Tema: Teris emes bútin sanlar arifmetikasın oqıtıw metodikası

15-Óz betinshe jumıs
tema: Teris emes bútin sanlar arifmetikasın oqıtıw metodikası


Reje:

1. 
   Nomerlewdi úyreniwdiń ulıwma máseleleri.
   
2. 
   Bólingishlik teoriyasın oqıtıw metodikası.
   

1. Nomerlewdi úyreniwdiń ulıwma máseleleri.
Respublikada kadrlar tayarlaw milliy dástúriniń islep shıǵılıwı, onıń keń analiz qılınıwı hám Joqarı keńestiń 9 – sessiyasında kadrlar tayarlaw milliy dástúriniń tastıyıqlanıwı, birinshi Prezidentimiz I.A.Karimovtıń sessiyadaǵı tálimin rawajlandırıw hám strategiyalıq baǵdarların belgilep beriwshi sózi xalıq tálimi dizimindegi eń kerek waqıya bolıp esaplanadı.
Kadrlar tayarlaw milliy dástúrin ámelge asırıwdıń muhim sostavlı bólimlerinen biri bilimlendiriwdi standartlastırıw, zamanagóy test texnologiyaları tiykarında bilimlendiriw processindegi sıpatlı kórsetkishlerdiń monitoring dizimin jaratıw bolıp esaplanadı.
Sonıń ushın baslawısh klass táliminiń dástúrin, sabaqlıqların hám jumıs tártiplerin qayta kórip shıǵıw zárúrligi kelip shıǵadı. A`sirese, baslawısh tálim predmetleri ishinde matematikanı oqıtıw tiykarǵı orın tutadı. Matematika dástúri óz ishine dáslep natural sanlar menen tórt arifmetikalıq ámeldi orınlawdı aladı. Bul matematikanıń yadrosın quraydı. Sonıń menen birge algebra hám geometriyanıń tiykarǵı túsinikleri, tiykarǵı muǵdarlar kiritilgen, olar arifmetikalıq ámeller menen zárúriy orında qosıp oqıtıladı.
Teris emes pútin sanlardı nomerlew hám olar ústinde arifmetikalıq ámeller orınlaw baslawısh klass matematika kursınıń tiykarın quraydı. Oǵan qosılıp algebra hám geometriya elementleri oqıtıladı. Dástúrde natural sanlar hám 0 haqqındaǵı maǵlıwmatlardı áste aqırın onlıq, ekinshi onlıq, júzlik, mıńlıq hám kóp xanalı sanlar koncentrlerin kiritiw názerde tutıladı. Bul onlıq sanaq sistemasınıń ózgeshelikleri menen awız eki hám jazba nomerlewdi qayta-qayta qollanıw arqalı beriledi.
Birinshi onlıq nomerlewde 1-10 sanların sanaw, nomerlerdi aytıw, izbe-izliktiń úlken-kishiligin ózlestiriw názerde tutıladı. 1-onlıq penen 0 sanı qosılıp úyretiledi. Ol bos kópliktiń xarakteristikası sıpatında berilgen. Nomerlew dawamında 11-20, keyin 21-100 ishinde sanlardı nomerlew qaraladı. 1, 2,… onlıqlardı payda etiw menen birgelikte onlıqlardı yaǵnıy onlıq sanaq sistemasınıń mazmunı túsindiriledi. Keyingi klasslarda 100 ishinde, 1000 ishinde hám kóp xanalı sanlar jazba hám awızeki nomerlew, arifmetikalıq ámeller orınlaw komponentleriniń atların úyretiwler ámelge asırıladı.