Balalardıń tilin ósiriw

4. Balalardıń kúndelik sóylew tilindegi grammatikalıq
qátelerdi dúzetiw metodikası
Balalar sóylew tilin grammatikalıq jaqtan qáliplestiriw turaqlı, úzliksiz protsess bolıp tabıladı. Balalar sóylew tiliniń jaǵdayın tek shınıǵıwlarda ǵana baqlap barmastan, bálkim olardıń kundelik turmıs protsesinde de baqlap barıw kerek.
Óz waqtında dúzetilmegen grammatikalıq qáte bala sóylew tilin bekkemlenip, onı tıńlaytuǵın basqa basqa balalar sóylewinde de grammatikalıq qátelerdiń payda bolıwına sebep boladı.
Arnawlı shınıǵıwdan tısqarı jumıs balalar sóylew tilindegi grammatikalıq qátelerdi saplastırıwǵa qaratılıwı kerek.
Bala sóylew tilindegi qátelerdi doslıq, kishipeyillik penen dúzetiw kerek. Hesh waqıt bala qáteni óz sózlerinde tákirarlamawı kerek, jaqsı grammatikalıq forması durıs bolǵan sózdi, gápti ápiwayı matematikalıq túsiniklerin rawajlandırıw shınıǵıwlarında, tálimli oyınlarda tákirarlaw orınlı, tárbiyashı barlıq shınıǵıwlarda bala sóylew tilin baqlap barıwı hám grammatikalıq qátelerdi dúzetiwi shárt, ásirese, ápiwayı matematikalıq túsiniklerin rawajlandırıw shınıǵıwı balalardan anıq sóylewin Tálap etedi. Balalar bul shınıǵıwlarda predmetlerdi (nárse-buyımlardı) sanaydı hám háreketlerin sóz benen bayanlaydı. Sonıń ushın tárbiyashı balalardıń sanlardı durıs ózlestiriwin baqlap barıwı kerek. Máselen, bes geshirge eki geshirdi qosamız hám t.b.
Bala sóylew tilindegi grammatikalıq qátelerdi shınıǵıw barısında jeterli hawaz tonında, basqa balalarǵa estitiletuǵın etip durıslaw kerek. Bazı jaǵdaylarda aytıp turıwdan, ásirese, úlken gruppada dizimnen ótkerilgen: «Sen jáne nadurıs ayttıń!»; eske túsiriwshi sorawdan: «Sen «termometr» sózin qalay aytıwdı esten shıǵarıpsań yaki ım-isharadan paydalanadı.


Tákirarlaw ushın sorawlar
1. Sóylew tilin grammatikalıq jaqtan qáliplestiriwdiń wazıypaları hám mazmunı nelerden ibarat?
2. Balalar sóylew tilin grammatikalıq jaqtan qáliplestiriwde tárbiyashı aldında qanday wazıypalar turadı?
3. Balalar sóylew tilinde ushıraytuǵın morfologiyalıq hám sintaksislik qáteler hám olardıń sebepleri ne?
4. Tárbiyashı balalar sóylew tilinde grammatikalıq qátelerdi eskertiw, dúzetiw maqsetinde shólkemlestiriletuǵın arnawlı shınıǵıwlarda qanday ulıwma metodikalıq kórsetpelerdi basshılıqqa aladı?
5. Grammatikalıq durıs sóylew tilin qáliplestiriw shınıǵıwlarında qanday úyretiw usıllarınan paydalanıladı?
6. Túrli jas toparlarında balalar menen grammatikalıq qátelerdi dúzetiwde qanday tálimli oyın hám shınıǵıwlar ótkiziledi?