Yangi O`zbekistonda erkin va farovon yashaylik

Yangi O`zbekistonda erkin va farovon yashaylik
Ilk bor maktabga qadam qo`ygan chog`larimda ustozim ’’Vatan’’degan tushunchani o`zgacha bir g`urur, iftixor ila ta`riflaganlarida hayron qolar edim. Ustozimning vatan haqidagi har bir so`zi chin qalbidan mamnunlik ila chiqayotganidan hayratlanar edim.Qiziq, Vatan shunchalar ulug`mikan?
Vatan o`zi nima?
Kindik qonimiz to`kilgan tuproqmi ? Onaizorning mungli va ayni chog`da nurli allasimi? Buvijonlarimiz aytgan rivoyat-u ertaklarmi? Oilami?
Dasturxon atrofida to`planganimizda yoshi ulug` insonlarning qo`l ochib qilgan duolarimi? Yoki ustozimning faxr ila aytgan so`zlarimikan?
Vatan, avvalo , ona allasidan, oila ostonasidan , mahalladan boshlanadi.
Vatan bularning barchasidir. Vatan degan tushunchani har kim har xil tassavvur etadi. Rassom mo`yqalami orqali vatan tushunchasini tasvirlamoqchi bo`lsa , shoir-u yozuvchilar o`tkir qalami ila vatan ta`riflashga harakat qiladi.
Meninmcha, ulg`ayganimiz , katta hayot ostonasiga qadam qo`yganimiz sari vatanning qamrov darajasi kengayib boradi.
Vatan haqida gap ketganda , doimo ustozimning gaplari esimga keladi.
``Dunyoda ikkita narsa tanlanmydi. Vaatn va ota-ona. Bir asar qahramoni aytganidek, agar vatanni xo`rjinga solib yurganda edi, u Vatan bo`lmas edi.
Vatan tanlanmaydi. Vatanni ko`tarib olib yurib bo`lmaydi,``- der edilar.
Inson hayoti davomida boshqa yurtlarda yashashi mumkin. Lekin umrining oxirgi kunlarida vatan sog`inchi insonga azob beradi.
Xayriddin Sultonovning ``Saodat sohili`` qissasida Bobur umrining so`nggi daqiqalarida unga yaqin bo`lganlar armoningizni ayting , bajo keltiraylik deganda Bobur men yurtimga qalandar bo`lib qaytishga roziman deydi. Aslini olganda qalandar kim u? Uni dunyoda xo`rjinidan boshqa hech narsa si yo`q. Bobur hamma narsasidan vos kechib kechishga tayyor bo`lgan.
Insonning vataniga bo`lgan cheksiz muhabbatining, yurt sog`inchining yaqqol isbotini ko`rish mumkin.
``Vatanga muhabbat onaga muhabbat kabi muqaddas va yuksak tuyg`u. Onaga muhabbatning shunday bir o`ziga xosligi borki , odam bu tuyg`usi haqida olamlarga jar solib , hammani undan voqif qilavermaydi.
Vatan muhabbati ham shunday : u hammaga ko`z-ko`z qilinmaydi , u to`g`risida tantanavor e`lonlar chop etilmaydi, har muyulishda odam ko`kragiga urib, Vatanga oshiqligini pisanda qilmaydi. Vatanga muhabbat bozorga solinadigan matoh emas, balki inson qalbining to`rida gard yuqtirmay pokiza saqlanadigan eng nafis , eng inja bir tuyg`udir. Uning to`g`risida huda behuda jar solaversang, har kuni amalda emas , og`izda namoyon etaversang, bu tuyg`uning muqaddasligi qolmaydi.``
Men ham shunday ulug` va jannatmakon yurtda tug`ilganimdan faxrlanaman.
Bir to`kilib tag`in qomat tikladik ,
Yelkalarga millat yukin yukladik.
Ozod vujudlarda ruh bo`ldi bino,
Binolar o`rnida davlat tikladik.
Qay kun tildan uchdi qadrdon kalom-
Dunyolarni quchdi o`zbek degan nom!
Mustaqillik bu ulug` ne`mat. Har bir shaxs bu ulug` ne`matning qadriga yetishi , vatan xizmati yo`lida sobit qadam turishi lozim. Dunyoda mustaqilligini qo`ldan boy bergan qancha davlatlar mavjud .Vatanimiz mustaqilligiga, tinchligiga ko`z tegmasin. Zero, istiqlol yillaridan boshlab erishilib kelinayotgan yutuq va marralar zamirida mustaqillik deb atalmish bebaho ne`mat yotadi.
Yaqinda yurtimiz 30 yoshga toladi. Mustaqillikning 30 yillik yubileyini ``Yangi O`zbekistonda erkin va farovon yashaylik`` g`oyasi ostida o`tkazilishi bejizga emas. Chunki O`zbekiston so`nggi 5 yil ichida misli ko`rilmagan darajada yutuqlarga ,o`zgarishlarga erishdi. Jahon miqyosida ham ``Yangi O`zbekiston`` deya atalishi har bir yurt fuqarosiga o`zgacha g`urur baxsh etadi.
Birgina yoshlarga oid davlat siyosati , e`tibori yurt kelajagi bo`lmish yoshlarga g`amxo`rlikning yorqin namunasidir.
Masalan, yoshlar ma`naviyatini yuksaltirish va ularning bo`sh vaqtini mazmunli tashkil etish bo`yicha 5 muhim tashabbus joriy etildi. Unga ko`ra:
1-tashabbus Yoshlarning musiqa, rassomlik, adabiyot, teatrga qiziqishini oshirish, iste`dodini yuzaga chiqarish;
2-tashabbus Yoshlarni jismoniy chiniqtirish, sport sohasida qobilyatini namoyon qilish;
3-tashabbus Yoshlar o`rtasida kompyuter texnologiyalari va internetdan samarali foydalanish;
4-tashabbus Yoshlar o`rtasida kitobxonlikni targ`ib qilish;
5- tashabbus Xotin-qizlarni ish bilan ta`minlash nazarda tutilgan. Bu o`z navbatida mamlakatning taraqqiy etishiga xizmat qiladi. Zero, yurt kelajagi biz yoshlar qo`lida.
Oybekning `` Navoiy`` romanida Navoiyning tabiricha, mamlakatdagi oddiy qorovuldan tortib yuqori mansabdagi shaxs o`z ishini sidqidildan bajarsa, davlat yuksaladi.
Xulosa qilib aytganda, Shu ozod va obod vatanda yashar ekanmiz, har bir fuqaro uning ravnaqiga birday mas`uldir. Keling , azizlar, Vatanga sadoqat bilan xizmat qilib, yurtimizni bundanda qudratli bo`lishiga o`z hissamizni qo`shaylik hamda Yangi O`zbekistonda erkin va farovon yashaylik!

Inoyatova Dildora Ilhom qizi.

Buxoro davlat universiteti
Filologiya fakulteti
6-8-Uzb -19- guruh talabasi