Fakulteti Iqtisodiyot kafedrasi

Auditorlik dalillarni olish manbalari.

Auditorlik dalillar hujjatlarni tekshirish jarayonida; xo‘jalik yurituvchi subyekt xodimlari va uchinchi shaxslardan yozma va og‘zaki so‘rov o‘tkazish yo‘li bilan; hisob jarayonlarining bajarilishi va xo‘jalik faoliyati ustidan auditorning bevosita kuzatishi chog‘ida olinishi mumkin. Auditorlik dalillar bevosita olinadigan manbalarga quyidagilar kiradi: mijoz korxona va uchinchi shaxslarning dastlabki hujjatlari; mijoz korxona buxgalteriya hisobi registrlari va uning moliya xo‘jalik faoliyatining tahlil natijalari; mijoz korxona xodimlari va uchinchi shaxslarning og‘zaki bildirishlari; mijoz korxonaning bir hujjatlarini boshqalari bilan solishtirish hamda uning hujjatlarini uchinchi shaxslarning hujjatlari bilan taqqoslash; mijoz korxona aktivlari va passivlarini inventarizatsiya qilish natijalari hamda uning moliyaviy hisobotlari. Olingan dalillarning sifati ularning manbalariga bog‘liq. Auditorning bevosita kuzatishi va moliya xo‘jalik muomalalarini o‘rganishi natijasida olingan dalillar eng ishonchli hisoblanadi. Shuningdek, mustaqil manbalardan olingan, hujjatlarga asoslangan ma’lumotlar ham ishonchli hisoblanadi. Mijoz korxonaning axborotlarga ishlov berish tizimidan to‘planganiga qaramasdan, to‘plangan ma’lumotlarga asosan auditor tomonidan olingan va ishlov berilgan ma’lumotlarning dalil kuchi kamroq hisoblanadi.
Mijoz korxonaning axborot tizimida tuzilgan, ishlov berilgan va saqlanayotgan hujjatlardagi axborotlarning dalil kuchi past hisoblanadi. Bunda ichki nazorat tizimining baholanishini inobatga olish zarur. Agar ushbu tizim samarali bo‘lsa, undan olingan axborotdan dalil sifatida foydalanish mumkin. Har xil manbalardan olingan va turli shakldagi auditorlik dalillar auditorlik riskini pasaytiradi. Ko‘p hollarda bitta holat bo‘yicha har xil manbalardan to‘plangan dalillar bir-birlariga zid bo‘lib chiqadi. Bu holda auditor vujudga kelgan ziddiyatni hal etish va to‘plangan dalillarning ishonchliligi hamda xulosalarning asosliligiga ishonch hosil qilishi uchun qo‘shimcha axborotlar to‘plashi zarur. Agar auditor qandaydir muammo bo‘yicha yetarli dalillar to‘plash imkoniga ega bo‘lmasa, buni o‘zining hisobotida aks ettirishi lozim. Agar mijoz korxona auditorga tulaqonli tekshiruv uchun zarur hajmdagi hujjatlarni taqdim qilmasa yoki agar auditor zarur auditorlik dalillarini to‘plash imkoniga ega bo‘lmasa, uning oldida katta muammolar vujudga kelishi mumkin. №50 «Auditorlik dalillar» nomli AFMSda ta’kidlanishicha: «Agar auditorlik tashkilotiga xo‘jalik yurituvchi subyekt tomonidan mavjud hujjatlar to‘la hajmda taqdim etilmasa va u qaysidir schyot va (yoki) muomala bo‘yicha yetarli auditorlik dalillarini to‘plash imkoniga ega bo‘lmasa, auditorlik tashkiloti bu vaziyatni o‘zining hisobotida aks ettirishi lozim va salbiy auditorlik xulosasi tuzish to‘g‘risidagi masalani o‘rtaga qo‘yishi mumkin.
Demak, yetishmayotgan auditorlik dalillari muhim hisoblangan buxgalteriya hisoboti moddalariga taalluqli bo‘lsa, auditor auditorlik xulosasi tuzishdan rasmiy ravishda bosh tortishi va bu holni tegishli tarzda rasmiylashtirishi lozim. Shunday qilib, hisobot ma’lumotlarining ishonchliligi to‘g‘risida o‘z fikrlarini shakllantirishda, auditor auditorlik dalillar olinadigan turli manbalardan foydalanib, auditorlik riskini pasaytirishni ko‘zlaydi.

3.