Электр қурилмаларини эксплуатация қилишда хавфсизлик техникаси қоидаларини тасдиқлаш тўҒрисида

4-§. Муфталарга қуйиладиган таркиблар билан ишлаш
288. Муфталарга қуйиладиган таркиблар қопқоғи ва жўмраги бўлган махсус металл идишда иситилиши зарур. Очилмаган банкадаги таркибларни иситиш тақиқланади.
289. Муфталарга қуйиладиган қайноқ таркиблар ва кавшар билан ишлаганда брезент қўлқоплардан ва ҳимоя кўзойнакларидан фойдаланиш зарур.
Кийимнинг енги қўлқоп устига чиқарилиб, билакда бойланган бўлиши шарт ёки тирсаккача узунликдаги қўлқопдан фойдаланиш шарт. Қайноқ таркибли ва кавшарли идишни қўлдан-қўлга узатиш тақиқланади. Уларни узатишда ерга ёки мустаҳкам тагликка қўйиш зарур.
290. Муфталарга қуйиладиган эритилган таркиб ва кавшарни олдиндан қиздирилган металл таёқча ёки қошиқ ёрдамида аралаштириш зарур. Қизиган таркибларга ва кавшар ичига сув тушишига йўл қўйиб бўлмайди.
291. Йилнинг совуқ вақтларида муфталарга қайноқ таркибларни қуйишдан олдин уларни иситиш шарт.
5-§. Кабелларни ётқизиш ва қайта ётқизиш, муфталарни кўчириш
292. Барабанни кабели билан думалатганда унинг туртиб чиққан қисмлари ишлаётганларнинг кийимларини тортиб кетишига қарши чораларни кўpиш зарур.
Барабанни кабели билан фақат горизонтал текислик бўйича қаттиқ ерда ёки тормозлаш мосламаси бўлганда мустаҳкам тўшама бўйлаб думалатишга ижозат берилади. Кабеллар, бўш барабанлар, механизмлар, мосламалар ва асбобларни тупроқнинг ўпирилиш призмасидан ташқарига ва зовур четидан 1 м дан кам бўлмаган масофага жойлаштириш керак.
293. Кабелни қўлда ётқизишда умумий ишчилар сони шундай бўлиши керакки, ҳар бирига эркаклар учун кабель массаси 35 кг дан, аёллар учун 15 кг дан кўп бўлмаган қисми тўғри келиши керак. Ишлар брезент қўлқопларда бажарилиши зарур.
294. Кабелни ётқизишда бурилиш бурчаклари ичида туриш ва бурчакларда кабелни қўлда ушлаш тақиқланади. Шунинг учун бурчак роликлари ўpнатилиши шарт.
295. Кабелларни электр токи билан иститиш учун 380 В дан юқори кучланиш трансформаторларидан фойдаланиш тақиқланади.
296. Кабелларни қайтадан ётқизиш ва муфталарни кўчириш, кабель линияси ўчирилганидан кейин бажарилиши зарур.
Зарур бўлганда кучланиш остидаги кабелларни қайтадан ётқизишга қуйидаги шартлар бажарилгандан кейин ижозат берилади:
қайтадан ётқизиладиган кабелнинг ҳарорати 5 оС дан кам бўлмаслиги;
қайтадан ётқизиладиган кабель қисмидаги муфталар ёғоч тахталарга хомутлар ёрдамида қаттиқ маҳкамланиши;
ишлаш учун диэлектрик қўлқоплардан фойдаланиш, уларнинг устидан механик шикастланишдан ҳимоялаш учун брезент қўлқоплар кийилган бўлиши;
ишлар кабелларни ётқизиш тажрибасига эга ишчилар томонидан V гуруҳга мансуб ходим назоратида бажарилиши шарт.