11-Tema: Tekst ústinde islew. Durıs jazıwǵa baylanıslı ámeliy jumıslar

11-Tema: Tekst ústinde islew. Durıs jazıwǵa baylanıslı ámeliy jumıslar

Tekst: Ernazar keneges penen ushırasıw.
Ernazar alakózdiń zamanında keneges Ernazar biy degen adam bolıptı. Ol da zamanındaǵı adamlar arasında belgili adam bolǵan. Bir kúni usı Ernazar bir atlı qus salıwǵa shıǵıptı. Ernazar biy kúni menen at ústinde sandalıp qus salıptı, biraq qansha sarsılıp júrse de, ań taba almay, kesh bolıp baratırǵanda awılına qaytıp kiyatırsa, aldınan bir irirekten kelgen, qara páreń jigit shıǵıptı. Ol piyada júrip qus salıp júr eken. Ol piyada júrip-aq qırǵawıl, qoyan, túlkilerden ań túsiripti. Ernazar biy jańaǵı piyada jigitten uslagan ańların basıp almaqshı boladı da, attı qattıraq aydap, qamshı menen kerilip arqasına bir uradı da atqa qaqtırıp ketedi. Piyada adam abaylamaǵan kisi usap, artına burılıp ta qaramay júre beredi.Buǵan Ernazar biydiń ashıwı kelip:
– Áy zańǵar adambısań yamasa shaytanbısań? – dep dawıslap ústine jáne at aydaydı. Piyada jigit artınan kelip qalǵan attıń suwlıǵınan uslap tartıp jiberedi. At omaqazan atıp jıǵılıp, ústindegi Ernazar biy ádewir jerge ushıp ketip, tura almay atırǵanda, attıń shılbarı menen ayaq-qolın baylap, kishkene oqpanǵa shalqasına taslap, qusın janına qoyıp, attı minip ketip qaladı. Solay etip, bir úyge barıp qırǵawıl, qoyandı kóp etip astırıp, bir adamdı Ernazar biyge jiberip, «Tez ákelegór qosshım», - dep tapsıradı. Kóp waqıttan keyin Ernazar biydi ákeledi. Jayǵasıp otırıp alǵannan keyin jańaǵı jigit Ernazar biyge qarap: – Kórgensiz jigit ekenseń, qamshı menen urdıń, atqa qaqtırdıń, ekinshi ústime at aydaǵanıń ne qılǵanıń. «Ózińdi er bilseń, basqanı sher bil» - degen xalıq naqılın esitpediń be? Sen at minip júrgen menen shamańdı bayqawıń kerek. Biz Ernazar alakóz degen bolamız, - dep taǵı da kóp sózler menen oǵan násiyat berip keyiydi. Ernazar biy qattı qısınıp, atın hám de ústindegi melle shapanın Ernazar alakózge sawǵaǵa berip, keshirim sorap tarqasıptı.