Okoz: 13. 00. 00. 00 Ta’lim. Fan. Madaniyat / 13. 01. 00. 00 Ta’lim / 13. 01. 11. 00 Oliy ta’lim (bakalavriat va magistratura)] [tsz



[OKOZ:

1.13.00.00.00 Ta’lim. Fan. Madaniyat / 13.01.00.00 Ta’lim / 13.01.11.00 Oliy ta’lim (bakalavriat va magistratura)]

[TSZ:

1.Ijtimoiy-madaniy masalalar / Ta’lim]

O‘zbekiston Respublikasi ta’lim muassasalariga qabul qilish bo‘yicha Davlat komissiyasi kengaytirilgan majlisining

2-son Bayonidan ko‘chirma

OLIY O‘QUV YuRTLARIDA TEST O‘TKAZISh TARTIBI TO‘G‘RISIDA YO‘RIQNOMANI TASDIQLASh HAQIDA

[O‘zbekiston Respublikasi Adliya vazirligi tomonidan 2002-yil 25-iyunda 1154-son bilan davlat ro‘yxatidan o‘tkazilgan]

 LexUZ sharhi

Mazkur hujjat O‘zbekiston Respublikasi Adliya vazirining 2003-yil 16-iyuldagi 122-mh-sonli buyrug‘iga asosan Davlat reyestridan chiqarilgan.

11. Davlat test markazi tomonidan tayyorlangan “Oliy o‘quv yurtlarida test o‘tkazish yo‘riqnomasi” tasdiqlansin.

Adliya vazirligi mazkur Yo‘riqnomani belgilangan tartibda ro‘yxatdan o‘tkazsin.

Davlat test markazi mazkur Yo‘riqnomani barcha manfaatdor vazirlik va idoralar hamda oliy ta’lim muassasalariga yetkazilishini ta’minlasin.

Davlat komissiyasining Raisi H. KAROMATOV

Davlat komissiyasining mas’ul kotibi A. VORISOV

Toshkent sh.,

2002-yil 14-iyun

O‘zbekiston Respublikasi ta’lim muassasalariga qabul qilish bo‘yicha Davlat komissiyasi kengaytirilgan majlisining 2002-yil 14-iyundagi 2-son bayoni bilan

TASDIQLANGAN

Oliy o‘quv yurtlarida test o‘tkazish tartibi to‘g‘risida

YO‘RIQNOMA

Mazkur Yo‘riqnoma O‘zbekiston Respublikasining Kadrlar tayyorlash milliy dasturi, O‘zbekiston Respublikasi Vazirlar Mahkamasining 1994-yil 14-maydagi 258-son “O‘zbekiston Respublikasi Vazirlar Mahkamasi huzurida Davlat test markazi tashkil etish to‘g‘risida”gi va 1999-yil 12-iyuldagi 342-son “O‘zbekiston Respublikasi ta’lim muassasalariga qabul to‘g‘risidagi nizomlarini tasdiqlash haqida”gi qarorlariga asosan ishlab chiqilgan bo‘lib, oliy o‘quv yurtlarida test sinovlarini o‘tkazish tartibini belgilaydi.

§ 1. Umumiy qoidalar

1. Test sinovlarini O‘zbekiston Respublikasi Vazirlar Mahkamasi huzuridagi Davlat test markazi (DTM) amalga oshiradi.

2. Test sinovlarini tashkil etish va ularni joylarda adolatli o‘tkazish mas’uliyati, test sinovlari qoidalariga qat’iy rioya etgan holda, DTM vakillari, qabul komissiyalari raislari, hokimliklar va ular tomonidan tayinlanadigan auditoriyalarning rahbarlari zimmasiga yuklanadi.

§ 2. Oliy o‘quv yurti qabul komissiyasining ishini tashkil etish

3. Oliy o‘quv yurtlarida o‘qishga qabulni sifatli tashkil etish maqsadida qabul komissiyalari tashkil etiladi.

4. O‘quv yurti qabul komissiyasining asosiy vazifalariga quyidagilar kiradi:

O‘zbekiston Respublikasi Vazirlar Mahkamasining 1999-yil 12-iyuldagi 342-son qarori bilan tasdiqlangan “O‘zbekiston Respublikasi oliy ta’lim muassasalarining bakalavriatiga talabalarni qabul qilish tartibi va qoidalari to‘g‘risidagi Nizom” (qabul to‘g‘risidagi Nizom) hamda ushbu Yo‘riqnomaga muvofiq puxta bilimli, iqtidorli yoshlarni test sinovlari asosida o‘quv yurtiga kirishini ta’minlash;

qabul jarayonini yuqori darajada uyushqoqlik bilan tartibli ravishda tashkil etish;

test o‘tkazish uchun zarur sharoitlarni yaratish;

abituriyentlarga ularning huquq va vazifalarini tushuntirish;

test jarayonining xolisona va adolatli o‘tishini ta’minlash;

test natijalari bo‘yicha abituriyentlar va ularning ota-onalariga to‘liq ma’lumotlar berish.

5. Qabul komissiyasi o‘zining asosiy vazifalariga muvofiq quyidagi ishlarni amalga oshiradi:

qabul komissiyasi a’zolarining vazifalarini aniqlab, tegishli hujjat bilan rasmiylashtiradi;

DTMdan olingan tegishli hujjatlar va turli axborot materiallarini yetarli miqdorda tayyorlab qo‘yadi hamda o‘z ish jadvalini e’lon qiladi;

qabul boshlangunga qadar test o‘tkaziladigan auditoriyalar va ulardagi o‘rinlar sonini aniqlaydi, har bir auditoriyada quti va paketlarga emblemalarni yelimlash uchun yelim va boshqa test o‘tkazish uchun yetarli shart-sharoitlarni tayyorlaydi, auditoriyalar joylashuvi reja-chizmalarini tuzadi hamda qabul komissiyasi raisi tasdiqlagan reja-chizmani 1-iyulgacha DTMga taqdim etadi;

Qabul to‘g‘risidagi Nizomni, mazkur Yo‘riqnomani, ta’lim yo‘nalishlari, o‘quv shakli va tili bo‘yicha O‘zbekiston Respublikasi Vazirlar Mahkamasining tegishli qarori bilan tasdiqlangan qabul kvotalarini, test o‘tkaziladigan fanlarning ro‘yxatini, ixtisoslik bo‘yicha ijodiy imtihon topshiriladigan ta’lim yo‘nalishlarini va baholash mezonlarini e’lon qiladi;

abituriyentlarning arizalarini qabul qilish va barcha o‘quv shakllari bo‘yicha hujjatlarni rasmiylashtirish ishlarini belgilangan muddatlarda olib boradi;

qabul qilingan ariza va hujjatlar to‘g‘risidagi ma’lumotlarni raqamlangan, bog‘langan va muhrlangan daftarga qayd qiladi, qabul to‘g‘risidagi arizaga abituriyentning o‘rta yoki o‘rta maxsus ma’lumoti haqidagi hujjatning asl nusxasi, 086/U-shakldagi tibbiy ma’lumotnoma, 3x4 sm hajmdagi 6 ta fotosurat ilova qilinadi, pasport va harbiy xizmatga aloqadorligi haqidagi hujjat abituriyentlar tomonidan shaxsan ko‘rsatiladi. Abituriyentga hujjatlari qabul qilinganligi to‘g‘risida tilxat (1-ilova) beradi;

abituriyentlarga ularga qo‘yiladigan talablar, test jarayoni, baholash mezonlari, talabalar safiga qabul qilish va boshqalar haqida barcha zaruriy axborot (tushuntirish)lar beradi;

barcha abituriyentlarni “Abituriyentlarga eslatma” (2-ilova) bilan ta’minlaydi;

DTM tomonidan yaratilgan yangi “ABT-Abitur” dasturini o‘rganadi;

3—8-ilovalar bo‘yicha ma’lumotlarni DTMga yuborish maqsadida “ABT-Abitur” dasturi o‘rnatilgan kompyuterlar xotirasiga abituriyentlar haqidagi quyidagi ma’lumotlarni to‘g‘ri kiritilishini ta’minlaydi:

maxsus kod;

qayd raqami;

ta’lim turi;

o‘quv yurtining nomi;

fuqaroligi;

familiyasi, ismi, sharifi;

millati;

jinsi;

pasport seriyasi;

pasport raqami;

yashash joyi;

tug‘ilgan yili, joyi;

ijtimoiy kelib chiqishi;

ta’lim muassasasining turi;

maktab (litsey, kollej) raqami;

maktab (litsey, kollej)ni tugatgan yili;

maktab (litsey, kollej) manzili;

attestat raqami;

attestatdagi o‘rtacha bali;

harbiy qismdan berilgan tavsiyanoma (muddatli harbiy xizmatni tugatganlar uchun);

Respublika va xalqaro olimpiadalar g‘olibi ekanligi haqida ma’lumot (agar tegishli hujjat bo‘lsa);

ta’lim tili;

ixtisosligi;

chet tili;

chet tilini topshirish uslubi;

qabulning borishi haqidagi ma’lumotlarni DTMga topshiradi;

DTM tomonidan e’lon qilish uchun berilgan hujjatlarni o‘quv yurtida e’lon qiladi;

o‘quv yurtiga kirish muammolari bo‘yicha fuqarolarni qabul qilishni uyushtiradi, ular uchun zarur ma’lumotlarni tayyorlaydi va e’lon qiladi;

DTM vakili bilan hamkorlikda auditoriya rahbari va kuzatuvchilari uchun test sinovlarini o‘tkazish tartibi to‘g‘risida amaliy seminar mashg‘ulotlari tashkil etadi va o‘tkazadi;

21-iyulda qabulning tugashi bilan 3—6-ilovalar bo‘yicha ma’lumotlarni o‘quv yurti qabul komissiyasining raisi va mas’ul kotibi tomonidan tasdiqlangan holda DTMga yetkazadi. Bundan so‘ng ushbu ma’lumotlarning o‘zgarmasligini ta’minlaydi;

o‘quv yurti bo‘yicha auditoriyalarning tartib raqami guruhlarning tartib raqami bilan bir xil bo‘lishini hamda test sinovlari qaysi binoda o‘tkazilishidan qat’i nazar takrorlanmasligini ta’minlaydi;

ixtisosliklar bo‘yicha ijodiy imtihonlarni xolisona va adolatli o‘tkazib, natijalarini o‘quv yurtida 27-iyulgacha abituriyentlarning e’tibori uchun ma’lumot sifatida e’lon qiladi va Davlat komissiyasining abituriyentlarni talabalar safiga o‘tkazish haqidagi qarori chiqmaguncha e’lonlar doskasidan olmaydi;

abituriyentlarning ijodiy imtihon bo‘yicha olgan ballari haqidagi ma’lumot (7-ilova)ni 1-avgustda DTMga, xatosiz to‘ldirilgan holda, yetkazadi;

26-iyulda binolar va xonalarning joylashishi, abituriyentlarning bino bo‘yicha harakat yo‘nalishi chizmasini e’lon qiladi;

DTM tavsiya etgan algoritm asosida abituriyentlar ro‘yxati (8-ilova)ni kompyuterda shakllantiradi va 27-iyulda ma’lumot uchun e’lon qiladi;

Titul varaqasi (9-ilova) va Ruxsatnoma (10-ilova)larni xatosiz to‘ldiradi;

27-iyuldan boshlab abituriyentlarga Ruxsatnoma va Titul varaqasini tarqatadi;

DTM vakillarini qabul va test jarayoniga oid barcha ma’lumotlar, shu jumladan, binolar va auditoriyalarning reja-chizmalari bilan ta’minlaydi;

30-iyulda barcha auditoriyalardagi o‘tirish o‘rinlarini raqamlab test o‘tkazishga tayyorlaydi hamda auditoriyalarning eshiklariga ularning tartib raqamlari, mutaxassisliklar nomi va o‘tirish o‘rinlarining soni yozilgan ko‘chma ko‘rsatkichlarni ilib qo‘yadi;

31-iyulda test o‘tkazilmaydigan xonalar va qavatlarning kirish va chiqish eshiklari (asosiydan boshqa) yopib muhrlaydi;

abituriyentlarni auditoriyalarga tartibli ravishda kiritishni ta’minlash uchun har bir binoda nazoratchilik xizmati postlarini tashkil qiladi;

test jarayoni uchun axborot, texnik, tibbiy va maishiy xizmatlarni tashkil etadi;

test sinovlari o‘tkaziladigan kuni o‘quv yurtida nusxa ko‘chirish vositalari ishlatilishining oldini olish maqsadida ularning barchasini muhrlab qo‘yadi;

test sinovlari o‘tkaziladigan kuni abituriyentlarni pasport va ruxsatnomasi bilan binoga tartibli ravishda kiritilishini ta’minlaydi;

test sinovlarining o‘z vaqtida boshlanishini ta’minlaydi;

test jarayonida ro‘y bergan barcha muammolarni tezkorlik bilan hal qilish choralarini ko‘radi;

test sinovlari tugagandan keyin test materiallarini belgilangan tartibda maxsus aloqa xodimlariga topshirilishini ta’minlaydi;

test natijalari olingan kuni ularni abituriyentlarga e’lon qiladi;

test natijalari olingan kuni, DTM vakili bilan birgalikda abituriyentlarning Titul varaqalari solingan seyflarni dalolatnoma tuzib ochadi va o‘zgartirish kiritilgan har bir Titul varaqasi haqidagi ma’lumotni dalolatnomada qayd etib, dalolatnomaning bir nusxasini DTMga yuboradi.

6. O‘quv yurti qabul komissiyasiga yuklatilgan barcha ishlarning bajarilishini ta’minlash mas’uliyati qabul komissiyasining raisi va mas’ul kotibiga yuklanadi.

§ 3. Davlat test markazi vakillarining ishini tashkil etish

7. Test sinovlarini o‘tkazishga mas’ul bo‘lgan DTM vakillari O‘zbekiston Respublikasi ta’lim muassasalariga qabul qilish bo‘yicha Davlat komissiyasi tomonidan tasdiqlanadilar.

8. DTM vakillari oliy, o‘rta maxsus va kasb-hunar ta’limi muassasalari, ilmiy muassasalar, davlat va jamoat tashkilotlari xodimlaridan vazirliklar va hokimliklar tavsiyasi asosida tanlanadi va o‘quv yurtlariga qur’a tashlash yo‘li bilan taqsimlanadi.

9. DTMning har bir vakiliga 10-12 ta auditoriya biriktiriladi. DTM vakillaridan bittasi o‘quv yurti bo‘yicha rahbar etib tayinlanadi.

10. DTM vakillari faoliyatiga umumiy rahbarlik DTMning doimiy vakili tomonidan amalga oshiriladi.

11. DTM vakili o‘quv yurtining qabul komissiyasi va tegishli hokimlikning mas’ul xodimi bilan birgalikda, test sinovlariga qadar, quyidagilarni tekshiradi:

Qabul to‘g‘risidagi Nizomga asosan abituriyentlarning ariza va hujjatlari to‘g‘risidagi ma’lumotlarni qayd daftarlarida to‘g‘ri rasmiylashtirilganligini;

abituriyentlar ro‘yxatining DTM tavsiya etgan algoritm asosida tuzilganligini;

binolarda seyflarga ega maxsus xonalarning tayyorligini;

auditoriya rahbarlari va kuzatuvchilarining qaysi auditoriyaga tushishini qur’a tashlash yo‘li bilan aniqlash uchun ajratilgan joyning har bir binoda tayyorligini;

test sinovlari o‘tkaziladigan xonalarda abituriyentlarning o‘tirish o‘rinlarini belgilangan tartibda raqamlanganligi, ularda yetarli miqdorda stol (parta), stullar hamda test materiallarini topshirish uchun ajratilgan alohida stolning mavjudligini;

tibbiy, texnik va axborot xizmatining tashkil etilishini, jamoat tartibini saqlanish chora-tadbirlari belgilanganligini;

Ruxsatnoma va Titul varaqasining qayd daftari asosida to‘g‘ri to‘ldirilganligini.

DTM vakili aniqlangan kamchiliklarni bartaraf etish choralarini ko‘radi. Zarur bo‘lganda, DTM rahbariyatiga ma’lumot berib, o‘quv yurtining testga to‘liq tayyor bo‘lishiga erishadi.

12. DTM vakili test jarayonida abituriyentga qo‘yiladigan talablarni hamda “Abituriyentga eslatma”ni to‘liq o‘rganadi.

13. DTM vakili test o‘tkaziladigan kuni quyidagi ishlarni bajaradi:

o‘quv yurti bosh shtabiga soat 6.00 da etib keladi;

DTMning o‘quv yurti bo‘yicha rahbar vakili soat 6.00 dan 6.20 gacha DTM vakillarini binolar va auditoriyalar bo‘yicha taqsimlaydi;

soat 6.20 dan 6.40 gacha qabul komissiyasi raisi, mas’ul kotibi bilan birgalikda maxsus aloqa xodimlaridan test materiallarini qabul qilib oladi, test materiallarini binolar bo‘yicha tarqatadi va 1-shakl (11-ilova)ni rasmiylashtiradi;

mas’ul kotibdan abituriyentlar ro‘yxatini (ijodiy imtihon o‘tkazilgan guruhlar uchun 2 nusxada) oladi;

DTMning doimiy vakilidan binolar bo‘yicha auditoriya rahbari va kuzatuvchilar ro‘yxatini oladi;

soat 6.40 dan 7.00 gacha maxsus aloqa xodimi bilan test materiallarini o‘zi biriktirilgan binoga olib keladi;

soat 7.00 dan 7.30 gacha o‘quv yurti qabul komissiyasi xodimi bilan birgalikda auditoriya rahbari va kuzatuvchining qaysi auditoriyada bo‘lishini qur’a tashlash yo‘li bilan aniqlaydi va ularga DTMning maxsus guvohnomasini beradi hamda bu haqda 2 nusxada bayonnoma (12-ilova) tuzadi;

abituriyentlar ro‘yxatini (ijodiy imtihon o‘tkazilgan guruhlar uchun 2 nusxada) kuzatuvchilarga tarqatadi;

soat 7.30 dan 8.00 gacha abituriyentlarning Ruxsatnomasi, Titul varaqasi va pasportini tekshirib, binoga kiritilishini nazorat qiladi;

soat 8.00 dan 8.30 gacha test materiallari solingan qutilarni auditoriya rahbarlariga tarqatadi va 2-shakl (13-ilova)ni rasmiylashtiradi;

soat 8.30 dan 9.00 gacha auditoriya rahbari va kuzatuvchisi tomonidan test materiallarini abituriyentlarga tarqatilishini, Savollar kitobi bilan ishlash va Javob varaqasi (14-ilova)**ni to‘ldirish qoidalari bo‘yicha ko‘rsatmalar berilishini nazorat qiladi;

soat 9.00 dan 10.00 gacha o‘ziga biriktirilgan auditoriyalarda testga kelmagan abituriyentlar ro‘yxatini oladi, auditoriya rahbari va kuzatuvchisining familiyasi, ismi, sharifi, pasporti haqidagi ma’lumotlarni olib, ularni ro‘yxat bilan solishtiradi;

soat 9.00-12.20 (9.00-11.20*) da test jarayonining xolisona va adolatli o‘tishini nazorat qiladi va ta’minlaydi (* ikkita blok bo‘yicha test topshiruvchilar uchun);

auditoriyalarda test sinovlarini o‘tkazish tartibini buzgan abituriyentlarning testdan chetlashtirilishini va bu haqda dalolatnomalar tuzilishini nazorat qiladi;

auditoriya rahbari va kuzatuvchisi varaqasi (15-ilova)ning to‘g‘ri to‘ldirilishini nazorat qiladi;

test jarayonida kutilmagan voqea ro‘y berganda, zudlik bilan telefon orqali DTM direktori bilan bog‘lanib, muammoni hal qilish choralarini ko‘radi;

soat 12.00-12.20 (11.00-11.20*) da test sinovini tugash jarayonini qat’iy nazorat qiladi;

abituriyentlarning auditoriyadan pasporti va Ruxsatnoma bilan chiqishini, Ruxsatnomada Javoblar varaqasi nomeri va varianti yozilib, uning auditoriya rahbari va kuzatuvchisi tomonidan tasdiqlanganligini nazorat qiladi;

soat 12.20-12.40 (11.20-11.40*) da Javoblar varaqasi paketi, Savollar kitobi qutisi, Titul varaqalari paketi auditoriyalarda yelimlanib, emblemalar bilan muhrlanishini ta’minlaydi;

soat 12.20-13.20 (11.20-12.20*) da test sinovlari tugashi bilan, muhrlangan Javoblar varag‘i paketi, Savollar kitobi qutisi va Titul varaqasi paketlarini DTMning rahbar vakiliga zudlik bilan topshirilishini boshqaradi;

soat 13.20-13.40 (12.20-12.40*) da test materiallarini maxsus aloqa vositalari bilan o‘quv yurti bosh shtabiga olib keladi;

qabul komissiyasi raisi, mas’ul kotibi bilan birgalikda maxsus aloqa xodimlariga test materiallarini topshirib, 1-shaklni rasmiylashtiradi;

qabul komissiyasi seyfiga Titul varaqalari paketini solib, seyfni qabul komissiyasi raisi, mas’ul kotib bilan birgalikda muhrlaydi;

maxsus aloqa xodimlariga topshirilayotgan qutilar joylashgan qoplarga Davlat test markazining manzilini yozadi.

14. Test sinovlari o‘tgandan so‘ng, har bir DTM vakili bajarilgan ishlar bo‘yicha ikki nusxada hisobot tayyorlaydi. Hisobotning bir nusxasi DTMga, ikkinchi nusxasi DTMning doimiy vakiliga topshiriladi.

§ 4. Auditoriya rahbari va kuzatuvchisining ishini tashkil etish

15. Auditoriya rahbari va kuzatuvchilarning ro‘yxati tegishli hokimliklar tomonidan tasdiqlanadi.

16. Test sinovi o‘tgan xonada sinovning belgilangan talablarga qat’iy rioya etilgan tarzda xolisona va adolatli o‘tkazilishini ta’minlash bo‘yicha shaxsiy mas’uliyat auditoriya rahbari va kuzatuvchisi zimmasiga yuklanadi.

17. Auditoriya rahbari va kuzatuvchisi biriktirilgan o‘quv yurtiga ertalab soat 7.00 dan kechikmasdan pasporti bilan etib keladi.

18. Auditoriya kuzatuvchisi qur’a tashlash yo‘li bilan o‘ziga biriktirilgan auditoriyaga, abituriyentlar ro‘yxatini (ijodiy imtihon o‘tkazilgan guruhlar uchun 2 nusxada) va titul varaqalarini DTM vakilidan olib, zudlik bilan, soat 7.30 dan kechikmay etib boradi va quyidagi ishlarni bajaradi:

auditoriyani ko‘zdan kechiradi (agar auditoriyaga abituriyentlar kirib olishgan bo‘lsa, ularni tashqariga chiqaradi);

auditoriyadagi har bir o‘tirish o‘rnining tartib bilan raqamlanganligini tekshiradi;

abituriyentlarga o‘zini tanishtirib, ularning Ruxsatnomasi, Titul varaqasi va pasportlarini e’tibor bilan tekshirib, guruh ro‘yxati bo‘yicha auditoriyaga kiritadi;

guruh ro‘yxatini diqqat bilan ko‘zdan kechirib, ro‘yxat bo‘yicha sinovga kelgan va kelmagan abituriyentlar sonini aniqlaydi.

19. Auditoriya rahbari belgilangan vaqtda (soat 7.30-8.00) o‘ziga biriktirilgan auditoriya uchun test materiallarini DTMning rahbar vakilidan qabul qilib oladi va darhol auditoriyaga etib boradi.

20. Test sinoviga belgilangan vaqtdan kechikib kelgan abituriyentlarni auditoriyaga kiritmaydi.

21. Test boshlanishidan oldin auditoriya rahbari va kuzatuvchisi o‘zlarining ismlari va familiyalarini doskaga yozib qo‘yadi.

22. Auditoriya rahbari, kuzatuvchisi hamda ikki abituriyent birgalikda quti muhrlanganligiga ishonch hosil qilib, qutini soat 8-30 da ochadilar.

Quti ichida quyidagi materiallar bo‘ladi:

ro‘yxatidagi abituriyentlar soniga teng bo‘lgan miqdorda, ichiga Javoblar varaqasi solingan Savollar kitoblari;

2 ta dalolatnoma: Savollar kitobi va Javoblar varaqasi qutisini ochish va Savollar kitobini qutiga joylab, qutini yopishga mo‘ljallangan 3-shakldagi dalolatnoma (16-ilova);

Javoblar varaqalari paketini yopishga mo‘ljallangan 4-shakldagi dalolatnoma (17-ilova);

2 ta paket: Javoblar varaqalari uchun 1 ta, Titul varaqalari uchun 1 ta;

muhrlash uchun 3 ta emblema: Javoblar varaqalari paketi uchun 1 ta, Titul varaqalari paketi uchun 1 ta, Savollar kitoblari qutisi uchun 1 ta;

auditoriya rahbari va kuzatuvchisi varaqasi.

23. Quti ochilgach, Savollar kitoblari sanaladi, 3-shakldagi dalolatnoma to‘ldiriladi va ikki abituriyent bilan birgalikda imzo qo‘yiladi.

24. Abituriyentlarga Savollar kitoblari tarqatilib, ularga Javoblar varaqasining “Abituriyentlar diqqatiga” deb yozilgan qismini e’tibor bilan o‘qib chiqish taklif etiladi.

25. Abituriyentlarga quyidagilar tushuntiriladi:

Javoblar varaqasini bukmaslik;

Javoblar varaqasining marker chizig‘iga yozmaslik;

Javoblar varaqasi raqami ostida joylashgan doirachalarni bo‘yamaslik.

26. Test sinovlari boshlanishidan oldin soat 8-30 dan 9-00 gacha auditoriya rahbari va kuzatuvchi Javoblar varaqasi raqamining Titul varaqasi va Ruxsatnomaga ko‘chirib yozganligini tasdiqlash maqsadida Titul varaqasining va Ruxsatnomaning maxsus joyiga imzo qo‘yadi.

27. Abituriyentlarning bir-birlari bilan gaplashmasligi, turli qog‘oz va boshqa narsalardan foydalanmasligini tushuntiradi. Eshik va derazalar orqali abituriyentlarning mustaqil ishlashiga xalaqit beradigan har qanday salbiy aralashuvlarga yo‘l qo‘ymaydi.

28. Tushuntirish tugagandan keyin, testning boshlanishi va tugash vaqtini doskaga yozib qo‘yadi.

29. Test boshlangandan keyin, hech kim auditoriyaga kiritilmaydi va abituriyent test materiallarini topshirmaguncha auditoriyadan chiqarilmaydi. Test materiallarini topshirib chiqib ketgan abituriyent auditoriyaga qayta kiritilmaydi.

30. Favqulodda holatlarda auditoriya rahbari va kuzatuvchisi DTM vakili ishtirokida sodir etilgan voqea haqida dalolatnoma tuzadi.

31. Test jarayonida birorta hujjat (test materiali yoki boshqa qog‘oz) auditoriyadan tashqariga chiqarilmaydi va tashqaridan kiritilmaydi.

32. Abituriyentlar tomonidan test sinovlarini o‘tkazish tartibi buzilsa, auditoriya rahbari, kuzatuvchisi va ikki abituriyent ishtirokida tartibni buzgan abituriyentni testdan chetlashtirish haqida dalolatnoma tuziladi. Bunda sana, o‘quv yurti nomi, guruh raqami, ixtisoslik kodi, tartibni buzgan abituriyentning familiyasi, ismi, otasining ismi, Javoblar varaqasining raqami va qanday talabni buzganligi va abituriyent qaysi vaqtda test sinovidan chetlashtirilganligi yoziladi. Dalolatnomaga DTM vakili ham imzo qo‘yadi.

33. Test sinoviga kelmagan va testdan chetlashtirilgan abituriyentlarning Javoblar varaqasi raqamlari auditoriya rahbari va kuzatuvchisi varaqasiga belgilanadi.

34. Test topshiriqlarini bajarib bo‘lgan abituriyent Savollar kitobi, Javoblar varaqasi va Titul varaqasini alohida-alohida stolga qo‘yadi, abituriyentlar ro‘yxatiga Javoblar varaqasining raqami to‘g‘ri yozilganligini tekshirib, topshirgan vaqtini yozib, imzo qo‘yadi va auditoriyadan chiqadi.

35. Test sinovlari uchun ajratilgan vaqt tugagandan so‘ng, auditoriya rahbari test sinovi tugaganligini rasman e’lon qiladi. Shundan keyin abituriyentlar navbat bilan Savollar kitobi, Javoblar varaqasi va Titul varaqasini alohida-alohida stolga qo‘yadi, abituriyentlar ro‘yxatiga Javoblar varaqasining raqami to‘g‘ri yozilganligini tekshirib, topshirgan vaqtini yozib, imzo qo‘yadi va auditoriyadan chiqadilar.

36. Auditoriya rahbari, hamma test materiallari yig‘ilgandan so‘ng, ikki nafar abituriyent ishtirokida Javoblar varaqasi va Savollar kitoblarini alohida sanaydi. Shundan keyin quyidagilarni bajaradi:

test sinovlaridan chetlashtirilgan (agar ular bo‘lsa) abituriyentlarning Javoblar varaqasiga dalolatnomani yelimlab Javoblar varaqasi paketiga joylaydi;

ishlatilgan va ishlatilmagan Javoblar varaqalarining marker chizig‘ini bir tarafga qilib Javoblar varaqasi paketiga joylaydi;

auditoriya rahbari va kuzatuvchisi varag‘i va barcha dalolatnomalar (3-shakldan tashqari)ni ham Javoblar varaqasi paketiga soladi;

4-shakldagi dalolatnomaga auditoriya rahbari va kuzatuvchisi, ikki abituriyent imzo qo‘yib, bu dalolatnomani ham Javoblar varaqasi paketiga solib, paketni emblema bilan muhrlaydi;

3-shakldagi dalolatnomani to‘ldirib, Savollar kitoblarini qutiga soladi va qutini emblema bilan muhrlaydi;

Titul varaqalarini sanab, uni abituriyentlar ro‘yxati bilan (ijodiy imtihon o‘tkazilgan guruhlar uchun 1 nusxasini) Titul varaqalari paketiga soladi va bu paketni emblema bilan muhrlaydi.

37. Javoblar varaqalari solingan paketni, Savollar kitoblari qutisini va Titul varaqalari solingan paketni maxsus xonada DTM vakiliga topshiradi va 2-shaklga imzo qo‘yadi.

Ijodiy imtihon o‘tkazilgan guruhlar ro‘yxatining bir nusxasini mas’ul kotibga topshiradi.

38. Test sinovlari tugagach, auditoriya rahbari va kuzatuvchisi o‘z guvohnomalarini DTM vakiliga topshiradilar.

1-ILOVA

(O‘quv muassasasi nomi)
Hujjatlarning qabul qilib olinganligi to‘g‘risida
T I L X A T
Fuqaro___________________________________________________________________dan ______________________________________________________ixtisosligiga kirish uchun quyidagi hujjatlar
QABUL QILINADI:
1. Ariza 2. Fotosurat (3 x 4, 6 dona) 3. Tibbiy ma’lumotnoma (086/U shaklda) 4. Ma’lumoti haqidagi hujjatning asl nusxasi
______________________________________
(attestat, diplom)
Hujjatlarni qabul qilgan mas’ul xodim F.I.Sh. va imzosi:

2-ILOVA

Abituriyentlarga eslatma

Abituriyent o‘quv yurtining qabul komissiyasiga quyidagi hujjatlarni topshiradi:

ta’lim yo‘nalishi, o‘quv tili va shakli ko‘rsatilgan holdagi ariza;

o‘rta va o‘rta maxsus ma’lumot haqidagi hujjatning asl nusxasi;

086/U-shakl bo‘yicha tibbiy ma’lumotnoma;

3x4 sm hajmdagi 6 ta fotosurat;

xalqaro va respublika miqyosidagi olimpiadalar, tanlov va musobaqalar g‘oliblariga tanlovsiz o‘qishga kirish huquqini beruvchi hujjatning asl nusxasini;

muddatli harbiy xizmatni tugatib, harbiy qismlarning yo‘llanmasi bilan kelgan abituriyentlar — tegishli tavsiyanomani;

pasport va harbiy xizmatga aloqadorligi haqidagi hujjatini abituriyent shaxsan ko‘rsatadi.

27-iyulda qabul komissiyasi tomonidan binolar va auditoriyalarning reja-chizmalari e’lon qilinadi.

Abituriyent chizmani diqqat bilan o‘rganib, test uchun zarur bo‘lgan binoning qayerda joylashganligi, auditoriyaning tartib raqami, qaysi qavatda ekanligi va boshqa kerakli ma’lumotlarni bilib oladi.

Abituriyentlar guruh tartib raqami ko‘rsatilgan Ruxsatnoma va Titul varaqasini 27-iyuldan boshlab o‘quv yurti qabul komissiyasidan oladilar.

Kunduzgi va sirtqi ta’lim bo‘yicha abituriyentlarni testdan o‘tkazish, Qabul to‘g‘risidagi Nizomga asosan, o‘zbek, qoraqalpoq (Qoraqalpog‘iston Respublikasida) va rus tillarida, O‘zbekiston Respublikasining barcha hududlarida bir kunda va bir vaqtda o‘tkaziladi.

Test o‘tkaziladigan kuni abituriyentlarni bino ichkarisiga kiritish ertalab soat 7.30 da boshlanib, 30 daqiqa davom etadi. Abituriyent binoga kirishda Ruxsatnoma va pasportini shaxsan ko‘rsatadi. Soat 8.00 dan boshlab abituriyentlar o‘z guruhlari tartib raqami bilan bir xil raqamlangan auditoriyaga kiradilar.

Test sinovlariga mikrokalkulyator, lug‘at, jadval, kitob, uyali telefon aloqa vositalari va shpargalkalarni olib kirish taqiqlanadi.

Test sinovlari boshlangandan so‘ng (8.30 dan keyin) abituriyent auditoriyaga kiritilmaydi.

Belgilangan vaqtda test sinovlariga kelmagan abituriyentlar uchun qo‘shimcha test sinovlari o‘tkazilmaydi.

Test vaqtida abituriyentlarga quyidagi talablar qo‘yiladi:

Savollar kitobi va Javoblar varaqasini olgandan so‘ng, javoblar varaqasidagi “Abituriyentlar diqqatiga” qismini o‘qib chiqadi;

Javoblar varaqasi varianti (5-blok) bilan Savollar kitobi varianti mosligini tekshiradi;

Savollar kitobini sinchiklab tekshirib chiqadi. Agar unda fanlar bo‘yicha test savollarida tipografik xato yoki boshqa sabablarga ko‘ra to‘la nashr qilinmagan o‘rinlar yoki betlar bo‘lsa, darhol auditoriya rahbariga xabar beradi;

abituriyent test boshlanishidan oldin o‘z Ruxsatnoma va Titul varaqasining tegishli joylariga Javoblar varaqasining raqamini (6-blok) ko‘chirib yozadi;

Javoblar varaqasini to‘ldirishda faqat havo rang pastali sharikli ruchkadan foydalanadi. Flomaster yoki siyohli avtoruchkadan foydalanish man etiladi;

abituriyent o‘zi haqidagi ma’lumotlarni 1-blokka yozadi, 2-blokni diqqat bilan o‘qib imzolaydi, 3-blokda o‘ziga mos keluvchi doirachalarni bo‘yaydi;

maxsus kodini, o‘qishni tugatgan maktabi joylashgan viloyat, tuman, shahar, shahar tumani kodlarini, maktab (litsey) nomerini, o‘quv yurti va ixtisoslik kodlarini 4-blokning mos joylariga Titul varaqasidan ko‘chiradi va doirachalarni mos ravishda bo‘yaydi;

savollar kitobidagi hamma bloklarda 36 tadan savol keltirilgan, har bir savolga 5 tadan (A, B, C, D, E) javob berilgan bo‘lib, abituriyent ulardan faqat bitta — to‘g‘risini topishi va kitobchada belgilab, keyinchalik Javoblar varaqasiga ko‘chiradi;

javoblarni tanlash uchun 108 ta savolga 3 soat va 72 ta savolga 2 soat vaqt ajratiladi;

javoblarni tanlash — ixtiyoriy. Abituriyentlar tanlagan javoblarini Javoblar varaqasining tegishli blokiga chalkashtirmasdan ko‘chiradi. Buning uchun testga ajratilgan vaqtdan tashqari yana 20 daqiqa vaqt beriladi;

Savollar kitobidagi test savollariga to‘g‘ri deb hisoblagan javoblarni Javoblar varaqasining I—III bloklaridagi doirachalarga mos ravishda belgilaydi. Chet tili bo‘yicha test topshirayotgan abituriyentlar mos kelgan tilga tegishli doirachani bo‘yaydi;

har bir test savoliga faqat bitta javob belgilanganda, to‘g‘ri hisoblanib, agar bitta savolga ikki va undan ortiq javob belgilansa, bu javobga ball berilmaydi;

to‘ldirilgan Javoblar varaqasi abituriyentning bilim darajasini belgilovchi hujjatdir;

Javoblar varaqasi to‘g‘ri to‘ldirilishi uchun abituriyent shaxsan javobgardir;

Javoblar varaqasida tegishli doirachalarni noto‘g‘ri belgilagan abituriyentlar e’tirozi ko‘rib chiqilmaydi;

test paytida abituriyentning auditoriyadan chiqishi taqiqlanadi. Auditoriyadan chiqqanlar qaytadan test sinovlariga qo‘yilmaydi;

test davomida abituriyentlarning bir-birlari bilan gaplashishi, javoblarni bir-biriga ko‘rsatish, test materiallarini boshqalarga uzatish, mikrokalkulyator, lug‘at, jadval, kitoblardan, uyali telefon aloqa vositalari va shpargalkalardan foydalanish, test hujjatlaridan nusxa ko‘chirish va boshqalarga ko‘maklashish taqiqlanadi;

test sinovini belgilangan vaqtdan oldin tugatgan abituriyent Savollar kitobi, Javoblar varaqasi va Titul varaqasini auditoriya rahbariga topshiradi, abituriyentlar ro‘yxatidagi o‘z familiyasi to‘g‘risiga Javoblar varaqasi nomerining to‘g‘ri yozilganligini tekshirib, testni tugatgan vaqtini yozib, imzo qo‘yadi, Ruxsatnoma va pasporti bilan auditoriyadan chiqadi;

test uchun ajratilgan vaqt tugagach, auditoriya rahbari bu haqda e’lon qiladi. Abituriyentlar tartib bilan Savollar kitobi, Javoblar varaqasi va Titul varaqasini auditoriya rahbariga topshirib, abituriyentlar ro‘yxatidagi o‘z familiyalari to‘g‘risiga Javoblar varaqasi nomerining to‘g‘ri yozilganligini tekshirib, testni tugatgan vaqtini yozib, imzo qo‘yadi, Ruxsatnoma va pasporti bilan auditoriyadan chiqadi;

abituriyentlar Javoblar varaqasining maxsus joyini bo‘yash bilan auditoriyadagi test jarayonining borishiga o‘z fikrini bildirishi mumkin.

Test sinovlarini o‘tkazish tartibini qo‘pol ravishda buzgan abituriyent o‘quv yurtida o‘qishga noloyiq sanalib, dalolatnoma tuzilib, sinovdan chetlashtiriladi.

3-ILOVA

Abituriyentlar sonining guruhlar va binolar bo‘yicha

TAQSIMOTI

O‘quv yurti ______________
Ta’lim turi ___________			Sana _____________
T/r	Ixtisoslik	Bino	Guruh	Abituriyentlar soni
Qabul komissiyasi raisi ____________________
Mas’ul kotib _____________________________

4-ILOVA

Abituriyentlardan tushgan arizalar haqida

MA’LUMOT

O‘quv yurti __________________
Ta’lim turi ____________						Sana ____________
Ixtisoslik	Kundugi			Sirtqi			Jami
	o‘zb.	rus	jami	o‘zb.	rus	jami
Qabul komissiyasi raisi __________________
Mas’ul kotib ___________________________

5-ILOVA

Respublika olimpiadalarida g‘olib bo‘lgan abituriyentlar

RO‘YXATI

O‘quv yurti ___________________
Ta’lim turi _____________
			Sana _____________
T/r	Maxsus kod	Qayd nomeri	Ixtisoslik	Abituriyentning F.I.Sh.
Qabul komissiyasi raisi ____________________
Mas’ul kotib _____________________________

6-ILOVA

Harbiy qism tavsiyanomasiga ega bo‘lgan abituriyentlar

RO‘YXATI

O‘quv yurti _______________
Ta’lim turi __________
				Sana _________________
T/r	Maxsus kod	Qayd nomeri	Javob varaqasi raqami	Ixtisoslik	Abituriyentning F.I.Sh.
Qabul komissiyasi raisi ________________________
Mas’ul kotib _________________________________

7-ILOVA

Ijodiy imtihon ballari

O‘quv yurti ______________
Ta’lim turi ___________Ta’lim tili __________
			Sana _____________
T/r	Maxsus kod	Qayd nomeri	Javob varaqasi raqami	Ball
Qabul komissiyasi raisi ____________________
Mas’ul kotib _____________________________

8-ILOVA

Abituriyentlar ro‘yxati

O‘quv yurti ______________
Ta’lim turi ___________			Ta’lim tili ____________
Ixtisoslik _____________
Bino ___________			Guruh __________
					Sana _____________
T/r	Maxsus kod	Abituriyentning F.I.Sh.	Javob varaqasi raqami	Topshirish vaqti	Imzo
Qabul komissiyasi raisi ____________________
Mas’ul kotib _____________________________