Юрак ишемик касаллиги (юик)

Стенокардия ҳуружларини профилактикаси
ЮИК билан оғриган беморларга стенокардия ҳуружларини олдини олиш ва жисмоний юкламага чидамлиликни ошириш мақсадида нитратларни қабул қилиш тавсия этилади. Узоқ вақт катта дозаларда қўллаш уларга тез кўникма ҳосил бўлишига ва самарасини пасайиши ёки умуман йўқолишига олиб келиши кузатувларда тасдиқланган. Нитроглицерин ёки изосорбид динитратни томир ичига томчилаб юборганда, ҳамда маз кўринишидаги турларини қўллаганда эрта кўникма ҳосил бўлади. Ҳар қандай нитратни, айниқса узоқ вақт таъсир қилувчиларини қабул қилганда кўникиш ҳолати ривожланиши мумкин. Айрим беморларда нитратларни бир нечта дозада қабул қилганда тахифилаксия деб аталувчи жуда тез юзага келадиган чидамлилик ривожланади ва унинг механизми ҳозиргача тўлиқ ўрганилмаган. Бу ҳолат ривожланишини олдини олишни ягона йўли нитратларни танаффус қилиб (асимметрик) қабул қилиш ҳисобланади. Бундай усулда қўллаганда кун давомида маълум муддат (8-10 соатгача) нитратлар таъсиридан озод вақт юзага келади. Шу сабабли уларни қисқа муддатли таъсирга эга бўлган турлари кунига 2 ёки 3 марта, фақат “асимметрик”, масалан эрталаб ва туш вақтида қабул қилиш тавсия этилади. Бунда кечкурин ва тунги вақтда препарат таъсири бўлмайди. Зарурият бўлганда куннинг бошқа вақтида “алмаштириб” қабул қилиш мумкин.
Таъсир давомийлиги ўртача бўлган (3-6 соат) нитратлар кунига 2 мартадан кўп қўлланилмайди (масалан эрталаб ва кечқурин), узоқ таъсир (6-12 соат) этувчиларини эса фақат 1 марта қабул қилиш тавсия этилади.