Prognozlarga ko‘ra, bunday sovuq havo yana necha kun saqlanib turadi

O‘zbekistonda anomal sovuq yana qancha davom etadi? O‘zgidromet matbuot xizmati mutaxassisi Malohat Ro’ziyeva shu haqida intervyu berdi:

O‘zbekistonda so‘nggi kunlarning asosiy muammosi – sovuq, gaz, svet... Gaz va svet bo‘yicha vaziyat tushunarli va ortiqcha umidlarga o‘rin yo‘q. Yagona ilinj – sovuqning chekinishi, havoning ilishi.

– Hozirgi kunda kuzatilayotgan sovuq havoni anomal desak bo‘ladimi yoki normal hisoblanadimi?
– Mamlakatimiz hududida oxirgi 10- kundagi sovuq ob-havoni Sibir hududlaridagi sovuq antitsiklon periferiyasi belgilab turibdi. Bunda juda yuqori bosimli maydon anomal sovuq havoni olib keldi.
Bu vaqtda kechalari 5-10°, shimol va cho‘l zonalarida 12-17° gacha sovuq harorat qayd etilyapti. Kunduzlari 0-5° kuzatilyapti.
Bu – o‘rtacha ko‘p yillik qiymatlardan 10–12 daraja past degani. O‘rtacha ko‘rsatkichlardan past havo harorati uzluksiz ravishda 10 kun davom etayotgani uchun bu anomal hisoblanadi.
– Prognozlarga ko‘ra, bunday sovuq havo yana necha kun saqlanib turadi?
O‘zgidromet prognozlariga ko‘ra, 9–12 yanvar kunlari respublikamizda havo-harorati asta-sekin ko‘tariladi. Bunda kechasi 2 daraja sovuqdan 3 daraja iliqqacha, kunduzlari esa 5–10 daraja iliqqacha ko‘tarilib boradi.
– Aynan mana shunday sovuq havo qaysi yillarda kuzatilgan?
– Belgilangan davrda bunday sovuq, ya'ni 10–12 daraja past havoning kuzatilishi tabiiy, oldingi yillarda ham kuzatilgan. Faqat bu qadar davomiy bo‘lmagani uchun sezilarli kechmagan. Masalan, 2014- yil yanvar oyining 11- kunida 6–8 daraja sovuq kuzatilgan. 2008-yilda esa umumiy yanvar oyida esa harorat o‘rtacha me'yordan 7 daraja past bo‘lgan. 2012-yilda qisqa muddatli sovuqlar kuzatilgan.Bizda hozirgi kunda kuzatilayotgan darajadagi sovuqlar oxirgi 10 yilda qayd etilmagan. Ya'ni hozirgiday davomli, qor parchalari kristallashgan, bulduruqli havo kuzatilmagan. Shuning uchun ham anomal sovuq dedik.