Bekjan shayir dóretiwshlligi joba

Bekjan shayırdıń lirikaları
Házirge shekem bizge Begjan shayırdıń «Kúnlikshiligi qurısın», «Mende ógiz arba joq», «Harmańlar», «Digildik», «Sálem deńiz», «Kók ózek», «Qálli quw», «Usen shıyıq», «Ulım qızǵa», «Eshekǵanam»usaǵan onlaǵan qosıǵı belgili.Begjan shayırdıń qosıqları bizge jazba túrde jetip kelmegen. Bular xalıq yadında saqlanıp kelingen qosıqlar.
Begjan shayırdıń «Kók ózek» degen qosıǵı bar. Kók ózek, Aqbetkey shayırdıń tuwılıp ósken jeri, balalıǵı ótken jerler. Shayır qosıǵında usı Kók ózek jeriniń jeri jaqsı, onnan kógerip ósken dáni, nanı mazalı, Kókózektiń suwı mazılı dep táripleydi. Tábiyatı malǵa da, adamǵa da payızlı dep maqtanısh etedi. Biraq shayır ol jerlerden erkin mákanlap, paydalana almaydı. Ol jerlerdi bay, hámelderlar bólisip alǵan. Begjan qusaǵan jarlı adamlarǵa bir taban da bos jer joq. Sol sebepli xalıqtıń kewli ǵamlı, dártli ekenligin kórsetedi.
Qoy eshkige tayın sókli jantaǵıń,
Bir taban jer tiymey ózim sharshadım,
Jerińde kemis joq, biraq zalım kóp,
Sonlıqtan zárúr ǵoy bozlı topıraǵıń
Jaqsımurat jayǵastırar jerińdi,
Bir taban jerińe inkar qılıp elińdi,
Sonlıqtan biz bir shıǵır jer ekpedik,
Kókózek jasay ber boldım sózimdi.
Avtordıń usı «Kókózek» qosıǵına únles «Mende ógiz arba joq» qosıǵı bar. Qosıqta mal -múlksiz jarlı xalıqtıń turmıs tirishiligi sóz etiledi. Jarlı adam egin egiw ushın jap qazadı, jer awdaradı. Jerge tógin tógeyin dese, suwǵarayın dese ógiz arbası joq. Egin egiw payıtı kelgen waqıtta barlıq jarlılar egin ege almay, egislik waqıt ótip ketedi. Bayǵa barsa, bay ógiz arbasın bermeydi. Jarlı da bolsa beretuǵın zatı joq. Xalıqtıń usınday joqshılıqtan albırap, sasqalaqlawları sóz etiledi.
Jarlı jarlını qıymaydı,
Haramxor bay ońbaydı,
Bul jaqsı ómir bolmaydı,
Qapalıqtan aytıp júrdim.