12- ámeliy: Násilli buǵalar ushın racion dúziw

12- ámeliy: Násilli buǵalar ushın racion dúziw


Sabaqtıń maqseti: Násilli buǵalardı norma tiykarında baǵıwdı hám olarǵa kúnlik ot-jemlik ratsionın dúziwdi úyreniw.
Sabaq ushın kerekli jihazlar: Azıq norması, jergilikli ot-jemler kuramı hám olardıń toyımlılıǵı kórsetilgen kitaplar.
Sabaqtıń mazmunı hám onı ótkeriw metodikası: Násilli buǵalardan alınatuǵın urıqtıń sıpatı birinshi gezekte olardı baǵıw sharayatına hám usılına baylanıslı. Násilli buǵalardı baǵıwdı páseytiriw yamasa kúsheytiriw maqsetke muwapıq emes. Sebebi kúshli jemler menen hámme uaqıt toydırıp baǵıw hám motsion shólkemlestirilmewi olardıń denesiniń hám jınısıy organlarınıń may basıp ketiwine alıp keledi. Bunıń nátiyjesinde urıq beriw qábileti jamanlasadı. YAmasa kerisinshe sıpatsız ot-jem menen baǵıw olardıń organizmin bosastırıp, kúshsizlendirip qoyadı. Bunıń aqıbetinde urıqtıń sıpatı buzıladı, buǵalar arıqlap, keselliklerge shalınıwshań bolıp qaladı. Solay eken, násilli buǵalardı baǵıwda, ilimiy jaqtan tiykarlanǵan ıstıqpallı usıllar tiykarında ratsion dúziw kerek boladı. Ol tómendegishe bolıwı múmkin. Máselen, buǵalar qashırıw jumıslarında paydalanılmaytuǵın “dem alıs” dawirinde olardıń hár 100 kg tiri salmaǵı esabına 1,1 azıq birligi hám 110 g sińiriletuǵın protein beriw múmkin.
Násilli buǵalardan áwlat alıw ushın paydalanıw uaqtında olardıń hár 100 kg tiri salmaǵınıń esabına 1,3 kg azıq birligi hám 140 g sińiriletuǵın protein beriwdi rejelestiriw unamlı nátiyje beredi.
Násilli buǵalardı qıs aylarında baǵıw.
Qıs aylarında násilli buǵalardıń hár 100 kg tiri salmaǵı esabına 1-1,5 kg bede pisheni, 1-1,5 kg tamır miyweli, 0,8-1,0 kg silos beriw múmkin. Hár bir buǵanıń arıq-semizligine qarap 1 sutkada 4 kg nan 8 kg ǵa shekem kúshli jem beriw usınıs etiledi.
Barlıq xojalıqlarda hám jasalma urıqlandırıw punktlerinde baǵılıp atırǵan buǵalardıń ratsionına (urıq alıw dáwirinde) 3-4 kg geshir, 300-400 g maydalanǵan dán (arpa, sulı, biyday) hám 150-200 g qamır turıshtı qosımsha hálde kiritiw jaqsı nátiyje beredi.
Násilli buǵalardı jaz aylarında baǵıw.
Jaz aylarında ilájı barınsha barlıq xojalıqlarda násilli buǵalardı jaylawlarda baǵıw, kóbirek háreket qıldırıw hám talap etilgen uaqıtta jem hám mineral qosımshalar beriw usınıs etiledi.
Qadaǵalaw ushın sawallar:
1. Buǵalardıń hár 100 kg tiri salmaǵına neshe kg pishen beriledi?
2. Buǵalardıń hár 100 kg tiri salmaǵına neshe kg silos beriledi?
3. Buǵalardıń hár 100 kg tiri salmaǵına neshe kg ot-jemlik láblebi beriledi?
4. Buǵalardıń hár 100 kg tiri salmaǵına neshe kg aralas jem beriledi?
5. Urıq alıw dáwirinde buǵalarǵa qosımsha qanday azıqlar beriw usınıs etiledi?
Laboratoriyada sawın sıyırlar ushın optimal azıq racionın dúziw temasındaǵı laboratoriya jumısın: (2-saat)
PASPORTI:
Sabaqtıń maqseti: Awıl xojalıq haywanların norma tiykarında baǵıwdı hám olarǵa kúnlik ot-jem racionın dúziwdi úyreniw.
Sabaq ushın kerekli jihazlar: Ximiyalıq quramı hám toyımlılıǵı anıqlanǵan ot-jemlerden alınǵan úlgi.