Chiqindilar to’G’risidagi qonun bandlarini o’rganish reja

11-modda. Mahalliy davlat hokimiyati organlarining chiqindi bilan bog‘liq ishlarni amalga oshirish sohasidagi vakolatlari
Mahalliy davlat hokimiyati organlari:
chiqindi bilan bog‘liq ishlarni amalga oshirishga oid umumdavlat dasturlarini bajarishda ishtirok etadilar;
chiqindi bilan bog‘liq ishlarni amalga oshirishga oid mahalliy dasturlarni tasdiqlaydilar;
chiqindi bilan bog‘liq ishlarni amalga oshirish sohasida tadbirkorlik faoliyatini rivojlantirish uchun sharoit yaratib beradilar;
chiqindi bilan bog‘liq ishlarni amalga oshirish obyektlarini tegishli hududga joylashtirish masalalarini hal etadilar;
chiqindi bilan bog‘liq ishlarni amalga oshirish to‘g‘risidagi qonun hujjatlariga rioya etilishi ustidan nazorat qiladilar;
chiqindilarni to‘plash va utilizatsiya qilish korxonalari tashkil etilishiga ko‘maklashadilar;
qonun hujjatlariga muvofiq boshqa vakolatlarni amalga oshiradilar.

12-modda. Fuqarolar o‘zini o‘zi boshqarish organlarining chiqindi bilan bog‘liq ishlarni amalga oshirish sohasidagi vakolatlari
Fuqarolarning o‘zini o‘zi boshqarish organlari:
chiqindi bilan bog‘liq ishlarni amalga oshirish obyektlarini tegishli hududda joylashtirish masalalarini hal qilishda ishtirok etadilar;
aholi punktlari sanitariya jihatidan tozalanishiga hamda maishiy-ro‘zg‘or chiqindilari to‘plab olib ketilganligi uchun to‘lovlar vaqtida to‘lanishiga ko‘maklashadilar;
chiqindi bilan bog‘liq ishlarni amalga oshirish obyektlarining sanitariya va ekologik holati ustidan jamoat nazoratini amalga oshiradilar;
qonun hujjatlariga muvofiq boshqa vakolatlarni amalga oshiradilar.


13-modda. Fuqarolarning chiqindi bilan bog‘liq ishlarni amalga oshirish sohasidagi huquq va majburiyatlari
Fuqarolar:
chiqindi bilan bog‘liq ishlar amalga oshirilayotganda hayotlari va sog‘liqlari uchun xavfsiz sharoitlar bilan ta’minlanish;
o‘zlari yashayotgan joylarda xavfli chiqindilar bor yoki yo‘qligi to‘g‘risida, loyihalashtirilayotgan, qurilayotgan, shuningdek ishlab turgan chiqindi bilan bog‘liq ishlarni amalga oshirish obyektlarining xavfsizligi haqida belgilangan tartibda to‘liq va aniq axborot olish;
chiqindi bilan bog‘liq ishlarni amalga oshirish obyektlari qurilishiga doir qarorlarning loyihalari muhokamasida ishtirok etish;
chiqindi bilan bog‘liq ishlarni amalga oshirish to‘g‘risidagi qonun hujjatlari buzilganligi natijasida hayoti, sog‘lig‘i va mol-mulkiga yetkazilgan zararni to‘latish;
chiqindi bilan bog‘liq ishlarni amalga oshirish obyektlarining sanitariya va ekologik holati ustidan jamoat nazoratini amalga oshirishda ishtirok etish huquqlariga egadirlar.
Fuqarolar:
chiqindi bilan bog‘liq ishlarni amalga oshirayotganda belgilangan sanitariya normalari va qoidalariga, boshqa talablarga rioya qilishlari;
maishiy-ro‘zg‘or chiqindilarini to‘plab olib ketish bilan shug‘ullanuvchi korxonalar va tashkilotlar xizmatidan foydalanganlik uchun to‘lovlarni belgilangan tartibda to‘lab borishlari shart.
Fuqarolar chiqindi bilan bog‘liq ishlarni amalga oshirish sohasida qonun hujjatlariga muvofiq boshqa huquqlarga ega bo‘lishlari hamda zimmalarida boshqa majburiyatlar bo‘lishi mumkin.