Qаrаqаlpаqstаn respublikаsi ministrler ken’esi jаnindаg’i ortа arnаwli bilimlendiriw bаsqаrmаsi

55-shınıg’ıw. Ga’plerde atlıqlardın’ qanday seplikte turg’anın anıqlan’, olardın’ qanday ma’ni bildirip turg’anın tu’sindirin’.
Bag’analı qumnın’ etegine sıbaylas qonıs basqan elatqa uzaq ko’z tigip turdı. Adamlar qollarına arqan, jip, baltaların alıp otıng’a baratır. Qolında mıltıg’ı, izinde salpı qulaq tazıları menen birewler Qa’lli jag’ısqa bag’ıt alg’an. Olar aqshamg’ı jawg’an qalın’ qardan da’melenip uzaq tu’ndi uyqısız o’tkergen, qoyan-qırg’awıllardın’ ıshqıpazları, an’shılar ekeni anıq (E.I.). Bular qosılg’an jılları Ismayıl joqarı bilimge iye bolsa da, No’kisten on’lı jumıs tabalmay, ko’l-da’ryalardı qadag’alaw postında baqlawshı bolıp islep ju’rdi. Sveta bir mektepke azg’antay sabaq penen oqıtıwshı bolıp ornalastı (G.E.). Mine kinoekspeditsiyamız gezektegi rayonlardın’ birine kelip irkildi. Usı gezge deyin kelip ko’rmegen Bostan sha’ha’rinin’ orayındag’ı miymanxanadamız. Ekinshi ku’nge qarag’an tu’nde de biraz jawın japtı. Al, menin’ kewlim alg’aw-dalg’aw. Negedur tu’sim menen o’n’imdi ayıra almay ha’lekpen. Onnan qala berse ko’rgen tu’slerim de a’jepta’wir. Tu’simde kishkene qızımdı joytıp alg’anman ba... (M.T.).
56-shınıg’ıw. Teksttegi atlıqlardag’ı ko’p noqat ornına sa’ykes seplikqosımtasın qosın’. Iyelik ha’m tabıs seplikleri qosımtalarının’ tu’sirilmey ashıq jalg’anıwına yamasa tu’sirilip jasırın qollanılıwına dıqqat awdarın’.
Bizler Moskva... yarım aqsham... ushqan edik. Aytıwlar... qarag’anda Deli... erten’i... azan... baradı ekenbiz. Samolyot... terezeleri... u’n’ildik, a’ri-beri jurnal, gazetalar... ko’rdik. Biraq to’men... hesh na’rse ko’rinbegenlikten tınıshlanıp, otırg’an-otırg’an jerimiz... uyıqlap kettik. Men oyansam, samolet... ishindegi svet o’shirilipti. Ku’n shıg’ıp ketken eken. Ish... ku’n... nurı tu’sip tur. Ha’mme samolet... aynaları... u’n’ilip atır (M.S.).
57-shınıg’ıw. Ga’plerde seplik jalg’awlı atlıqlardın’ qanday ga’p ag’zası xızmetin atqarıp turg’anın anıqlan’.
Azannan beri ku’n shıg’ar-arqag’a qaray jıljıp baratırg’an qara-ko’gis bultlar; ga’ toda-toda bolıp dag’ısıp, ga’ u’yirilip, ku’nnin’ ju’zin ko’rsetpey, ga’ tu’nerip qaladı. Geyde ıdırap baratırg’an bultlardın’ shet-shebiri quyash nurı menen jarqırag’an waqıtları, olar tap basında ma’n’gilik qar jatırg’an za’wlim tawlarg’a megzep, jarlanıp, jag’aların qoyıw, ko’gis tu’tindey tog’ay qaplap, dumanlasqan sayları taram-taram bolıp atırg’anday – tap ha’zir sol saylardan suw degen burqasınlap ag’ıp, birden gu’rkirep ketetug’ınday sezilip tur. Qalay da Qosbergennin’ bir-eki ku’nnen beri ayaq-qolının’ qaqsap, hesh na’rse qos jaqpay ju’rgeninshe bar eken, ku’nnin’ jawatug’ın sılayı bar qusaydı... Ba’ha’rdin’ bunday ku’nlerinde hawa rayı tez-tez aynıp, bılag’ayshılıq ko’p bolıp turadı (U.P.).