16-мавзу: Ўқитишнинг метод ва воситалари (davomi) Режа

Ўқитиш методлари. Педагогика назарияси амалиётида ўқитиш методларининг жуда катта бойлиги тўпланган уларни танлашда турли шароитлар, ўқитилаётган фаннинг характери, ўқувчи-талабаларнинг ёш хусусиятлари, олдинги тайёргарлик даражаси ва ҳакозолар ҳисобга олинади.
Форобий ўзининг ўқитиш усуллари ҳақидаги ғояларида ўқувчи- талабаларга турли билимлар бериш билан бирга, мустақил ҳолда билим олиш йўлларини ҳам кўрсатиш, уларни билимларнинг зарурлигига шак-шубҳасиз ишонтириш кераклигини уқтиради.
Қомусий олимлар фойдаланган таълим усулларини бир неча гуруҳга ажратиш мумкин. Булар: кўргазмали тажриба методлари (Ибн Сино), билимларни баён қилишнинг савол-жавоб методлари (Абу Райхон Беруний, ал- Хоразмий), кўникма ва малакаларни шакллантириш методлари (Форобий, ал- Хоразмий) ва бошқалардан иборат.
Таълим методларини танлаш ўқитувчи дарсда ҳал қилиши мўлжалланган масалага боғлиқ бўлади. Чунончи, янги материални баён этишда бир хил методлар қўлланса, уни мустахкамлашда иккинчи ва мавзуни умумлаштиришда яна бошқа хил методлар қўлланилади. Дарснинг турли босқичларида пухта ўйлаш ва самарали методларни қўллаш жуда муҳимдир. Ўқитувчи дарснинг энг бошида 4-5 дақиқа умумий сўрашни амалга оширади ва ўқувчи-талабаларнинг қайси гуруҳи ўтган дарс бўйича етарли даражада ўзлаштирмаганини аниқлайди ва кейинги сўрашда ўқувчи-талабаларнинг диққат эътиборини энг аввал ана шу масалага қаратади. Дастлаб саволларга батафсил жавоб бера оладиган ўқувчи-талабалардан сўрайди. Натижада гуруҳнинг бир қисми учун мураккаблик қилган материал тушунарли бўлади. Бу метод ўқувчи-талабаларнинг машғулотлардаги нуқсонларини пайқаш ва шу заҳоти бартараф этишда ёрдам беради. Мазкур методнинг самарадорлиги ҳам айнан шунда.
Гарчи ҳар бир педагогнинг ишида анчагина метод ва услублар мавжуд бўлсада, уларни қўллашдан кўзланадиган мақсад тарбияланувчининг таълимий ишларини фаоллаштириш бўлмоғи лозим. Педагогнинг вазифаси самарали методлардан фойдаланиб ўқувчи-талабаларда фаоллик сифатларини таркиб топтириш ва қийинчиликларни енгишга ўргатишдир. Бу жуда муҳим бўлиб, ўқувчи-талабаларда эътиқодни, эътиқодни эса амалий фаолиятга, ҳатти- ҳаракатга айлантиради ва ўқитиш жараёнининг ишини осонлаштиради.
Ҳозирги ўқитиш жараёнида қўйиладиган талаблар нима ва ўқувчи- талабаларда дарсда қизиқувчанликни оширадиган, уни янгилик элементлари билан бойитиш учун нима қилиш керак?
Ҳозирги замон таълим-тарбия тизими фақат инсоният аниқлаган билимларни ўзлаштиришгина эмас, балки жамият энди ҳал қилиши ва бунда бугунги талаба ва ўқувчилар қатнашиши лозим бўлган масалалар билан танишишини ҳам талаб қилади. Бундай масалалар космосни ўзлаштириш, атом энергиясидан тинчлик мақсадларида фойдаланиш, чўлларни ҳосилдор ерларга ва боғ-роғларга айлантириш, қишлоқ хўжалигини интенсивлаштириш ва ҳакозолардан иборат бўлиши мумкин. Халқ хўжалиги ва фан-техниканинг ҳамма соҳаларида жуда катта бурилишлар рўй бермоқда ва ҳар бир ўқитувчи ўзининг тарбияланувчиларини ўзи ўқитадиган фан соҳаси бўйича навбатдаги қайта қурилишлар ва эришилган ютуқлар билан кенг таништириши керак. Бу ишни ўқувчи-талабаларга мос методда ва ўқув дастурига мувофиқ амалга ошириш лозим.
Мазкур талабнинг иккинчи хусусияти педагогнинг ўқувчи-талабалар фикр доирасини кенгайтиришга доимо ғамхўрлик қилишидир.
Шундай қилиб, таълим, яъни ўқитиш методи педагог ва талабалар назарий ҳамда амалий билиш фаолиятининг таълимий вазифаларини бажаришга қаратилган тадбирдир. Унга қуйидаги муайян талаблар қўйилади:

1. 
   Ўқув материалини ўрганишнинг ўқитувчи тавсия этган методи ўқувчи-талабаларда фикрлашнинг диалектик қарашлари, иродавий хусусиятлари ва хулқининг шаклланишига олиб бориши керак. Ана шу талаб нуқтаи назаридан метод тарбиявий тусда бўлиши лозим.
   
2. 
   Ўқитиш методининг илмий асоси яққол ва аниқ бўлиши зарур. Шундагина ўқитувчи мазкур метод орқали қандай масалалар қўйилиши ва ҳал қилиниши мукинлигини, қандай масалаларни ҳал қилиб бўлмаслигини кўра олади.
   
3. 
   Ўқитишнинг тизимлилиги унинг самарадорлигини белгилайди.
   
4. 
   Ўқитиш методининг тушунарлилиги ўқувчи-талабалар учун қабул қилиниши ва қўлланиши, ўқув материалини ўрганишнинг методи эса билимларни ўзлаштиришнинг имкониятларига мувофиқ бўлиши шарт.
   
5. 
   Ўқитишнинг онглилик ва фаоллик зарурияти ниҳоятда жиддий талабдир.
   
6. 
   Билимларнинг пухталиги ва асослилиги ҳам ҳал қилувчи аҳамиятга эга.
   
7. 
   Ўқитиш методида назарий ва амалий ҳодисаларни мувофиқлигига эришмай ҳам дарс ўтиб бўлмайди.
   

Ҳар қандай методдан бирор мақсадга эришиш кўзда тутилади ва шунинг учун у қандайдир мақсад қўйишни, илмга эришиш бўйича фаолият методи ана шу фаолиятни амалга оширишда ёрдам берадиган воситаларни билишни тақозо этади. Ҳар қандай фаолият унинг объектини билишни талаб қилади. Ниҳоят, метод мақсадга олиб бориши керак, акс холда, у қўйган мақсад учун яроқсизлигини, ё бўлмаса, бу ҳолатда унинг умуман нотўғри қўлланганлигини эътироф этиш лозим. Шундай қилиб, ҳар қандай таълим методини қўллашдан кўзланган мақсадни, шу мақсадни амалга ошириш фаолиятини ва фаолиятни бажариш воситаларини талаб қилади. Бу воситалар фаолият объекти тўғрисидаги предметли ёки ақлий билимлар, қўйилган мақсадга албатта эришишдан иборат бўлиши мумкин. Буларнинг ҳаммаси ҳам қандай методга нисбатан мақсадга мувофиқдир, лекин ўқитиш методлари учун етарли эмас.
Таълим, яъни ўқитиш методларини қуйидагиларга бўлиш мумкин:

• 
  тафаккур, хотира, диққат ва ҳаёлнинг алоҳида операцияларини таркиб топтирадиган ва фаоллаштирадиган методлар;
  
• 
  фикрлаш фаолиятида муаммоли ва изланишли вазиятларни вужудга келтирадиган методлар;
  
• 
  ўқувчи-талабаларнинг ўқув материалини ўзлаштириш билан боғлиқ кечинмалари ва ҳиссиётларини фаоллаштирадиган усуллар;
  
• 
  назорат ва ўқувчи-талабаларнинг ўзини-ўзи назорат методлари;
  
• 
  ўқитиш жараёнида ўқувчи-талабаларнинг жамоавий ва шахсий ўзаро муносабатларини бошқариш методлари.
  

Сўнгги йилларда педагогика фани ва педагогик амалиётда таълим методлари муаммосига алоҳида эътибор берилмоқда. Шу муаммо бўйича анчагина тадқиқотлар олиб борилмоқда, илғор педагогик амалиётда ўқитишнинг самарали методлари ва уларнинг тизимларини қўллашнинг талайгина йўллари топилади. Аммо таълим-тарбия жараёнига қўйилаётган янги талаблар ўқитишнинг методларини янада такомиллаштиришни талаб қилмоқда.
Юқорида қайд этилганидек, таълимнинг мазмунига қўйилаётган янги талаблар ёш авлодга, хусусан, фанларнинг асослари бўйича юксак илмий назарий билимлар беришдан иборат бўлиб, бу иш назарий билиш методларига, шу жумладан, ўқувчи-талабаларнинг мантиқий фикрлаш, мантиқий мулоҳазаларни бажариш методлари билан қуроллантиришни тобора кучайтиришни тақозо этмоқда.
Таълим методларининг турлари жуда кўп, уларнинг сонини аниқ белгилаб бўлмайди. Улар педагогик амалиёт даврида тинмай бойиб бораверади. Таълим методлари ўқитишнинг мантиқий томонларига, компонентлари ва вазифаларига қараб таснифланади.
Юқоридагилардан умумий хулоса шуки, педагогика назариясида таълим яъни, ўқитиш методларини таснифлашга ҳозиргача ягона ёндашиш мавжуд эмас. Ҳозирги кунда дидактикада ўқитиш методларини билимлар манбаи бўйича, дидактик мақсадлар бўйича, билиш фаолиятининг савияси бўйича фарқлаш энг кўп тарқалган.