBEKĐSTAN RESPUBLĐKASÍ
XALÍQ BĐLĐMLENDĐRĐW MĐNĐSTRLĐGĐ
ÁJĐNĐYAZ ATÍNDAǴÍ NÓKĐS MÁMLEKETLĐK
PEDAGOGĐKALÍQ ĐNSTĐTUTÍ
P.Berdanova, P.Abdalieva, Sh.Oteniyazova

Didaktika

(oqıw-metodikalıq qollanba)
NÓKĐS-2016
Dúziwshiler: P.Berdanova, P.Abdalieva, Sh.Oteniyazova
Bul metodikalıq qollanba pedagogika pániniń arnawlı tarawı bolǵan oqıtıw teoriyasın úyretiwshi didaktika bóliminde úyreniletuǵın bir qansha mashqalalar haqqında maǵlıwmat beriledi. Tiykarınan bul miynette didaktikanıń payda bolıw hám rawajlanıw tariyxı, oqıtıw procesi, oqıtıwdıń mazmunı, oqıtıw metodları hám quralları, oqıtıwdıń shólkemlestiriw formaları hám oqıwshılardıń bilim, kónlikpe hám uqıplılıqların bahalaw máselelerine keńnen toqtalǵan. Sonıń menen birge, bul miynette didaktikalıq materiyallarǵa baylanıslı test tapsırmaları hám qadaǵalawshı sorawlar berilgen.
Miynet joqarı oqıw orınlarınıń pedagogika qánigeligi hám de bul taraw boyınsha qızıǵıwshılardıń keń jámiyetshiligi ushın arnalǵan.
Juwaplı redaktor:
B.Qurbanbaeva - Ájiniyaz atındaǵı NMPI Qaraqalpaq til bilimi kafedrasınıń úlken oqıtıwshısı, filologiya ilimleriniń kandidatı
Pikir bildiriwshiler:
U.Seytjanova - Ájiniyaz atındaǵı NMPI Ulıwma pedagogika hám psixologiya kafedrası docenti, pedagogika ilimleriniń kandidatı
A.Bekimbetova- Berdaq atındaǵı QMU Pedagogika hám psixologiya kafedrası docenti, pedagogika ilimleriniń kandidatı
Oqıw - metodikalıq qollanba Ájiniyaz atındaǵı Nókis mámleketlik pedagogikalıq institutı ilimiy oqıw-metodikalıq keńesi qararı
(11-mart 2016-jılǵı №9-sanlı bayanlama) menen baspadan shıǵarıwǵa usınıs etilgen.
KĐRĐSĐW
Házirgi zaman pedagogikasında didaktika oqıtıw hám bilim beriw teoriyası menen shuǵılllanatuǵın ayrıqsha taraw sıpatında qaraladı. Oqıtıwdıń mazmunın anıqlaw, oqıtıw procesi nızamlılıqların ashıp beriw hám de oqıtıwdıń eń nátiyjeli usıl hám jolların tabıw didaktikanıń tiykarǵı mashqalaları esaplanadı.
Bul metodikalıq qollanba pedagogika pániniń didaktika tarawına tiyisli temalardı óz ishine qamtıǵan bolıp, onda bilim beriw hám oqıtıw teoriyasınıń wazıypaları hám áhmiyeti, tiykarǵı túsinikleri, házirgi dáwir didaktikalıq rawajlanıwdıń tiykarǵı baǵdarları, úzliksiz bilim beriw koncepciyası, onı házirgi dáwir pedagogikasında iske asırıwǵa hár túrli jantasıwlar haqqında maǵlıwmat berilgen.
Sonday-aq, házirgi zaman didaktikası hám jeke metodikasında oqıtıw metodlarına sıpatlama beriwge hár qıylı jantasıwlar, ayırım oqıtıw metodlarınıń sıpatlaması, oqıtıw principleri hám nızamlılıqları, orta arnawlı bilimlendiriwdiń mazmunı, oqıtıwdıń mazmunın belgilewshi tiykarǵı hújjetler, oqıtıwdıń shólkemlestiriw haqqında túsinik onıń hár túrliligi, oqıtıwdı shólkemlestiriw formaları hám oqıwshılardıń bilim, kónlikpe hám uqıplılıqların diagnostikalawǵa ayrıqsha toqtap ótiledi.
Bunnan tısqarı hár bir tema sonday metodikalıq tárizde dúzilgen bolıp, olar temanıń maqsetin, maznunın aship beriw menen birge, tákirarlaw ushın sorawlar hám temalar boyınsha test tapsırmaları berildi, aqırında tiykarǵı ádebiyatlar dizimi keltirilgen.
Bunday tártipte dúzilgen tekstler oqıwshıladıń óz betinshe pikirlewi, óz ústinde jedelirek islewinde qolaylılıqlar jaratadı.
Bul metodikalıq qollanba joqarı oqıw ornı oqıtıwshıları hám talabaları, orta arnawlı bilimlendiriwi oqıtıwshı hám oqıwshıları ushın metodikalıq kórsetpe sıpatında qollanıwǵa arnaladı.