Okoz: 07. 00. 00. 00 Moliya va kredit to‘g‘risidagi qonunchilik. Bank faoliyati / 07. 29. 00. 00 Buxgalteriya hisobi. Moliyaviy hisobot / 07. 29. 05. 00 Moliyaviy hisobot] [tsz



[OKOZ:

1.07.00.00.00 Moliya va kredit to‘g‘risidagi qonunchilik. Bank faoliyati / 07.29.00.00 Buxgalteriya hisobi. Moliyaviy hisobot / 07.29.05.00 Moliyaviy hisobot]

[TSZ:

1.Moliya / Buxgalteriya hisobi]

O‘zbekiston Respublikasi Prezidentining

qarori

Moliyaviy hisobotning xalqaro standartlariga o‘tish bo‘yicha qo‘shimcha chora-tadbirlar to‘g‘risida

Moliyaviy hisobotning xalqaro standartlariga (keyingi o‘rinlarda — MHXS) o‘tishni jadallashtirish orqali xorijiy investorlarni zarur axborot muhiti bilan ta’minlash va xalqaro moliya bozorlariga kirish imkoniyatlarini kengaytirish, shuningdek, hisob va audit sohalari mutaxassislarini xalqaro standartlar bo‘yicha tayyorlash tizimini takomillashtirish maqsadida:

1. Belgilansinki, aksiyadorlik jamiyatlari, tijorat banklari, sug‘urta tashkilotlari va yirik soliq to‘lovchilar toifasiga kiritilgan yuridik shaxslar:

2021-yil 1-yanvardan boshlab, MHXS asosida buxgalteriya hisobi yuritilishini tashkil etadi va 2021-yil yakunlaridan boshlab moliyaviy hisobotni MHXS asosida tayyorlaydi, qonun hujjatlarida MHXSga o‘tishning ertaroq muddatlari nazarda tutilgan yuridik shaxslar bundan mustasno;

[OKOZ:

1.07.00.00.00 Moliya va kredit to‘g‘risidagi qonunchilik. Bank faoliyati / 07.29.00.00 Buxgalteriya hisobi. Moliyaviy hisobot / 07.29.01.00 Umumiy qoidalar]

2021-yil yakuniga qadar buxgaltyerlarni xalqaro sertifikatlash doirasida “MHXS bo‘yicha moliyaviy hisobot” fanini muvaffaqiyatli topshirganligi to‘g‘risida hujjatga yoxud “Sertifikatlangan xalqaro professional buxgalter (CIPA)”, “Sertifikatlangan diplomli buxgalter (ASSA)”, “Sertifikatlangan jamoatchi buxgalter (SRA)” va “Xalqaro moliyaviy hisobot bo‘yicha diplom (DipIFR)” sertifikatlaridan (keyingi o‘rinlarda — xalqaro buxgalter sertifikati) biriga ega kamida uch nafar mutaxassis miqdorida MHXSni sifatli qo‘llash uchun yetarli bo‘lgan buxgalteriya xizmati xodimlari bilan ta’minlaydi.

O‘zbekiston Respublikasi Davlat aktivlarini boshqarish agentligi 2020-yildan boshlab, ushbu bandda ko‘rsatilmagan davlat ulushi bo‘lgan xo‘jalik jamiyatlari va davlat korxonalarining MHXS asosida buxgalteriya hisobini yuritish va moliyaviy hisobotni tayyorlashga o‘tish jadvali har yili tasdiqlanishi va 1-iyunga qadar rasmiy veb-saytida e’lon qilinishini ta’minlasin.

2. Shunday tartib o‘rnatilsinki, unga muvofiq moliyaviy hisobotni ixtiyoriy ravishda MHXSga muvofiq tayyorlaydigan tadbirkorlik subyektlari buxgalteriya hisobining milliy standartlari bo‘yicha moliyaviy hisobot taqdim etishdan ozod etiladi.

3. O‘zbekiston Respublikasi Moliya vazirligi MHXSni joriy etish bo‘yicha vakolatli organ etib belgilansin va unga quyidagi funksiyalar yuklansin:

O‘zbekiston Respublikasi Davlat soliq qo‘mitasi, Kapital bozorini rivojlantirish agentligi, Davlat aktivlarini boshqarish agentligi bilan birgalikda MHXSning joriy etilishini, shu jumladan tadbirkorlik subyektlari tomonidan moliyaviy hisobotlar MHXS asosida o‘z vaqtida e’lon qilinishini monitoring qilish;

[OKOZ:

1.09.00.00.00 Tadbirkorlik va xo‘jalik faoliyati / 09.04.00.00 Auditorlik faoliyati / 09.04.02.00 Auditorlik faoliyatini litsenziyalash. Auditorning malaka sertifikati]

MHXS sohasida mutaxassislarni tayyorlash bo‘yicha jahonning muvaffaqiyatli tajribalarini ommalashtirish, shu jumladan buxgalteriya hisobi va audit sohasida qayta tayyorlash va malaka oshirish bo‘yicha nodavlat ta’lim tashkilotlarini (keyingi o‘rinlarda — akkreditatsiyadan o‘tgan o‘quv markazlari) hamda sohaga oid oliy ta’lim muassasalarining o‘quv dasturlarini bosqichma-bosqich xalqaro akkreditatsiyadan o‘tkazish yuzasidan buxgalteriya hisobi sohasidagi xalqaro tashkilotlar (Sertifikatlangan diplomli buxgaltyerlar xalqaro assotsiatsiyasi (Association of Chartered Certified Accountants — ASSA) va boshqalar) bilan o‘zaro hamkorlikni kengaytirish;

rivojlangan davlatlarning ilg‘or tajribasi asosida o‘quv jarayonining sifatini, imtihonlarni o‘tkazish va natijalarini baholashning shaffofligini ta’minlovchi MHXS bo‘yicha sertifikatlashning samarali tizimini joriy etish, shuningdek, MHXS sohasida talab yuqori bo‘lgan mutaxassislarni akkreditatsiyadan o‘tgan o‘quv markazlarida o‘qitish bo‘yicha tashkiliy tadbirlarni amalga oshirishda har tomonlama ko‘maklashish;

buxgalteriya hisobining milliy standartlarini MHXSga muvofiq uyg‘unlashtirish.

O‘zbekiston Respublikasi Moliya vazirligining Buxgalteriya hisobi va audit uslubiyoti boshqarmasi tuzilmasida vazirlikning boshqaruv xodimlari cheklangan soni doirasida uchta shtat birligidan iborat moliyaviy hisobotning xalqaro standartlarini joriy etishni muvofiqlashtirish va e’lon qilinadigan moliyaviy hisobotlar sifatining tashqi nazorati bo‘limi tashkil etilsin.

4. Ilg‘or xalqaro tajribani hisobga olgan holda moliyaviy hisobotning xalqaro standartlarini va mazkur sohada kadrlar tayyorlashning zamonaviy usullarini bosqichma-bosqich joriy etish bo‘yicha “yo‘l xaritasi” 1-ilovaga muvofiq tasdiqlansin.

5. O‘zbekiston Respublikasi Moliya vazirligi:

a) buxgaltyerlar va auditorlar respublika jamoat birlashmalari bilan birgalikda, buxgalteriya hisobi sohasidagi xalqaro tashkilotlarni jalb qilgan holda, Vazirlar Mahkamasiga quyidagilarni kiritsin:

2020-yil 1-iyunga qadar Moliyaviy hisobotning xalqaro standartlari va ularga tushuntirishlar matnini tan olish tartibi to‘g‘risidagi nizom;

2021-yil 31-yanvarga qadar MHXSni joriy etishning ustuvor yo‘nalishlaridan kelib chiqqan holda va MHXS bo‘yicha mavjud kadrlar salohiyatini o‘rganish natijalariga ko‘ra tayyorlangan buxgaltyerlarni sertifikatlash milliy tizimini joriy etishning maqsadga muvofiqligi yuzasidan tahliliy ma’lumotnoma;

b) manfaatdor vazirlik va idoralar bilan birgalikda O‘zbekiston Respublikasi Moliya vazirligi, Davlat soliq qo‘mitasi, Davlat aktivlarini boshqarish agentligi, Kapital bozorini rivojlantirish agentligi va boshqa manfaatdor davlat organlari xodimlarini (keyingi o‘rinlarda — davlat organlarining xodimlari) akkreditatsiyadan o‘tgan o‘quv markazlarida MHXS bo‘yicha o‘qitish jadvali har yili tasdiqlanishini ta’minlasin;

[OKOZ:

1.13.00.00.00 Ta’lim. Fan. Madaniyat / 13.01.00.00 Ta’lim / 13.01.11.00 Oliy ta’lim (bakalavriat va magistratura)]

v) Oliy va o‘rta maxsus ta’lim vazirligi bilan birgalikda:

Toshkent davlat iqtisodiyot universiteti, Toshkent moliya instituti, Samarqand iqtisodiyot va servis instituti, Farg‘ona politexnika institutining (keyingi o‘rinlarda – tajriba-sinov oliy ta’lim muassasalari) “Buxgalteriya hisobi” va “Audit” fanlari bo‘yicha pedagog xodimlarini akkreditatsiyadan o‘tgan o‘quv markazlarida MHXS bo‘yicha tezlashtirilgan tarzda o‘qitish jadvalini tasdiqlasin;

2020-yil 31-dekabrga qadar buxgalteriya hisobi va audit sohasidagi mutaxassislarni tayyorlash bo‘yicha xalqaro tajribani o‘rganish natijalari asosida “Buxgalteriya hisobi va audit” bakalavriat ta’lim yo‘nalishida o‘qitishning kunduzgi shakli muddatini qisqartirish imkoniyati to‘g‘risida Vazirlar Mahkamasiga taklif kiritsin.

[OKOZ:

1.13.00.00.00 Ta’lim. Fan. Madaniyat / 13.01.00.00 Ta’lim / 13.01.26.00 Darsliklar, o‘quv qo‘llanmalar va o‘quv qurollari]

6. O‘zbekiston Respublikasi Oliy va o‘rta maxsus ta’lim vazirligi:

2020-yil 1-avgustga qadar bakalavriat ta’limi yo‘nalishlari va magistratura mutaxassisligidagi “Buxgalteriya hisobi” va “Audit” fanlari bo‘yicha MHXSni chuqur o‘rganishni nazarda tutuvchi yangilangan o‘quv dasturlarini tasdiqlasin va belgilangan tartibda ta’lim jarayoniga joriy etsin;

2020-yildan boshlab tajriba-sinov oliy ta’lim muassasalarining o‘quv dasturlarini buxgalteriya hisobi sohasidagi xalqaro akkreditatsiyadan o‘tkazish va keyinchalik mazkur tajriba-sinov loyihasini bosqichma-bosqich respublikadagi sohaga oid boshqa oliy ta’lim muassasalarida joriy etish choralarini ko‘rsin;

2021-yil 1-yanvarga qadar “Buxgalteriya hisobi” va “Audit” fanlari bo‘yicha pedagog kadrlarning akkreditatsiyadan o‘tgan o‘quv markazlarida MHXS bo‘yicha o‘qitilishini ta’minlasin, shuningdek, oliy ta’lim muassasalarining buxgaltyerlarni xalqaro sertifikatlash doirasida akkreditatsiyadan o‘tgan o‘quv markazlarida tahsil olgan pedagog kadrlari to‘g‘risidagi ma’lumotlar bazasini rasmiy veb-saytida e’lon qilsin va doimiy ravishda ularni yangilab borsin.

7. Belgilansinki:

2021-yildan boshlab, MHXS va auditning xalqaro standartlari (keyingi o‘rinlarda — AXS) bo‘yicha o‘qitish faqat buxgalteriya hisobi sohasidagi xalqaro tashkilotning akkreditatsiyasidan o‘tgan o‘quv markazlari tomonidan amalga oshiriladi. Akkreditatsiyadan o‘tgan o‘quv markazlari litsenziyalanadigan faoliyat turlarini amalga oshirish bo‘yicha qonunchilikda nazarda tutilgan talablarga rioya qilish sharti bilan, tegishli litsenziya olmasdan MHXS va AXS bo‘yicha o‘qitish va malaka oshirish yuzasidan litsenziyalangan faoliyat turlarini amalga oshirish huquqiga egadir;

2021/2022 o‘quv yilidan boshlab, tajriba-sinov oliy ta’lim muassasalarida buxgalteriya hisobi va audit bo‘yicha fanlar faqat xalqaro sertifikatlash doirasida “MHXS bo‘yicha moliyaviy hisobot” yoki “AXS bo‘yicha audit” fanini muvaffaqiyatli topshirganligi to‘g‘risida hujjatga yoxud xalqaro buxgalter sertifikatiga ega bo‘lgan o‘qituvchilar tomonidan o‘qitiladi;

xalqaro buxgalter sertifikatiga ega bo‘lgan talabgorlar oliy ta’lim muassasalari magistraturasining “Buxgalteriya hisobi” va “Audit” mutaxassisliklariga kirish imtihonlarini topshirmasdan to‘lov-kontrakt asosida kirish huquqiga ega.

8. O‘zbekiston Respublikasi Davlat soliq qo‘mitasi Moliya vazirligi bilan birgalikda 2020-yil 1-oktabrga qadar soliq hisoboti shaklini qayta ko‘rib chiqsin va uning MHXS bo‘yicha tayyorlangan moliyaviy hisobotga moslashtirilgan shaklini ishlab chiqsin.

9. Belgilansinki, 2020 — 2025-yillar davomida akkreditatsiyadan o‘tgan o‘quv markazlarida MHXS bo‘yicha o‘qitish, malaka oshirish, interfaol usullarni qo‘llagan holda o‘qitish, shuningdek, buxgaltyerlarni xalqaro sertifikatlash doirasida O‘zbekiston Respublikasida dastlabki ro‘yxatdan o‘tkazish va imtihon topshirish uchun ro‘yxatdan o‘tkazish xarajatlari O‘zbekiston Respublikasining respublika budjeti va qonun hujjatlarida taqiqlanmagan boshqa manbalar hisobidan qoplanadi va quyidagi tartibda amalga oshiriladi:

a) oliy ta’lim muassasalarining buyurtmanomalariga asosan:

oliy ta’lim muassasalarining “Buxgalteriya hisobi” va “Audit” fanlari bo‘yicha pedagog kadrlari imtihon topshirishi uchun birinchi marta — to‘liq hajmda, ikkinchi marta — imtihon topshirish uchun ro‘yxatdan o‘tish summasining 50 foizi miqdorida qoplanadi;

oliy ta’lim muassasalarining talabalari va bitiruvchilari (o‘qishni tugatgandan so‘ng olti oy ichida) imtihonni muvaffaqiyatli topshirgan taqdirda, birinchi marta — to‘liq hajmda, ikkinchi marta — imtihon topshirish uchun ro‘yxatdan o‘tish summasining 50 foizi miqdorida qoplanadi;

b) davlat organlarining buyurtmanomalariga asosan o‘z xodimlari imtihon topshirishi uchun birinchi marta — to‘liq hajmda, ikkinchi marta — imtihon topshirish uchun ro‘yxatdan o‘tish summasining 50 foizi miqdorida qoplanadi.

10. O‘zbekiston Respublikasi Moliya vazirligi:

moliyaviy hisobotning yagona standartlarini ishlab chiqadigan va tasdiqlaydigan mustaqil xalqaro tashkilot hisoblangan Moliyaviy hisobotning xalqaro standartlari fondi (keyingi o‘rinlarda — MHXS fondi) bilan bitim tuzsin;

2020-yilda MHXS va unga tushuntirishlar matnini davlat tiliga tarjima qilish, boshqa tillarda MHXSni qo‘llash bilan bog‘liq hamda MHXS fondi yillik badallar to‘lash xarajatlarini O‘zbekiston Respublikasining respublika budjeti qo‘shimcha daromadlari hisobidan qoplasin, 2021-yildan boshlab esa zarur mablag‘lar ajratilishini O‘zbekiston Respublikasining respublika budjetida nazarda tutsin;

ikki oy muddatda manfaatdor vazirlik va idoralar bilan birgalikda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

11. O‘zbekiston Respublikasi Prezidentining 2018-yil 19-sentabrdagi “O‘zbekiston Respublikasida auditorlik faoliyatini yanada rivojlantirish chora-tadbirlari to‘g‘risida”gi PQ-3946-son qarorining 5-bandiga 2-ilovaga muvofiq o‘zgartirishlar kiritilsin.

12. Mazkur qaror ijrosini tashkil qilishning quyidagi tartibi o‘rnatilsin:

O‘zbekiston Respublikasi Bosh vazirining o‘rinbosari J.A. Qo‘chqorov — mazkur qarorning o‘z vaqtida, sifatli va to‘liq bajarilishini ta’minlasin, belgilangan tadbirlarni bajarishga mas’ul bo‘lgan vazirlik, idora va tashkilotlar faoliyatini samarali muvofiqlashtirsin, har chorakda ular rahbarlarining bajarilgan ishlar to‘g‘risidagi hisobotlarini eshitsin hamda aniqlangan kamchiliklarni o‘z vaqtida bartaraf etish bo‘yicha choralar ko‘rsin;

O‘zbekiston Respublikasi moliya vaziri — MHXS joriy qilinishi monitoringini ta’minlasin, buxgalteriya hisobi milliy standartlarini MHXS bilan uyg‘unlashtirish, buxgalteriya hisobi sohasida xalqaro tashkilotlar bilan hamkorlikni kengaytirish va tajribali hamda yuqori malakali mutaxassislarni MHXSni joriy qilish jarayoniga jalb etish bo‘yicha choralar ko‘rsin;

O‘zbekiston Respublikasi oliy va o‘rta maxsus ta’lim vaziri I.U. Majidov — ta’lim jarayonlariga MHXSni chuqur o‘qitishni muvaffaqiyatli va samarali joriy etish, pedagog kadrlarni MHXS bo‘yicha sertifikatlash va oliy ta’lim muassasalari o‘quv dasturlarini akkreditatsiyalash yuzasidan barcha zarur choralarni ko‘rsin, shuningdek, mazkur qaror bilan belgilangan vazifalar ijrosini ta’minlasin;

mas’ul vazirliklar, idoralar va tashkilotlar rahbarlari — mazkur qaror bilan tasdiqlangan “Yo‘l xaritasi”da nazarda tutilgan tadbirlarni o‘z vaqtida va sifatli amalga oshirsin;

O‘zbekiston Milliy axborot agentligi bosh direktori A.K. Ko‘chimov va O‘zbekiston Milliy teleradiokompaniyasi raisi vazifasini bajaruvchi A.D. Xadjayev — mazkur qarorning mazmun-mohiyati va amaliy ahamiyatini yoritishga oid maqolalar, brifinglar, matbuot anjumanlari, mavzuga oid teleko‘rsatuvlar tashkil etsin.

O‘zbekiston Respublikasi Prezidenti Sh. MIRZIYOYEV

Toshkent sh.,

2020-yil 24-fevral,

PQ-4611-son

O‘zbekiston Respublikasi Prezidentining 2020-yil 24-fevraldagi PQ-4611-son qaroriga

1-ILOVA

[OKOZ:

1.07.00.00.00 Moliya va kredit to‘g‘risidagi qonunchilik. Bank faoliyati / 07.29.00.00 Buxgalteriya hisobi. Moliyaviy hisobot / 07.29.01.00 Umumiy qoidalar]

Ilg‘or xalqaro tajribani hisobga olgan holda moliyaviy hisobotning xalqaro standartlarini va mazkur sohada kadrlar tayyorlashning zamonaviy usullarini bosqichma-bosqich joriy etish bo‘yicha

“YO‘L XARITASI”

T/r	Tadbirlar nomi	Amalga oshirish mexanizmi	Ijro muddati	Mas’ul ijrochilar
I.MHXSni joriy etish jarayonini tizimlashtirish va uning natijadorligini oshirish
1.	MHXS va unga tushuntirishlar matnlarini davlat tiliga tarjima qilish.	1. Moliyaviy hisobotning xalqaro standartlari va ularga tushuntirishlar matnini tan olish tartibi to‘g‘risidagi nizomni ishlab chiqish hamda Vazirlar Mahkamasiga tasdiqlash uchun kiritish.	2020-yil 1-iyun	Moliya vazirligi (D. Sultanov),
		2. MHXS hujjatlarini davlat tilida talab qilish huquqlaridan voz kechish bo‘yicha MHXS fondi bilan kelishuv tuzish.	2020-yil 1-iyul	buxgalter va auditorlarning respublika jamoat birlashmalari (M. Tulaxodjayeva, N. Karimov)
		3. MHXS va unga tushuntirishlar matnlarini davlat tiliga tarjima qilish, shuningdek, ularni Moliya vazirligining rasmiy veb-saytida joylashtirish.	kelishuvga muvofiq
		4. MHXSning har yili yangilanishini hisobga olgan holda, davlat tilidagi MHXS hujjatlarining dolzarbligini ta’minlash bo‘yicha choralar ko‘rish.	Doimiy ravishda
2.	Buxgalteriya hisobining milliy standartlarini MHXSga uyg‘unlashtirishni hisobga olgan holda ularni takomillashtirish.	1.Xalqaro ekspertlarni jalb qilgan holda buxgalteriya hisobining milliy standartlari va MHXS o‘rtasidagi muhim farqlanishlar bo‘yicha keng qamrovli axborotlar tayyorlash.	2020-yil 1-mart	Moliya vazirligi (D. Sultanov), buxgalter va auditorlarning respublika jamoat birlashmalari (M. Tulaxodjayeva, N. Karimov)
		2.Buxgalteriya hisobining yangi milliy standartlarini ishlab chiqish va amaldagi milliy standartlarga o‘zgartishlar kiritish.	Doimiy ravishda
3.	MHXSni joriy etishni hisobga olgan holda normativ-huquqiy hujjatlarni qayta ko‘rib chiqish.	1. Buxgalteriya hisobi to‘g‘risidagi qonun hujjatlari buzilganligi, jumladan: MHXSga muvofiq moliyaviy hisobotlarni o‘z vaqtida e’lon qilmaslik; MHXS bo‘yicha sertifikatga ega mutaxassislar soni eng kam miqdor talablariga muvofiq emasligi bo‘yicha ma’muriy javobgarlik choralarini kuchaytirish yuzasidan O‘zbekiston Respublikasi Vazirlar Mahkamasiga takliflar kiritish.	2020-yil 1-iyul	Moliya vazirligi (D. Sultanov), manfaatdor vazirlik va idoralar
		2. Soliq hisoboti shakllarini MHXS bo‘yicha tuzilgan moliyaviy hisobotlarga asosan qayta ko‘rib chiqish va unga moslashtirish.	2020-yil 1-oktabr	Davlat soliq qo‘mitasi (B. Musayev), Moliya vazirligi (D. Sultanov)
4.	Davlat ulushi ishtirokidagi xo‘jalik jamiyatlari va davlat korxonalarida buxgalteriya hisobini yuritish va moliyaviy hisobot tuzishni MHXS asosida amalga oshirishga o‘tish.	1. Davlat aktivlarini boshqarish agentligi veb-saytida davlat ulushi ishtirokidagi xo‘jalik jamiyatlari va davlat korxonalarida buxgalteriya hisobini yuritish va moliyaviy hisobot tuzishni MHXS asosida amalga oshirishga o‘tish grafigini e’lon qilish.	Har yili 1-iyungacha	Davlat aktivlarini boshqarish agentligi (S. Bekenov), Davlat ulushi ishtirokidagi xo‘jalik jamiyatlari va davlat korxonalari
		2. Davlat ulushi ishtirokidagi xo‘jalik jamiyatlari va davlat korxonalarida buxgalteriya hisobini yuritish va moliyaviy hisobotni tuzishni MHXS asosida amalga oshirishni tashkil etish.	Grafikka muvofiq
		3. Davlat ulushi ishtirokidagi xo‘jalik jamiyatlari va davlat korxonalarining MHXS asosida e’lon qilinadigan moliyaviy hisobotlari shaffofligi va sifatini oshirish bo‘yicha choralar ko‘rish, shuningdek, mazkur sohada amalga oshirilgan ishlar to‘g‘risida Moliya vazirligiga ma’lumot taqdim etish.	Har yili 1-aprelgacha
5.	Har yili aksiyadorlik jamiyatlarining e’lon qilinadigan moliyaviy hisoboti MHXSga muvofiqligi bo‘yicha sifat nazoratini amalga oshirish.	1. Aksiyadorlik jamiyatlarining moliyaviy hisoboti MHXS asosida e’lon qilinishini ta’minlash choralarini ko‘rish.	Har yili	Kapital bozorini rivojlantirish agentligi (O. Nazirov) aksiyadorlik jamiyatlari
		2. Aksiyadorlik jamiyatlarida MHXS joriy qilinganligi to‘g‘risida Moliya vazirligiga axborot taqdim etish.	Har yili 1-aprelgacha
6.	MHXSga bosqichma–bosqich o‘tish chora-tadbirlarini muvaffaqiyatli amalga oshirish uchun xalqaro moliya institutlarining texnik ko‘magini jalb etish masalasini ko‘rib chiqish.	1. Xalqaro moliya institutlariga milliy buxgalteriya hisobi tizimini diagnostikadan o‘tkazish va baholashga ko‘maklashish hamda MHXSni qo‘llash infratuzilmasini yaratish masalalari bo‘yicha quyidagilarni o‘z ichiga olgan so‘rovnoma yuborish: MHXSga o‘tish jarayonida tadbirkorlik subyektlarini uslubiy qo‘llab-quvvatlash; qimmatli qog‘ozlar bozori ishtirokchilari moliyaviy hisobotlarining axborot berish darajasini oshirish; davlat sektorida MHXS bo‘yicha kadrlar salohiyatini oshirish.	2020-yil mart	Moliya vazirligi (D. Sultanov)
		2. Yuqorida keltirilgan masalalar bo‘yicha ekspertlar bilan hamkorlik qilish va grant shartnomalari imzolashni muhokama qilish.
		3. Buxgaltyerlarni milliy sertifikatlash tizimini joriy qilish bo‘yicha takliflar kiritish.	2021-yil davomida
II. Buxgalteriya hisobi va audit ta’lim yo‘nalishlarida kadrlar tayyorlash tizimini takomillashtirish va oliy ta’lim sifatini oshirish bo‘yicha chora-tadbirlar
7.	Buxgaltyerlarni xalqaro sertifikatlash doirasida mutaxassislarni MHXS bo‘yicha o‘qitish chora-tadbirlarini ish beruvchilar hamda davlat tomonidan qo‘llab-quvvatlash.	1. Aksiyadorlik jamiyatlari, sug‘urta tashkilotlari va yirik soliq to‘lovchilar toifasiga kiruvchi yuridik shaxslarda xodimlarning MHXS bo‘yicha o‘qish va malaka oshirish xarajatlarini ish beruvchi tomonidan kafolatli qoplanishi mexanizmini joriy etish.	2020-yildan boshlab	Aksiyadorlik jamiyatlari, sug‘urta tashkilotlari va yirik soliq to‘lovchilar toifasiga kiruvchi yuridik shaxslar
		2. Aksiyadorlik jamiyatlari, sug‘urta tashkilotlari va yirik soliq to‘lovchilar toifasiga kiruvchi yuridik shaxslarda MHXSning amaliy qo‘llanilishi natijalarini har yili o‘rganish va aniqlangan muammolarni tahlil qilish.	Har yili
		3. Oliy ta’lim muassasalari pedagog kadrlari va davlat organlari xodimlarini MHXS bo‘yicha o‘qitish ehtiyojlarini aniqlash.	Har yili	Moliya vazirligi (D. Sultanov)
		4. Oliy ta’lim muassasalarining pedagog kadrlari, talabalar, bitiruvchilar (oliy ta’lim muassasasini tugatgandan so‘ng olti oy davomida) va davlat organlari xodimlarining buxgaltyerlarni xalqaro sertifikatlash doirasida o‘qitish va imtihonlarni topshirish bo‘yicha xarajatlarini respublika budjeti va qonun hujjatlarida taqiqlanmagan boshqa manbalar hisobidan qoplashning har yillik cheklangan qiymatlarini belgilashni nazarda tutuvchi vaqtinchalik tartibini tasdiqlash.	2020-yil 1-iyul
8.	Tajriba-sinov oliy ta’lim muassasalarida “Buxgalteriya hisobi” va “Audit” fanlari bo‘yicha o‘quv dasturlarini xalqaro akkreditatsiyadan o‘tkazish va mazkur tajriba loyihasini bosqichma-bosqich respublikadagi sohaga oid boshqa oliy ta’lim muassasalarida amalga oshirish.	1. Oliy ta’lim muassasalarining o‘quv dasturlarini akkreditatsiyadan o‘tkazish masalalari bo‘yicha MHXS sohasida yetakchi xalqaro professional tashkilotlar bilan muzokaralar o‘tkazish.	2020-yildan boshlab	Oliy va o‘rta maxsus ta’lim vazirligi (I. Majidov), Moliya vazirligi (D. Sultanov), Tajriba oliy ta’lim muassasalari
		2. Oliy ta’lim muassasalari vakillari ishtirokida o‘quv dasturlarini akkreditatsiyadan o‘tkazishning asosiy tartib-taomillari va bosqichlari bilan bog‘liq masalalarni ishlab chiqish uchun xalqaro ekspertlarni taklif etish.
		3. O‘quv dasturlarini xalqaro akkreditatsiyadan o‘tkazish bo‘yicha tajriba-sinov oliy ta’lim muassasalari va akkreditatsiyadan o‘tgan o‘quv markazlari o‘rtasida o‘zaro hamkorlikni yo‘lga qo‘yish.
		4. O‘quv dasturlarini xalqaro akkreditatsiyadan o‘tkazish bo‘yicha chora-tadbirlarni muvofiqlashtirish uchun tajriba-sinov oliy ta’lim muassasalari hamda Oliy va o‘rta maxsus ta’lim vazirligining mas’ul xodimlarini belgilash.
		5. “Buxgalteriya hisobi” va “Audit” fanlari o‘quv dasturlari mazmunini monitoring qilish tizimini shakllantirish, shuningdek, MHXSni qo‘llash bo‘yicha ommabop o‘quv va amaliy materiallarni ko‘paytirish.
9.	Respublikadagi oliy ta’lim muassasalari o‘qituvchilari tarkibining MHXS bo‘yicha kasbiy bilimlarini oshirishda xorijiy oliy ta’lim muassasalari bilan hamkorlikni kengaytirish.	1. Tizimli asosda o‘quv jarayoniga va pedagog xodimlar malakasini oshirish kurslariga xorijiy mutaxassis va o‘qituvchilarni jalb qilish.	Har yili	Oliy va o‘rta maxsus ta’lim vazirligi (I. Majidov), sohaga oid oliy ta’lim muassasalari
		2. Xalqaro va respublika darajalarida MHXS bo‘yicha amaliy seminarlar va tanlovlar tashkil etish.
10.	MHXS sohasidagi xalqaro tashkilotlarning ilg‘or tajribalarini o‘rganish asosida “Buxgalteriya hisobi” va “Audit” ta’lim yo‘nalishlari hamda mutaxassisliklari bo‘yicha o‘quv rejalari va fan dasturlarini qayta ko‘rib chiqish.	1. MHXS bo‘yicha xalqaro professional sertifikatlashtirish dasturlariga mos keladigan o‘quv dasturlarini ishlab chiqish.	2020-yil 1-avgust	Oliy va o‘rta maxsus ta’lim vazirligi (I. Majidov), sohaga oid oliy ta’lim muassasalari
		2. MHXSni chuqur o‘rganish, uni amalda qo‘llash ko‘nikmalarini shakllantirishni nazarda tutuvchi “Buxgalteriya hisobi” va “Audit” fanlari bo‘yicha yangilangan o‘quv dasturlarini tasdiqlash va ta’lim jarayoniga joriy qilish.	Har yili
		3. Uch yillik o‘qish muddatidan kelib chiqqan holda “Buxgalteriya hisobi va audit” bakalavriat ta’lim yo‘nalishi bo‘yicha o‘qitishning kunduzgi shakli o‘quv dasturlari va rejalarini qayta ko‘rib chiqish.	2020-yil 1-avgust
11.	Oliy ta’lim muassasalarining “Buxgalteriya hisobi” va “Audit” yo‘nalishlari bo‘yicha pedagog xodimlarini tezlashtirilgan tarzda o‘qitish maxsus kurslarini tashkil etish, shuningdek, MHXS bo‘yicha pedagog xodimlarning uzluksiz malaka oshirish tizimini takomillashtirish.	1.“Buxgalteriya hisobi” va “Audit” yo‘nalishlari va mutaxassisliklari bo‘yicha o‘qituvchilarni buxgalteriya hisobi sohasidagi xalqaro tashkilotdan akkreditatsiyadan o‘tgan ta’lim muassasalarida MHXS bo‘yicha o‘qitish grafigini tasdiqlash.	Har yili	Oliy va o‘rta maxsus ta’lim vazirligi (I. Majidov), oliy ta’lim muassasalari
		2. Quyidagilarni:
		akkreditatsiyadan o‘tgan o‘quv markazlari va xorijiy oliy ta’lim muassasalari bilan hamkorlik shartlari asosida MHXS bo‘yicha malaka oshirish jarayonini tashkil etishda masofaviy va vebinar texnologiyalar dasturlari;	2022-yildan boshlab
		o‘qitish, imtihon topshirish va malaka oshirish hamda “Buxgalteriya hisobi” va “Audit” yo‘nalishlari va mutaxassisliklari bo‘yicha pedagog kadrlarning kasbiy faoliyat natijalari bo‘yicha elektron ma’lumotlar bazasi tizimi;	2022-yildan boshlab
		buxgalteriya hisobi va audit fanlarini faqat xalqaro sertifikatlash doirasida “MHXS bo‘yicha moliyaviy hisobot” yoki “Audit” fanini muvaffaqiyatli topshirganligi to‘g‘risida hujjatga yoxud xalqaro buxgalter sertifikatiga (ASSA, ASSA DipIFR, SRA, CIPA) ega bo‘lgan pedagog xodimlar tomonidan o‘qitish tartibini;	2021/2022 o‘quv yildan boshlab
		Xalqaro buxgalter sertifikati (ASSA, ASSA DipIFR, SRA, CIPA) mavjud “Buxgalteriya hisobi” va “Audit” yo‘nalishidagi pedagog xodimlarning mehnatini munosib rag‘batlantirish tizimini joriy qilish.	Doimiy ravishda
		3. Xalqaro buxgalter sertifikati (ASSA, ASSA DipIFR, SRA, CIPA) mavjudpedagog xodimlarning malakasini oshirish xarajatlari uchun ish beruvchi tomonidan kafolatli to‘lovlarni amalga oshirish.	Har yili
12.	Buxgalteriya hisobi va audit fanlari bo‘yicha o‘quv va o‘quv-uslubiy adabiyotlarni takomillashtirish.	1. Buxgalteriya hisobi va audit fanlari bo‘yicha xorijiy oliy ta’lim muassasalari amaliyotida joriy etilgan zamonaviy o‘quv adabiyotlarni sotib olish, jumladan elektron kutubxonani yaratish.	Doimiy ravishda	Oliy va o‘rta maxsus ta’lim vazirligi (I. Majidov), oliy ta’lim muassasalari
		2. Oliy ta’lim muassasalari talabalarining Internet global axborot tarmog‘idan foydalangan holda mustaqil chuqur bilim olishlarini ta’minlash uchun ularni MHXSga doir yangiliklar bilan tezkor tanishtirib boradigan virtual maydon (veb-sayt) yaratish.	2020-yildavomida
13.	O‘quv jarayoni, imtihon o‘tkazish va uning natijalarini baholash hamda sertifikat berish shaffofligini ta’minlaydigan MHXS bo‘yicha maqsadli o‘qitish dasturlarini tashkil etish orqali xalqaro standartlar asosida kasbiy sertifikatlashning zamonaviy tizimini joriy etish.	1. Buxgaltyerlarni xalqaro sertifikatlash doirasida MHXS bo‘yicha o‘qitishni davom ettirish bo‘yicha akkreditatsiyadan o‘tgan o‘quv markazlari bilan xalqaro akkreditatsiyadan o‘tishning dolzarb masalalarini muhokama qilish.	2020-yil davomida	Moliya vazirligi (D. Sultanov), akkreditatsiyadan o‘tgan o‘quv markazlari Moliya vazirligi (D. Sul�anov)
		2. Xalqaro professional tashkilotlar bilan buxgaltyerlarni sertifikatlash bo‘yicha quyidagilarga yo‘naltirilgan hamkorlik aloqalarini mustahkamlash: O‘zbekiston Respublikasi Moliya vazirligi va ASSA (Association of Chartered Certified Accountants) o‘rtasida tuzilgan memorandum va qo‘shma harakatlar rejasi ijrosi bo‘yicha; oliy ta’lim muassasalari o‘quv dasturlarini akkreditatsiyadan o‘tkazish; mutaxassislarning keng doirasi uchun MHXS bo‘yicha moliyaviy hisob sohasidagi xalqaro kasbiy sertifikatlash bo‘yicha o‘qitish va imtihon topshirish dasturidan foydalanish imkoniyatini ta’minlash.	Memoran-dumga muvofiq	Moliya vazirligi (D. Sultanov), Oliy va o‘rta maxsus ta’lim vazirligi (I. Majidov),
		3. Quyidagilar uchun MHXS bo‘yicha o‘qitish va sertifikat olish uchun imtihon topshirishning grafigini tasdiqlash: davlat organlari xodimlari; oliy ta’lim muassasalarining pedagog xodimlari.	Har yili	manfaatdor vazirlik va idoralar
III. MHXSning ahamiyati va mazmunini tushuntirish bo‘yicha chora-tadbirlar
14.	Tashkilotlar rahbarlari va buxgalteriya hisobi xizmati xodimlari uchun MHXSni qo‘llash masalalari bo‘yicha faol axborot-uslubiy qo‘llab-quvvatlashni amalga oshirish.	Mavzuli seminarlar, “davra suhbatlari” va boshqa tadbirlarni tashkil etish.	Grafik asosida	Moliya vazirligi (D. Sultanov), buxgalter va auditorlarning respublika jamoat birlashmalari (M. Tulaxodjayeva, N. Karimov)
15.	Ushbu qaror talablarini yetkazish va tushuntirish bo‘yicha tadbirlar tashkil etish.	MHXSning ahamiyati to‘g‘risidagi axborotlarni davlat organlari hamda buxgalter va auditorlarning respublika jamoat birlashmalari veb-saytlarida joylashtirish.	Media-rejaga muvofiq	Moliya vazirligi (D. Sultanov), Markaziy bank (I. Norkulov), Davlat aktivlarini boshqarish agentligi (S. Bekenov), Kapital bozorini rivojlantirish agentligi (O. Nazirov)
16.	Tadbirkorlik subyektlari moliyaviy hisobotni MHXS bo‘yicha tayyorlaganda, buxgalteriya hisobining milliy standartlari asosida tayyorlanadigan moliyaviy hisobotni taqdim etishdan ozod etilishi tartibi belgilanganligi haqida tadbirkorlik subyektlarini xabardor qilish.	Tadbirkorlik subyektlariga “soliq to‘lovchining shaxsiy kabineti” orqali xabarlar yo‘naltirish.	2020-yil davomida	Davlat sol�q qo‘mitasi (B. Musayev)
17.	Aksiyadorlik jamiyatlari, tijorat banklari, sug‘urta tashkilotlari va yirik soliq to‘lovchilar toifasiga kiruvchi yuridik shaxslarni quyida belgilangan yangi talablar to‘g‘risida xabardor qilish: 2021-yildan boshlab hisob yuritish va 2021-yil yakunlaridan boshlab moliyaviy hisobotni tayyorlash faqat MHXS asosida amalga oshirilishi; buxgaltyerlarni xalqaro sertifikatlash doirasida “MHXS bo‘yicha moliyaviy hisobot” fanini muvaffaqiyatli topshirganlik to‘g‘risida hujjatga yoxud xalqaro buxgalter sertifikatiga (ASSA va ASSA DipIFR, SRA, CIPA, 2022-yil 1yanvardan boshlab esa — ACCA va ACCA DipIFR, CPA) ega bo‘lgan kamida uch nafar mutaxassis miqdorida MHXSni sifatli qo‘llash uchun yetarli bo‘lgan xodimlar sonini bosqichma-bosqich ta’minlash.	1. Aksiyadorlik jamiyatlari, tijorat banklari, sug‘urta tashkilotlari va yirik soliq to‘lovchilar toifasiga kiruvchi yuridik shaxslarga xabarnomalar yuborish.	2020-yil davomida	Davlat aktivlarini boshqarish agentligi (S. Bekenov), Kapital bozorini rivojlantirish agentligi (O. Nazirov), Markaziy bank (I. Norkulov) Davlat soliq qo‘mitasi (B. Musayev)
		2. Quyidagilarni nazarda tutuvchi tegishli ichki hujjatlarni (hisob siyosati, lavozim yo‘riqnomasi, funksional majburiyatlar) qabul qilish: buxgalteriya xizmati xodimlarining malakasini har yili tegishli lavozim uchun talab etiladigan darajada oshirishni ta’minlash; MHXS asosida tuzilgan moliyaviy hisobotni MHXS sohasida sertifikatga ega bo‘lgan mutaxassis tomonidan imzolanishi; sertifikatlangan xodimlar mehnatini munosib rag‘batlantirish tizimini joriy etish; ushbu qarordan kelib chiqadigan yangi talablar.		Aksiyadorlik jamiyatlari, tijorat banklari, sug‘urta tashkilotlari, davlat ulushi ishtirokidagi xo‘jalik jamiyatlari
18.	Buxgalter va auditorlarning respublika jamoat birlashmalari tomonidan MHXS fondi bilan birgalikda MHXSni joriy qilish va amalda qo‘llash bo‘yicha ilg‘or xalqaro tajribani tarqatishda faol ishtirok etish.	1. MHXS fondi va Buxgaltyerlarning xalqaro federatsiyasi (BXF) bilan xalqaro hamkorlikni kengaytirish.	Doimiy ravishda	Moliya vazirligi (D. Sultanov), buxgalter va auditorlarning respublika jamoat birlashmalari (M. Tulaxodjayeva, N. Karimov), manfaatdor vazirlik va idoralar, tadbirkorlik subyektlari
		2. Xalqaro tashkilotlarning mutaxassislarini jalb etgan holda quyidagilar bo‘yicha tavsiyalar ishlab chiqish: MHXSni dastlab va kelgusida qo‘llash; MHXS asosida moliyaviy hisobotni tuzish.	2020-yil davomida
		3. Xalqaro ekspertlarni jalb etgan holda MHXSni qo‘llashning dolzarb masalalariga doir seminar va treninglarni o‘qituvchilar, talabalar va buxgalteriya hisobi xizmati xodimlari ishtirokida tashkil etish.	Media-rejaga muvofiq

O‘zbekiston Respublikasi Prezidentining 2020-yil 24-fevraldagi PQ-4611-son qaroriga
2-ILOVA

O‘zbekiston Respublikasi Prezidentining 2018-yil 19-sentabrdagi “O‘zbekiston Respublikasida auditorlik faoliyatini yanada rivojlantirish chora-tadbirlari to‘g‘risida”gi PQ-3946-son qarorining 5-bandiga kiritilayotgan o‘zgartirishlar

1. Birinchi xatboshidan “2020-yil 1-yanvardan” degan so‘zlar chiqarib tashlansin.

2. “a” kichik bandning birinchi xatboshisi quyidagi tahrirda bayon etilsin:

“a) 2020-yil 1-yanvardan hisobot yili yakuni bo‘yicha quyidagi shartlardan bir vaqtning o‘zida ikkitasiga javob bergan tijorat tashkilotlari ham har yili majburiy auditorlik tekshiruvidan o‘tishi lozim:”.

3. “b” kichik bandi quyidagi tahrirda bayon etilsin:

“b) O‘zbekiston Respublikasining “Auditorlik faoliyati to‘g‘risida”gi Qonuniga tegishli o‘zgartirishlar kuchga kiradigan kundan boshlab auditorlik tashkilotlari auditorlik faoliyatini faqat Xalqaro buxgaltyerlar federatsiyasi tomonidan nashr etiladigan xalqaro audit standartlari asosida amalga oshiradi;”.
(Qonun hujjatlari ma’lumotlari milliy bazasi, 25.02.2020-y., 07/20/4611/0209-son)