Mashg’ulot jarayonida sportchilar tayyorgarligining asosiy bo’limlari

MASHG’ULOT JARAYONIDA SPORTCHILAR

TAYYORGARLIGINING ASOSIY BO’LIMLARI

(jismoniy, texnik, taktik, psixologik tayyorgarlik)

REJA:

1. 
   Jismoniy tayyorgarlik.
   
2. 
   Texnik tayyorgarlik.
   
3. 
   Taktik tayyorgarlik.
   
4. 
   Psixologik tayyorgarlik.
   

Maxsus adabiyotlarda sportchilar tayyorgarligining har tur va xillari farqlanadi. Tarqoq va nisbatan turg’un fikrlarning umumlashtirilishi ularning umumiy tasnifi uchun uchta eng ahamiyatli beligini taklif etishga imkon beradi: sportchining muvaffaqiyatga erishish uchun tayyorgarlik u yoki bu tarkibiy qismlariga (texnik, taktik, jismoniy, psixologik, aqliy (nazariy), tayyorgarlik) ustuvor ta'sir ko’rsatishi bo’yicha; sport ixtisosligi bilan o’zaro bog’liqligining xususiyatiga ko’ra (umumiy va maxsus tayyorgarlik); mashg’ulot hamda musobaqa faoliyati sharoitida tayyorgarlikning har xil jihatlari sifatlar va qobiliyatlarning birlashuvi, uyg’unligi hamda ro’yobga chiqarilishi bo’yicha (integral tayyorgarlik).
1. Texnik tayyorgarlik

1.1. Sportchining texnik tayyorgarligi haqida tushuncha. Har xil sport turlarida sport texnikasining tutgan o’rni va ahamiyati

Texnik tayyorgarlik sportchini harakatlar texnikasiga o’rgatish va ularni mukammal darajaga yetkazishga qaratilgan bo’ladi.

Sport texnikasi sport harakatini bajarish yo’li bo’lib, u sportchining o’z psixo-fizik imkoniyatlaridan foydalanish samaradorligining muayyan darajasi bilan ajralib turadi.

Har xil sport turlarida sport texnikasining ahamiyati bir xil emas. O’ziga xos sport texnikasiga ega bo’lgan sport turlarining to’rt guruhi ajratiladi:

1. Tezlik-kuchga asoslangan turlar (sprintercha yugurish, uloqtirishlar, sakrashlar, og’ir atletika va h.k.). Mazkur sport turlarida texnika shunday yo’naltirilganki, bunda sprinterchi musobaqalashuv mashqining yetakchi bosqichlarida, masalan, yugurish, uzunlikka va balandlikka sakrashda itarilish chog’ida, nayza, disk va h.k. uloqtirishda yakunlovchi harakatlarni bajarayotganda eng baquvvat hamda tezkor kuchlanishlarni rivojlantira olishi lozim.

2. Chidamlilik namoyish etilishini talab qiluvchi sport turlari (uzoq masofalarga yugurish, chang’ida poyga, velosiped sporti va b.).

3. Asosini harakatlanish san'ati tashkil etuvchi sport turlari (gimnastika, akrobatika, suvga sakrash va h.k.). Texnika sportchi harakatlarining go’zalligi, ifodaliligi va aniqligini ta'minlab berishi kerak.

4. Sport o’yinlari va yakkakurash turlari. Texnika musobaqa kurashining doimo o’zgarib turadigan sharoitlarida sportchiga yuksak samaradorlik, barqarorlik va harakatlarining servariantligini ta'minlab berishi zarur.

Sportchining texnik tayyorgarligi shunisi bilan ajralib turadiki, u o’zlashtirilgan harakatlarni bajara oladi va ularning texnikasini egallab olgan. Texnik tayyorgarlikning yetarlicha yuqori darajasini texnik mahorat deb ataydilar. Texnik mahoratning mezonlari quyidagilardir:

• 
  Texnikaning hajmi – sportchi bajara oladigan texnika priyomlarning umumiy miqdori.
  
• 
  Texnikaning serqirraligi – texnik priyomlarning xilma-xilligi darajasi. Masalan, sport o’yinlarida bu – har xil o’yin priyomlaridan foydalanishlar sur'atining nisbati.
  

Texnik mahoratning mazkur ko’rsatkichlari texnik harakatlarning juda katta zahirasi bo’lgan sport turlarida – sport o’yinlari, yakkakurash turlari, gimnastika, figurali uchish – ayniqsa katta ahamiyatga ega.

• 
  Sport texnikasiga egalik qilish samaradorligi sport harakati texnikasining individual optimal variantga yaqinligi darajasi bilan belgilanadi.
  

Texnikaning samaradorligini bir necha usul bilan baholaydilar:

a) uni qandaydir biomexanik etalon bilan qiyoslash. Agar texnika biomexanik jihatdan oqilona darajaga yaqin bo’lsa, u eng samarali hisoblanadi;

b) baholanayotgan harakat texnikasini yuqori malakali sportchilar texnikasi bilan taqqoslash;

v) sport natijasini sportchining harakat imkoniyatlarini belgilovchi texnik tomondan birmuncha soddaroq – kuch, tezlik-kuch va h.k. topshiriqlaridagi natijalar bilan taqqoslash. Masalan, 30 m ga avval past, keyin yuqori startdan yugurish amalga oshiriladi. Vaqtdagi tafovut pastki start texnikasi samaradorligini ko’rsatadi;

g) ko’rsatilgan natijani harakat faoliyatini bajarish paytidagi kuch-quvvat harakatlari bilan taqqoslash. Quvvat sarfi qanchalik kam, ya'ni harakatlar tejamli bo’lsa, texnika samaradorligi shuncha yuqori hisoblanadi.

• 
  Harakatlar texnikasining o’zlashtirilganligi. Mazkur mezon bu texnik harakat qanday o’rganilgani, mustahkamlanganligini ko’rsatadi.
  

Yaxshi o’zlashtirilgan harakatlarga xos xususiyatlar:

a) harakatni standart sharoitlarda bajarish vaqtida uning texnikasiga xos qator jihatlar va sport natijasining barqarorligi;

b) harakatni bajarish chog’ida (sportchining holati, murakkablashtirilgan sharoitlarda raqib harakatlari o’zgarganda) natijaning barqarorligi (nisbatan kam o’zgarishi);

v) mashg’ulotdagi tanaffuslarda harakat ko’nikmasining saqlanib qolishi;

g) harakatlar bajarilishining avtomatlashganligi.

1.2. Sportchilar texnik tayyorgarligining turlari, vazifalari,

vosita va usullari

Umumiy va maxsus texnik tayyorgarlik farqlanadi. Umumiy texnik tayyorgarlik sport faoliyatida zarur bo’lgan xilma-xil harakat ko’nikma va malakalarini egallashga yo’naltirilgan.

Umumiy texnik tayyorgarlik jarayonida quyidagi vazifalar amalga oshiriladi:

1. Tanlangan sport turidagi ko’nikmalarni shakllantirish uchun asos hisoblangan harakat ko’nikma va malakalari diapazonini kengaytirish (yoki tiklash).

2. UJT vositalari sifatida qo’llanadigan mashqlar texnikasini o’zlashtirish.

Maxsus jismoniy tayyorgarlik tanlangan sport turidagi harakatlar texnikasini o’zlashtirishga yo’naltiriladi. U ushbu vazifalarning hal etilishini ta'minlaydi:

1. Sport harakatlari texnikasi to’g’risidagi bilimlarni shakllantirish.

2. Harakatlar texnikasining sportchi imkoniyatlariga eng mos keluvchi alohida shakllarini ishlab chiqish.

3. Musobaqalarda muvaffaqiyatli ishtirok etish uchun zarur bo’lgan ko’nikma va malakalarni shakllantirish.

4. Texnika shakllarini o’zgartirish va yangilash (sport taktikasini takomillashtirish qonuniyatlari talab qilgan darajada).

5. Sport texnikasining ilgari qo’llanmagan yangi variantlarini shakllantirish (masalan, balandlikka sakrashda “fosbyuri-flop”; yadro itqitishning xuddi disk uloqtirishdagidek burilish tamoyiliga asoslangan texnikasi; chang’ida konkidagidek uchish va b.).

Texnik tayyogarlik jarayonida sport mashg’ulotlarining vosita va usullari majmuasidan foydalaniladi. Ularni shartli ravishda ikki guruhga bo’lish mumkin:

Og’zaki, ko’rgazmali va sensor-tahrirlovchi ta'sir ko’rsatadigan vosita hamda usullar.

Bularga quyidagilar kiradi:

a) suhbat, tushuntirish, hikoya, tasvirlash va b.;

b) o’rganilayotgan harakat texnikasini ko’rsatish;

v) plakatlar, chizmalar, kinogrammalar, videomagnitofon yozuvlari va h.k. namoyish etish;

g) predmetli va boshqa mo’ljallarni qo’llash;

d) tovush va yorug’lik;

e) har xil trenajyorlar, qayd etuvchi qurilmalar, tezkor axborot asboblari.

Sportchining qandaydir jismoniy mashqlarni bajarishiga asoslangan vosita va usullar.

Bu holda quyidagilar qo’llaniladi:

a) umumtayyorlovchi mashqlar. Ular tanlangan sport turi bo’yicha texnik mahoratni o’stirish uchun poydevor sanalgan xilma-xil ko’nikma va malakalarni o’zlashtirib olishga imkon beradi;

b) maxsus tayyorlovchi va musobaqa mashqlari. Ular o’z sport turi texnikasini egallashga yo’naltiriladi;

v) yaxlit va taqsimlangan mashq usullari. Ular yaxlit harakat faoliyati yoki uning alohida qismlari, bosqichlari, elementlari texnikasini egallash, tugatish, mustahkamlash hamda takomillashtirishga yo’naltirilgan;

g) harakatlar texnikasini takomillashtirish va barqarorlashtirishga yordam beradigan bir me'yorli, o’zgaruvchan, takroriy, oraliqli, o’yin, musobaqalashuv usullari va b.

Yuqoridagi vosita va usullarning qo’llanishi tanlangan sport turi texnikasiga xos xususiyatlar, sportchilarning yoshi va malakasi, mashg’ulotning yillik hamda ko’p yillik sikllarida texnik tayyorgarlikning bosqichlariga bog’liq.
1.3. Mashg’ulotning ko’p yillik va yillik sikllarida texnik

tayyorgarlikning bosqichlari va mazmuni
Texnik tayyorgarlik jarayoni sportchining butun ko’p yillik mashg’ulotlari davomida amalga oshiriladi.

Sportchining ko’p yillik texnik tayyorgarligi jarayonini 3 bosqichga bo’lish mumkin:

1. Bazaviy texnik tayyorgarlik bosqichi.

2. Chuqur texnik takomillashuv va yuksak sport-texnik mahoratga erishish bosqichi.

3. Sport-texnik mahoratni saqlab qolish bosqichi.

Har bir bosqich yillik sikllardan iborat bo’lgan pog’onalarni o’z ichiga oladi. Masalan, birinchi bosqich, odatda, 4-6 yillik sikldan, ikkinchisi – 6-8 yillik, uchinchisi – 4-6 yillik sikllardan iborat bo’ladi.

Shuning uchun sportchining har bir bosqichdagi texnik tayyorgarligining muayyan mazmuni va usuliyati, odatda, yillik mashg’ulot sikli davrlashtirilishiga bo’ysunadi. Ko’pincha bu yuqori malakali sportchilar tayyorgarligida yaqqol ko’zga tashlanadi. Gap shundaki, boshlovchi sportchilarda yillik siklni alohida tayyorgarlik, musobaqa va o’yin davrlariga taqsimlamaydilar. Ularda butun yil davomida mashg’ulotlar tayyorgarlik xususiyatlariga ega bo’ladi.

Bundan kelib chiqadiki, malakali sportchilarda yillik mashg’ulot sikli doirasida harakatlar texnikasini egallash va takomillashtirish jarayoni ko’p jihatdan sport formasini egallash, saqlab qolish hamda yana ham rivojlantirish qonuniyatlariga bog’liq bo’ladi.

Shunga ko’ra yillik siklda texnik tayyorgarlikning 3 bosqichi ajratiladi: 1) izlanish; 2) barqarorlik; 3) moslashib takomillashish.

1-bosqichdagi texnik tayyorgarlik musobaqa faoliyatlari yangi texnikasini (yoki uning yakunlangan variantini) shakllantirishga, uni amaliy o’zlashtirish, musobaqa faoliyati tarkibiga kiruvchi alohida harakatlarni o’rganish (yoki qayta o’rganish) asoslarini yaxshilashga yo’naltiriladi. Bu bosqich tayyorgarlik davrining birinchi yarmiga to’g’ri keladi. 2-bosqichda texnik tayyorgarlik musobaqa faoliyatlarining yaxlit ko’nikmalarini chuqur o’zlashtirish va mustahkamlashga yo’naltiriladi. U tayyorgarlik davri ikkinchi yarmining anchagina qismini qamrab oladi. 3-bosqichda texnik tayyorgarlik shakllantirilgan ko’nikmalarni takomillashtirishga, asosiy musobaqalar sharoitiga mos holda ularning maqsadga muvofiq servariantligi (o’zgaruvchanligi), barqarorligi (turg’unligi), ishonchliligi diapazonini oshirishga yo’naltiriladi. Bu bosqich, odatda, tayyorgarlik davrining yakunlovchi qismidan boshlanib, butun musobaqa davrini qamrab oladi. Texnik mahoratni takomillashtirish vaqtida texnik tayyorgarlikning har bir bosqichi oldidagi asosiy vazifalar quyidagilardir:

1) tanlangan sport turidagi texnik priyomlarning asosini tashkil etuvchi harakat ko’nikmalarining yuksak barqarorligiga, oqilona variativligiga erishish, musobaqa sharoitida ularning samaradorligini oshirish;

2) zamonaviy ilm-fan yutuqlari va sport amaliyoti talablari nuqtai nazaridan harakat ko’nikmalarini qisman qayta qurish, ko’nikmaning alohida qismlari kinematikasi yoki dinamikasini takomillashtirish.

Birinchi vazifani hal etish uchun, odatda, tashqi shart-sharoitni murakkablashtirish usuli, organizmning turli holatlarida mashq qilish usuli qo’llaniladi; ikkinchisini amalga oshirish uchun texnik harakatlarni soddalashtirish usuli, birgalikda ta'sir ko’rsatish usulidan foydalaniladi.

Texnik priyomlarni bajarishda tashqi shart-sharoitni murakkablashtirish usuli qator usuliy priyomlarda amalga oshiriladi:

1. Shartli raqibning qarshilik ko’rsatish usuliy priyomi asosan sport o’yinlari va yakkakurashlarda qo’llaniladi. Shartli raqib bilan kurashish elementlari sportchiga texnik priyomning bajarilish ritmi va tuzilishini takomillashtirish, barqarorlik va samaradorlikka tezroq erishish imkonini beradi. Shuningdek, u mashg’ulotda yuklama zichligini oshirishga yordam beradi, o’z kuchiga bo’lgan ishonchni, ko’rqmaslik va qat'iyatni tarbiyalashda ta'sirchan psixologik omil hisoblanadi.

2. Murakkab dastlabki holatlar va tayyorgarlik harakatlari usuliy priyomi. Masalan, figurali uchishda bir yarim marta burilib sakrash (“aksel”) avval oddiy yugurib kelishdan, keyin esa “qayiqcha” holatidan takomillashtiriladi. Suvga sakrashda tramplinning balandligi kamaytiriladi. Futbolchilarga murakkab traektoriya bo’ylab uchib borayotgan to’pga oyoq hamda bosh bilan zarba berish taklif qilinadi va h.k.

3. Harakatlarni maksimal tezlik va aniqlik bilan bajarish usuliy priyomi. Masalan, boksda sportchiga muayyan vaqt oralig’ida – 1 raundda zarbalarning yuksak sur'atda bajarilishiga erishish imkoni beriladi. Uzunlikka sakrashda yugurib kelish bir oz qiya yo’lkachada bajariladi. Futbolda to’pni doimiy kuch bilan uzatishni bajarishda sheriklar orasidagi yaqinlashuvdan foydalaniladi va b.

4. Harakatlarni bajarish uchun maydonni (fazoni) cheklash usuliy priyomi ko’nikmani takomillashtirishda mo’ljal olish sharoitlarini murakkablashtirish imkonini beradi. Masalan, chang’i sportida murakkab trassaga yopiq burilishli qiyaliklar kiritiladi, bu muayyan radiusda burilishni tanlash vaqtini cheklab qo’yadi. Yugurish va sakrashlarda qadamlar avvaldan qo’yilgan belgilarga qarab bajariladi. Boksda kichraytirilgan ringdan foydalaniladi va h.k.

5. Harakatlarni noodatiy sharoitlarda bajarish usuliy priyomi mashg’ulot sharoitlarini o’zgartirishni (tabiiy sharoiti, asbob-anjomlar, jihozlar) nazarda tutadi, harakatlar texnikasining bir yoki bir necha xususiyatlarini makoniy, zamoniy, dinamik, ritmik va b. takomillashtirishga yordam beradi. Masalan, yengil atletikada yugurish yohud sakrashlarda zarb bilan yugurib kelish qattiq shamolga qarshi, nam tuproqda o’tkaziladi, chang’i poygalarida muzlagan trassa bo’ylab harakatlanishdan foydalaniladi.

Sportchi organizmining texnik harakatlarni bajarishni qiyinlashtiradigan holatlarida mashq o’tkazish usuli ham xilma-xil priyomlarda amalga oshiriladi.

1. Jiddiy charchoq holatida harakatlar bajarish usuliy priyomi. Bu vaziyatda sportchiga katta hajm va shiddatli jismoniy yuklamadan so’ng mashq bajarish taklif etiladi. Masalan, gimnastikada mashg’ulot oxirida sportchi texnik jihatdan eng murakkab kombinatsiyani bajaradi, chang’i poygalarida musobaqalardagidan ortiqroq masofa bosib o’tilganidan so’ng turlicha tuzulishli trassalarda texnika musobaqa tezligiga yaqin tezlik bilan takomillashtiriladi. Bu priyom markaziy asab tizimiga juda katta yuklama beradi, undan organizmning iroda imkoniyatlarini jamlashni talab etadi.

2. Jiddiy hissiy zo’riqish holatida harakatlarni bajarish usuliy priyomi texnikani o’stiruvchi mashqlarga nazorat, musobaqa va o’yin usullarini kiritish orqali amalga oshiriladi.

3. Ko’rib nazorat qilish imkonini vaqti-vaqti bilan cheklash yoki butunlay “o’chirib qo’yish” usuliy priyomi harakat ko’nikmasining retseptor-analizatorli tarkibiy qismlariga tanlab ta'sir ko’rsatishga yordam beradi. Natijada sportchida o’z harakatlarini kinestetik sezgilariga ko’ra sinchiklab baholash va nozik idrok etish qobiliyati ortadi. Masalan, ko’zlarni berkitib eshkak eshish qayiqning suzishini yaxshiroq his etish hamda “mushak sezgisi” ko’magida ko’nikmaning barqarorligini osonroq nazorat qilish uchun sharoit yaratadi.

4. Ishchi vaziyatni shakllantirish usuliy priyomi sportchini musobaqa sharoitida takomillashtirilgan texnik priyomni albatta bajarishga ruhan hozirlaydi, ko’nikmani takomillashtirish jarayonida uning faolligini oshiradi. Masalan, mashg’ulotdagi jang chog’ida qilichboz o’z diqqatini ko’proq himoya texnik priyomlari yoki, aksincha, hujum priyomlariga jamlash to’g’risida ko’rsatma oladi.

Texnik harakatlarni bajarish sharoitlarini soddalashtirish usuli bir qator usuliy priyomlarni o’z ichiga oladi. Quyida ularning ayrimlari berilgan.

1. Harakatning biror elementini bajarish usuliy priyomi. Masalan, boksda panjaning alohida e'tibor bilan zarba berish harakati, oyoq va tos bilan itarilish, gavda va yelka kamarini burab harakatlantirish va bu elementlarni birlashtirish. Suzishda qo’l va oyoqlar faoliyati alohida ajratiladi.

2. Mushak zo’riqishlarini pasaytirish usuliy priyomi sportchiga harakat ko’nikmasidagi alohida harakatlarni nozik tahrirlash, harakatlar koordinatsiyasini nazorat qilish (teskari aloqa mexanizmi bo’yicha) imkonini beradi, bu esa takomillashtirish jarayonini tezlashtiradi. Masalan, kurashda ancha yengil vaznli raqib tanlanadi, boksda sportchilar mashqlarni ancha yengil mashq qo’lqoplarida bajaradi.

3. Qo’shimcha mo’ljallar va tezkor axborot usuliy priyomi zarur harakatlar amplitudasi, sur'ati, ritmini juda tez o’zlashtirib olishga yordam beradi, bajarilayotgan faoliyatni anglash jarayonini tezlashtiradi. Masalan, figurali uchishda muzga shaklning bo’y o’qi chizib qo’yiladi va mo’ljal – bayroqlar o’rnatiladi. Nayza uloqtiruvchi uchun u zarb bilan yugurib keladigan to’g’ri chiziq tortiladi.

Birgalikda ta'sir ko’rsatish usuli sport mashg’ulotlarida asosan ikki priyom yordamida amalga oshiriladi.

1. Ixtisoslashtirilgan dinamik mashqlar usuliy priyomi jismoniy qobiliyatlar o’zaro rivojlantirish va harakat ko’nikmalarini takomillashtirishga asoslangan. Bunga maxsus mashqlarni tanlab olish yo’li bilan erishiladi. Masalan, suzishda eshish harakatlarini bajarish vaqtida qo’shimcha qarshilikni yuzaga keltirish uchun oyoqlarga last va qo’llarga kuraklar kiyishdan foydalaniladi. Yengil atlektikada sakrash mashqlari, uzoqlikka va balandlikka sakrash og’irlashtirilgan belbog’ bilan bajariladi. Suv polosida uzatish va tashlashlar og’irlashtirilgan to’plar bilan amalga oshiriladi.

2. Ixtisoslashtirilgan izometrik mashqlar usuliy priyomi izometrik mashqlardan texnik priyom uchun xos bo’lgan muayyan bo’g’im burchaklarida foydalanishni ko’zda tutadi. Masalan, og’ir atletikada sportchi izometrik zo’riqishlarni oyoqlarni 90˚ dan kichikroq burchak ostida bukib, chuqur cho’nqaygan holatda bajaradi.

Sportchi texnik tayyorgarligining mazmuni va shakllariga uning dastlabki tayyorgarligi darajasi, tanlangan sport turining xususiyatlari, yillik siklning tuzulishi va boshqa omillar ta'sir ko’rsatadi. Shuning uchun sport amaliyotida uni turli variantlarda qurish mumkin.

2. Jismoniy tayyorgarlik

2.1. Sportchining jismoniy tayyorgarligi tushunchasi.

Uning zamonaviy sportdagi ahamiyati
Sportchining jismoniy tayyorgarligi uning salomatligini mustahkamlash va saqlab qolishga, tana tuzilishini shakllantirishga, organizmning funktsional imkoniyatlarini oshirishga, kuch, tezlik, koordinatsiya, chidamlilik hamda egiluvchanlik kabi jismoniy qobiliyatlarni rivojlantirishga yo’naltiriladi.

Zamonaviy sport sportchilarning jismoniy tayyorgarligiga yuksak talablar qo’yadi. Bu quyidagi omillar bilan izohlanadi:

1. Sportdagi yutuqlarning o’sishi har doim sportchining jismoniy qobiliyatlari rivoji yangi darajalarga ko’tarilishini talab etadi. Masalan, yadroni 20 m dan uzoqroqqa itqitish uchun faqatgina mukammal texnika emas, yuqori darajada rivojlangan kuch va tezkorlik zarur. Hisob-kitoblarning ko’rsatishicha, yadroning parvozini 1 m ga uzaytirish uchun itarish quvvatini 5-7% ga oshirish zarur bo’ladi.

2. Jismoniy tayyorgarlikning yuqori darajasi – mashg’ulot va musobaqa yuklamalarini oshirishning muhim shartlaridan biri. So’nggi 20-25 yil mobaynida dunyodagi eng kuchli sportchilarning yillik siklidagi yuklama ko’rsatkichlari 3-4 barobar o’sdi. Shuning natijasida miokardning o’ta zo’riqishi surunkali tus olgan sportchilarning soni ham keskin ortdi. Bu kasallik ko’pincha jismoniy rivojlanishida, alohida organ va tizimlari faoliyatida nuqsonlari bo’lgan sportchilarda uchraydi.

Jismoniy tayyorgarlik har qanday yosh, malaka va sport turiga ega bo’lgan sportchi uchun zarur. Biroq sportchilarning jismoniy tayyorgarligi – alohida sifatlarining rivojlanish darajasiga, funktsional imkoniyatlari hamda tana tuzilishiga har bir sport turi o’ziga xos talablar qo’yadi. Shu sababdan ham u yoki bu sport turida, har xil yosh va malakali sportchilarning jismoniy tayyorgarligi mazmuni hamda usuliyatida muayyan tafovutlar bo’lishi tabiiy.

3-jadvalda ayrim sport turlaridagi jismoniy tayyorgarlikning alohida tarkibiy qismlari ahamiyati ko’rsatilgan.

2.2. Jismoniy tayyorgarlikning turlari, vazifa hamda vositalari

Umumiy jismoniy tayyorgarlik (UJT) va maxsus jismoniy tayyorgarlik (MJT) farqlanadi.

UJT tanlangan sport turiga xos bo’lmagan, lekin har holda sport faoliyati muvaffaqiyatini belgilaydigan jismoniy qobiliyatlarning har tomonlama rivojlanish jarayoni sanaladi.

UJT ning vazifalari:

1. Organizmning funktsional imkoniyatlari umumiy darajasini oshirish va qo’llab-quvvatlash.

2. Barcha asosiy jismoniy sifatlar – kuch, tezkorlik, chidamlilik, chaqqonlik va egiluvchanlikni rivojlantirish.

3. Jismoniy rivojlanishdagi kamchiliklarni bartaraf etish.

Kishining o’zi shug’ullanadigan va boshqa sport turlaridan olingan mashqlar UJT vositalari hisoblanadi. Shuningdek, chaqqonlik va egiluvchanlikni rivojlantiradigan mashqlarga katta o’rin ajratiladi. Umumiy chidamlilikni rivojlantiruvchi mashqlarning hissasi kamroq bo’ladi. Uzoq masofalarga yuguruvchilarda, aksincha, umumiy chidamlilikni rivojlantiradigan mashqlar alohida ahamiyatga ega. UJT jarayonida ularga katta o’rin ajratiladi. Kuch mashqlari uncha katta bo’lmagan og’irliklar bilan, lekin ko’p takrorlab bajariladi.

MJT tanlangan sport turi xususiyatlariga muvofiq bo’lgan jismoniy qobiliyatlarni rivojlantirishga yo’naltiriladi. Bunda u mazkur qobiliyatlarni imkon darajasida maksimal rivojlantirishga qaratilgan bo’ladi.

MJT ning vazifalari:

1. Muayyan sport turi uchun zarur bo’lgan jismoniy qobiliyatlarni rivojlantirish.

2. Tanlangan sport turidagi muvaffaqiyatlarni belgilovchi organ va tizimlarning funktsional imkoniyatlarini oshirish.

3. Musobaqa faoliyatining o’ziga xos sharoitlarida mavjud yashirin funktsional imkoniyatlarini yuzaga chiqarish qobiliyatlarini tarbiyalash. Masalan, suzuvchilarga laboratoriya sharoitida standart yuklama berilganda maksimal kislorod iste'moli (MKI) o’rtacha 70 ml/kg/daq. ni tashkil etadi. Musobaqa tezligida suzganda esa 46 ml/kg/daq., ya'ni MKI – bor-yo’g’i 65% qismiga teng bo’ladi.

4. Muayyan sport fani talablarini hisobga olgan holda sportchilarning tana tuzilishini shakllantirish. Masalan, har xil masofalarga ixtisoslashgan yengil atletikachilarda tana tuzilishi ko’rsatkichlari (bo’y, vazn, tuzilish va h.k.), odatda, bir-biridan farq qiladi. Shuning uchun ham MJT jarayonida tananing tanlangan sport turidagi yutuqlarni belgilaydigan hamda sport mashg’ulotlarining vosita va usullari yordamida maqsadli ravishda o’zgartirish mumkin bo’lgan tarkibiy qismlariga yo’naltirib ta'sir ko’rsatish zarur.

1-jadval

Har xil sport turlarida sportchilar jismoniy tayyorgarligi alohida

ko’rsatkichlarining ahamiyati

Sport turi	Ko’rsatkichlar
	yetakchi	qo’shimcha	ikkinchi darajali
akrobatika, gimnastika, suvga sakrash, figurali uchish	koordinatsiya va kuch qobiliyatlari, egiluvchanlik, tana tuzilishi, qomat, tananing solishtirma og’irligi	tezlik qobiliyatlari	chidamlilik
qilichbozlik, boks, kurash	tezlik va koordinatsiya qobiliyatlari	kuch qobiliyatlari, tana tuzilishi, chidamlilik	egiluvchanlik, chidamlilik
basketbol, voleybol, gandbol	tananing baland uzunligi, koordinatsiya, tezlik-kuch va tezlik qobiliyatlari	chidamlilik	egiluvchanlik, kuch qobiliyatlarining o’zi
yengil atletika (sprint, sakrashlar, bar’yerlar osha yugurish)	tezlik, tezlik-kuch va koordinatsiya qobiliyatlari, egiluvchanlik, oyoq kafti gumbazlarining holati	kuch qobiliyatlarining o’zi	chidamlilik
yengil atletika (o’rta va uzoq masofalarga yugurish), chang’i poygalari	chidamlilik, yurak hajmi va o’lchamlari, yurakning zarba vaqtidagi va bir daqiqalik hajmi kattaligi	koordinatsion kuch qobiliyatlarining o’zi, tezlik qobiliyatlari	egiluvchanlik
futbol	tezlik va koordinatsiya qobiliyatlari, chidamlilik	kuch qobiliyatlarining o’zi	egiluvchanlik

Sportchining MJT asosiy vositalari musobaqa mashqlari hamda maxsus tayyorlov mashqlari sanaladi.

Sportchining mashg’ulotida UJT va MJT vositalarining nisbati hal etiladigan vositalar, sportchining yoshi, malakasi va alohida xususiyatlariga, sport turi va mashg’ulot jarayoni davrlari kabilarga bog’liq.

Sportchining ko’p yillik tayyorgarligi jarayonida UJT va MJT vositalarining nisbati quyidagi ko’rinishga ega bo’lishi mumkin (3-rasm).

Rasmda ko’rinib turibdiki, sportchining malakasi oshgani sayin MJT vositalari hissasi ortib, UJT vositalari hajmi muvofiq ravishda kamayib boradi. Mashg’ulot yilining davri hamda tuzilishiga qarab, UJT va MJT vositalari nisbati o’zgarishi 2-jadvalda keltirilgan.

3-rasm. Sportchilarning ko’p yillik mashg’ulotlari jarayonida umumiy va maxsus jismoniy tayyorgarlik vositalarining taxminiy nisbati

2-jadval

Yuqori malakali sportchilarning yillik mashg’ulot siklida UJT va MJT

vositalarining taxminiy nisbati

(S.M.Vaytsexovskiy bo’yicha)

Jismoniy tayyorgarlik vositalari	Yillik siklni davrlashtirish
	Birinchi sikl		Ikkinchi sikl
	Tayyorgarlik davri	Musobaqa davri	Tayyorgarlik davri	Musobaqa davri
UJT mashqlari	70	20	55	15
MJT mashqlari	30	80	45	85