Электр қурилмаларини эксплуатация қилишда хавфсизлик техникаси қоидаларини тасдиқлаш тўҒрисида

7-§. Иш олиб боришни назорат қилиш
84. Ишга қўйилгандан сўнг бригада томонидан хавфсизлик талабларининг бажарилиши устидан назорат иш бажарувчига (кузатувчига) юкланади. У иложи борича хавфи юқорироқ иш бажарилаётган жойда туриб ўз ишини шундай ташкил қилиши керакки, ўша ердан туриб ишлаётган барча бригада аъзолари ишини назорат қила оладиган бўлсин.
Кузатувчига ўриндошлик асосида назорат қилишдан бошқа бирон ишни бажариш тақиқланади.
85. Иш бажарувчи (кузатувчи) иш жойидан вақтинча кетиши зарур бўлганда, агар унинг ўрнини иш раҳбари, ишга қўйувчи ёки наряд бериш ҳуқуқига эга бўлган ходимга алмаштириш имконияти бўлмаса, иш бажарувчи бригадани (тақсимловчи қурилмасидан чиқариб, эшикларни қулфлаб, ходимларни ҲЛ таянчларидан тушириб ва ҳоказо) иш жойидан чиқариши шарт.
Иш бажарувчи (кузатувчи) алмаштирилганда, у нарядни ўз ўрнига вақтинчалик қолдирилган ходимга бериб кетиши шарт.
1000 В гача бўлган кучланишли электр қурилмаларида фармойиш бўйича ишлар бажарилаётган бўлса, зарурат бўлганда, иш бажарувчининг қисқа вақтга кетишига ижозат берилади. Бундай пайтда бригаданинг III гуруҳга мансуб бир ёки бир неча аъзолари иш жойида қолиб ишни давом эттиришлари мумкин.
86. Иш бажарувчининг рухсати билан бригада аъзоларидан бири ёки бир нечтаси иш жойидан вақтинча кетишларига ижозат берилади. Бунда уларни бригада таркибидан чиқариш талаб қилинмайди. 1000 В дан юқори бўлган кучланишли электр қурилмаларида иш жойида қолган бригада аъзоларининг сони, иш бажарувчи билан ҳисоблаганда икки кишидан кам бўлмаслиги шарт.
III гуруҳга мансуб бригада аъзолари ТҚдан мустақил чиқишлари ва яна иш жойига қайтиб келишлари мумкин, I ва II гуруҳга мансуб бригада аъзолари эса фақат III гуруҳга мансуб бригада аъзоси ёки электр қурилмасини бир ўзи кўриб чиқиш ҳуқуқига эга бўлган шахслар ҳамроҳлигида чиқишлари ва яна иш жойига қайтиб келишлари мумкин. ТҚдан чиққандан сўнг эшикни очиқ — қулфланмаган ҳолда қолдириш тақиқланади.
Ишга қайтган бригада аъзолари фақат иш бажарувчининг рухсати билан ишга тушишлари мумкин. Агар электр қурилмаси жойлашган хонани қулфлашнинг иложи бўлмаса, иш бажарувчи бригада аъзолари қайтгунга қадар иш жойини ташлаб кетиш ҳуқуқига эга эмас.
87. Ушбу Қоидаларнинг бузилиши ёки ишлаётганлар ҳаётига хавф туғдирувчи бошқа ҳолатлар аниқланганда, бригада иш жойидан чиқарилиши ва иш бажарувчидан наряд қайтариб олиниши шарт. Бригадага фақат аниқланган камчиликлар бартараф қилингандан сўнг бирламчи ишга қўйишда кўрсатилган талаблар бажарилганда янгидан ишлашга ижозат берилиши мумкин.