Toshkent tibbiyot akademiyasi miokard infarkti, atipik kechishi, asoratlari

O‘pkani alveolyar shishi. Unda yuqorida sanab o‘tilgan klinik belgilarga 
qo‘shimcha ravishda nafas olish soni oshadi va shovqinli bo‘ladi, masofadan 
eshitiladigan yirik pufakchali nam xirillashlar (samovar qaynashiga o‘xshash 
nafas) kuzatiladi. Bemorda pushti rang ko‘pikli balg‘am ajralishi bilan kechadigan 
yo‘tal paydo bo‘ladi. O‘pkada sustlashgan vezikulyar nafas asosida mayda va 
o‘rtacha, qisqa vaqt ichida yirik pufakchali nam xirillashlar aniqlanadi. Xirillashlar 
avval orqa tomondan o‘pkani pastki bo‘laklarida, keyinchalik uning barcha 
sohasida eshitiladi. Yurak tonlari yanada sustlashadi. Yurak cho‘qqisida 
protodiastolik yoki presistolik ot dupri ritmi, o‘pka arteriyasi ustida II ton aksenti 
qayd etiladi. Qon bosimini pasayishi davom etadi, puls tezlashadi, ayrim hollarda 
aritmik, kam to‘liqlikda va kuchlanishda bo‘ladi. O‘pkaning alveolyar shishini 
og‘irlik (yengil, o‘rta va og‘ir) darajasiga ko‘ra ushbu belgilar bir oz yoki yaqqol 
namoyon bo‘lishi mumkin. 
Ayrim hollarda kasallikning klinik belgilari yurak astmasi va o‘pka shishini 
aniq chegaralash imkonini bermaydi. Nafas siqish xuruji og‘riq sindromi bartaraf 
etilgandan keyin yoki bir nechta tabletka qabul qilinganda o‘tib ketishi yurak 
astmasi tashxisini tasdiqlaydi.
Kardiogen shok – miokard infarktini o‘ta og‘ir asotatlaridan biri bo‘lib, u 
rivojlanganda o‘lim holati 65-90% ni tashkil etadi. Aksariyat hollarda u kasallikni 
birinchi soatlarida va 1-2 -kunida rivojlanadi.
Klinik belgilari. Kardiogen shokda bemor asosiy kasallikka (to‘sh ortidagi 
og‘riq, yurakni tez va noto‘g‘ri urishi) va kichik qon aylanish doirasida 
dimlanishga (hansirash va bo‘g‘ilish), qon bosimini tushishiga hamda ichki a’zolar 
faoliyatini buzilishiga (holsizlik, bosh aylanishi, ko‘p terlash, qo‘l –oyoqlarni 
muzlashi, oligouriya va anuriya) xos bo‘lgan shikoyatlar bildiradi.
Ko‘rik vaqtida uning axvoli og‘ir. Kardiogen shokning ilk bosqichida 
bemorda psixomotor qo‘zg‘aluvchanlik kuzatiladi (shokni erektil bosqichi). Qisqa 
vaqt ichida kam harakat, atrof muhitga befarq bo‘lib qoladi. Bu gipoksiya, asidoz 
va bosh miyada qon aylanishi kamayganligidan darak beradi (torpid bosqichi). 
Bemorni es hushi sustlashgan yoki koma holatida bo‘lishi mumkin.