11-Tema: Tekst ústinde islew. Durıs jazıwǵa baylanıslı ámeliy jumıslar

Tekst:
Burınǵı ótken zamanda Jiyrenshe sheshenniń waqtında patshanıń bir aǵayini bolıptı. Ol Jiyrensheniń aqıllılıq, sheshenlik penen patshadan alǵan dúńyaların qızǵanadı eken. Ol bir kúni patshaǵa barıp: «Jiyrenshege bergen aqshańnan maǵan da ber», - depti. Olay bolsa, - depti patsha, men sizge bir sóz aytaman, eger de sonı sheshseńiz, sizge de mıń tilla beremen. – «Ótirik penen ırastıń arası qansha jer», - sonı aytıp ber – dep soraptı. Aǵayini ári oylanıp, beri oylanıp, úyine qaytıptı. Úyine kelipti de, bir neshe kúnge shekem taba almay, aqır sońında, Jiyrenshege barıp soraptı. Jiyrenshe oǵan: «Ótirik penen ırastıń arası - tórteli, óytkeni, awzıń menen ótirikti sóyleseń, al sol ótirikti ıras sózdey etip, qulaǵıń menen esiteseń», - deydi. Patshanıń aǵayini erteńine azanda patshanıń aldına baradı. Barsa patshaǵa azanǵı sálemdi beriw ushın Jiyrenshe kelip otır eken. Ol patshaǵa Jiyrensheniń aytqanların aytıp beredi. Bunı patsha Jiyrenshe aytqanın biledi hám bilse de oǵan taǵı bir soraw beripti.
- Bizler Jiyrenshe ekewimiz, - depti patsha, óz-ara sóylesemiz, sen sonı aytıp bereseń.
- Jaqsı, boladı, - depti patshanıń aǵayini. Sóytip qarap otıradı. Bir waqıtları patsha basına qolın tiygizedi, al Jiyrenshe bolsa qolı menen tilin uslaptı. Patsha: - Bizler ne sóylestik? – dep soraptı aǵayininen. - Haw, sizler hesh nárse sóylesken joqsızlar ǵoy, tek birewińiz qolıńız benen basıńızdı, al birewińiz tilińizdi usladıńız, - depti aǵayini. -Sen hesh nárse bilmeydi ekenseń, bizler jaqsı sóylestik: Meniń qolım menen basımdı uslaǵanım: Bas ne menen tutıladı? – dep soradım. Al Jiyrenshe bolsa tilin kórsetti, yaǵnıy adam oylanbay sóylese tilinen tutıladı – dep juwap qaytaradı. Sen bunnan bılay da bunday islerdi isleme, dep aǵayinin quwıp jiberipti. Al Jiyrenshe bolsa bul kúni de patshadan mıń tilla alıp úyine qaytıptı