Diktant tu’rleri ha’m metodikasi

DO’RETIWSHILIK DIKTANT

I.	1.	Jazg’ı dem alısqa qansha qaldı?
	2.	Siz dem alısta qay jerge barasız?
	3.	Lagerlerde bolg’ansız ba?
II.	1.	Sen qay jerde jasaysan’?
	2.	Qashan uyqıdan turasan’ ha’m ne isleysen’?
	3.	Dene ta’rbiyası menen shug’ıllanasan’ ba?
	4.	Sen ha’zir qanday kitap oqıp atırsan’?
	5.	Mektepke saat neshede barasan’?
III.	1.	Qanday qosıqlardı yadtan bilesen’?
	2.	Qaysı awılda bolg’ansan’?
	3.	Qaysı qalalardı ko’rgensen’?
	4.	Qanday erteklerdi bilesen’?

DO’RETIWSHILIK HA’M ERKIN DIKTANT


Qaysar tu’lkishe
1. Tu’lkishe ini aldında qapa bolıp otırar edi. Ha’mme tu’lkisheler maza qılıp otlaqta oynap atır.
2. Bu’gin anası og’an qaysarlıg’ı ushın oynawg’a ruxsat bermegen edi.
3. Keshe ol tog’aydan uzaqqa ketip qalıp, anasın ta’shwishke salg’an edi.
4. Tu’lkishe a’ste qashıp ketti. Tog’ay shetinen dosları aldına barmaqshı boldı, biraq adasıp qaldı.
5. Tu’lkishe jıladı, sebebi onı qorqıw bastı.


IV sherek


Oqıwshılar – tatıw balalar
1. Oqıwshılar mektep qasındag’ı bag’qa bardı. Bag’qa jas na’ller egilgen edi.
2. Salima bir na’ldi silkitti. Onnan mayda qon’ızlar tu’sti. Balalar basqa na’llerdi de silkitti.
3. Olar qon’ızlardı qutıshag’a terip aldı.
4. U’sh ku’n ishinde bag’dag’ı na’ller ja’nliklerden tazalandı.
Ja’rdem
1. Balalar sho’je saqlaw ushın awıl fermasına keldi.
2. Fermada sarı sho’jeler ko’p edi. Salıy olarg’a so’k berdi.
3. Sarbinaz sho’jelerge suw berdi. Sho’jeler ku’n sayın o’se basladı.
4. Ferma xızmetkerleri balalarg’a raxmet ayttı.


TEKSERIW DIKTANTI
Awılımız bag’ı
Mektebimiz qasında u’lken miyweli bag’ jaratılg’an. Bag’da ha’r qıylı miyweli terekler o’sedi. Jazda miyweler pisedi. Tereklerdin’ shaqaları miywelerinin’ ko’pliginen iyiledi.
Miyweler piskennen son’, olar terip alınadı. Balalar da jıyın-terimde ja’rdem beredi. Miyweler arnawlı ıdıslarg’a salınıp, mashinalarg’a ju’klenip, qalalarg’a jiberiledi. Miyweler qala du’kanlarında satıladı.
Gu’zde bag’ o’zgerip ketedi. Tereklerdin’ japıraqları sarg’ayıp, a’ste-aqırın to’gile baslaydı. (54 so’z)


Jawın
Ku’nnin’ ekinshi yarımında hawa qapırıq bolıp, quslar tınıshsızlanıp usha basladı. Jen’il samal esti. Ko’kten bir-eki tamshı jawın tu’sti. Balalar su’ysinip aspang’a qaradı.
A’ste-aqırın jawın tamshılay basladı. Birazdan son’, tezlesti. Men aywanda turıp ta’biyattı baqladım.
Jawın ko’lsheler payda etti. Japlar tolıp ag’a basladı.
Birazdan son’ jawın tındı. Bultlar bo’linip, olar arasınan quyash o’z nurların shasha basladı. (57 so’z)