1 Мавзу: “Технология фанини ўқитиш методикаси” фани ва унинг вазифаси

Меҳнат таълимининг кўргазмалилик методлари
Кўргазмали методлар – бу кўрсатмали куролларни намойиш қилиш меҳнат усулларини кўрсатиш; ўқувчиларнинг мустақил кузатишлари; ўқув-ишлаб чиқариш экскурсиялари.
Кўрсатмали қуролларни намойиш қилиш (кўрсатиш) методи ёрдамида ўқувчиларда меҳнат ҳаракатларининг муайян ва аниқ образи шаклланади. Улар унга тақлид қиладилар ва ўз ҳаракатларини қиёслайдилар. Мазкур методнинг қўлланилиши касб таълимида кўргазмалик тамойилининг яққол намунаси бўлиб ҳисобланади. Касб таълими дарсларида кўрсатмали қуролларнинг турли хил ва шаклларидан фойдаланиш ўқитувчининг тушунтиришларини яхши идрок қилиш ҳамда ўзлаштиришларга, малакаларнинг мустаҳкам шаклланишига ёрдам беради. Плакатлар, схемалар, моделлар, макетларнинг намойиш қилиш билан бир қаторда ҳаракатдаги иш қуроли, асбоблар, мосламалар хомашёлар, буюмларнинг намуналари ва ҳоказоларни кўрсатиш ҳам катта аҳамиятга эга.
Кўрсатмали қуролларни намойиш қилишдеганда ўрганилаётган обектни кўрсатмали-ҳиссий идрок этишга асосланган касб таълими методи тушунилади. Кўрсатмалилик методи ўқув материалини баён қилиш жараёнида қуйидагиларни намойиш қилишни тақозо этади:

1. 
   Натурал намуналар (тикув машиналари, механизмлар, мосламалар, андозалар, тайёр тикув буюмлари ва бошқалар).
   
2. 
   Текис ва ҳажмдор қўлланмалар (плакатлар, схемалар, жадваллар, диаграммалар, макетлар, моделлар ва бошқалар).
   
3. 
   Экранли қўлланмалар (диапозитивлар, слайдлар, ўқув кинофилмлари, электрон дарсликлар).
   

Кўрсатма қуроллар намойиш қилинганда муайян изчиллик бўлишига ўқувчилар томонидан кузатилаётган обектни баён этилаётган материал мазмуни билан боғлашга эътибор берилади.
Натурал намуналар намойиш қилинаётганда, агар йирик обектлар (тикув машиналар, тикув буюмлари, андозалар, мосламалар)дан иборат бўлса, касб таълими ўқитувчиси уларни кўрсатишни бевосита иш жойида олиб бориши мумкин.
Текис ва ҳажмдор қўлланмалар (улар, одатда, йирикроқ масштабда берилади)ни ўқитувчи бевосита иш жойидан туриб намойиш қилиши мумкин. Ҳажмдор қўлланмаларнинг тузилиши соддароқ кўринишда бўлади, чунки унинг ички тузилиши ва ҳаракат жараёни кўрсатилганда осонроқ тушунилади.
Таълимнинг кўргазмали методлари ўзида муҳим дидактик талабни акс эттирувчи усуллар мажмуасини ифодалайди. Ҳозирги даврда замонавий дидактика кўргазмали воситаларни қўллашнинг энг юқори таълимий, тарбиявий ҳамда шахс сифатларини ривожлантирувчи вариантларини қўллашни талаб қилмоқда. У педагогларни кўргазмали воситаларни қўллаш баробарида таълим олувчиларнинг асбтракт тафаккурини ҳам ривожлантиришга йўналтиради.
Кўргазмали таълим методининг хусусияти унинг ҳамма вақт маълум даражадаги оғзаки методлар билан омухта шаклда берилишидир. Оғзаки баён ва кўргазмалиликнинг биргаликда олиб борилишига бўлган эҳтиёж обектив борлиқни билишнинг диалектик йўли ижодий мушоҳада, абстракт тафаккур ҳамда амалиётнинг бирлигини тақозо этишидан келиб чиқади. И.П.Павловнинг биринчи ва иккинчи сигнал тизимлари тўғрисидаги таълимоти обектив борлиқни билишда уларни биргаликда қўллаш заруратини таъкидлайди. Биринчи сигнал сиситэмаси орқали сезиш сўз билан уйғун равишда узатилиши, иккинчи сигнал тизимининг фаол ишлаши билан бориши лозим.
Л.В.Занков томонидан оғзаки нутқнинг кўргазмалилик билан боғлиқ равишда амалга оширишнинг қуйидаги шакллари ўрганилган:

• 
  ўқитувчи сўз воситасида таълим олувчиларнинг обектни кузатиш жараёнини бошқаради. Бевосита акс етувчи хусусиятлари, қиёфаси ва муносабатлар тўғрисидаги хулосалар кузатиш жараёнида обектнинг ўзидан олинади;
  
• 
  ўқитувчи таълим олувчиларнинг обектни кузатиш натижалари ҳамда улар эга бўлган билимларга таяниб, бевосита кўриб бўлмайдиган алоқаларни англаб этишларини таъминлайди;
  
• 
  обектнинг қиёфаси, унинг бевосита кўриш мумкин бўлган хусусиятлари тўғрисидаги маълумотларни таълим олувчилар ўқитувчининг сўзларидан билиб оладилар, кўргазмали восита эса сўзлар воситасида маълум қилинган белгиларни аниқлаштириш ва аниқлаштиришга хизмат қилади;
  
• 
  таълим олувчиларнинг кузатиш натижаларидан келиб чиққан ҳолда педагог кўргазма воситадаги бевосита кўринмайдиган алоқалар тўғрисидаги маълумот беради, ёки алоҳида белгиларни ўзаро боғлайди, умумлаштиради.
  

Демак, оғзаки нутқ ва кўргазмалиликни ўзаро боғлиқ ҳолда амалга оширишнинг турли шакллари мавжуд экан. Уларнинг қайсидир биттасини афзалроқ деб баҳолаш мумкин эмас, зарур шаклни эса ҳар бир машғулот учун белгиланган вазифалар, мавзу мазмуни, мавжуд кўргазмали воситалар хусусиятлари, шунингдек таълим олувчиларнинг тайёргарлик даражасидан келиб чиқиб белгилаш лозим.