Dep aytqanın esapqa alsaq, qaraqalpaq qaharmanlıq dástanlarındaǵı troplar máselesi de eposlardıń milliy ózegin kórsetip beriwshi áhmiyetli másele ekenligi kórinip tur

Jáhán folklortanıw xalıq awızeki kórkem dóretpeleriniń payda bolıw tariyxı, milliy-etnomádeniy ózgesheligi hám poetik evolyuciyasınıń epikalıq dástúrleri, genezisi hám tipologiyası kontekstinde ashıp beriw kútá zárúr máselelerdiń biri bolıp tur. Sonlıqtan salıstırmalı-tipologik ilimler nátiyjesinde islengen ilimiy juwmaqlar folklordıń ózinshe milliyligi búgingi tariyxıy-folklor nátiyjesiniń dáslepki ózgeshelikleriniń biri ekenligin dáliyllew imkaniyatın berdi. Sonday-aq, xalıq dástanlarınıń ózine tán janrlıq belgilerin anıqlawda arnawlı ilimiy áhmiyetke iye. Tilekke qarsı, bul áhmiyetli másele qaraqalpaq folkloristika iliminde búgingi kúnge shekem ilimiy-teoriyalıq tiykarda maqsetli túrde izertlenbedi.
Dúnya folklortanıw iliminde qaharmanlıq epos temasındaǵı teoriyalıq jumıslarǵa jańasha zamanagóy jantasıwlardıń payda bolıwı, sonday-aq, xalıq dástanlarında troplardıń qollanılıw ózgesheligi, folklorda kórkem obraz jaratıwda epitetler, teńewler, giperbolalar hám janlandırıwlardıń syujetlik liniyalardı rawajlandırıwda kórkem-emocional tásirsheńlilikti hám basqa máselelerdi úyreniwge baylanıslı ilimiy-teoriyalıq pikirler jetilistirilip, qaharmanlıq epostıń genetikalıq tamırlarınıń evolyuciyalıq ilimiy jónelisiniń baskıshın kórsetip berdi.
Házirgi kúnde mámleketimizdegi ilim-pán, tálim, mádeniyat hám basqa tarawardı rawajlandırıw boyınsha reformalarǵa itibar qaratılıp, qaharmanlıq eposlardıń hám milliy mánáwiy miyraslar sistemasındaǵı áhmiyetine joqarı itibar qaratılıp, olardı úyrenip shıǵıw bizlerdiń aldımızdaǵı áhmiyetli wazıypa bolıp tur. «Hár qanday xalıqtıń ázeliy tariyxı hám mádeniyatı, dáslep onıń awızeki dóretiwshiligi – folklor mádeniyatında, dástan hám eposlarında sáwlelengen bolıp, olarda millettiń ózligin ańlaw, onıń ózine tán milliy esteliklerin, dástúrlerin saqlaw hám rawajlandırıw biybaha miyras esaplanadı.»¹, dep aytqanın esapqa alsaq, qaraqalpaq qaharmanlıq dástanlarındaǵı troplar máselesi de eposlardıń milliy ózegin kórsetip beriwshi áhmiyetli másele ekenligi kórinip tur.

1Ўзбекистон Республикаси Президенти Ш.М.Мирзиёевнинг «Халқаро бахшичилик санъати фестивалини ўтказиш тўғрисида»ги қарори // Халқ сўзи. – Т., 2018 йил 2 ноябрь.