Jalil rahmat

22.10.2007.

* * *
Jom to`la may ichgim yo`q, ammo

Bir qatra ishq sharobini ber.
Yor vaslidan kechgim yo`q, ammo
Mayli hijron azobini ber.

Uyg`otsin xush, shirin ehtiros,

Gulg`uncha lab gulobini ber.
Allalasin ruhimni bir oz,
Yor qo`liga rubobini ber.

* * *
Oftob ko`kdan tushib yelkamga qo`nar,

Oyog`im ostida la’lu javohir.
Bag`rimda eng go`zal lolalar unar,
Menda nima g`am bor, nima xavotir?,
Qulday qulluq qilar necha bahodir,
Qaddimni tog` ko`rib...

Bir tola nur istab zoriqqan kunim,

Qulluq qilganlardan shov-shuv boshlanar.
Vujudim qaqshaydi og`riqdan, inim,
Betimga qattiqroq botar poshnalar,
Ezg`ilab o`tadi o`sha oshnalar,
Qadrim tuproq ko`rib...
27.12.2009.

* * *
Subhlarda gul shoxida marjon,

Dur, injular taqqan she’riyat.
Oqshomlar oychehrasi xandon,
Jilmayib, xush boqqan she’riyat.

Ma’shuqalar ko’ksida armon,

Oshiqlarni yoqqan she’riyat.
Vujudlarni titratib har on,
Ohang bo’lib oqqan sheriyat.
25.11.2007.

O`n xil fikr

Ilhom parilari keldi daraklab,

Qalb ufqida quyosh kuldi charaqlab,
Qaylardadir kitobimni varaqlab,
O`nlab fikr aytishdi, bosh saraklab.

- “Falsafa yo`q fikrlari tor ekan”,

- “Yaratganga shukrlari bor ekan”,
- “Ko`ksi bahor ko`chasi gulzor ekan,
Intilganga haqdan tole yor ekan”.

- “Shoir emas, qofiyaboz ekanmi?”,

- “Takror jumla, takror ovoz ekanmi?”,
- “Dardi faqat qalam, qog`oz ekanmi,
El ichida e`tibor oz ekanmi?”.

- “Qarab chiqdim, topolmadim g`oyani,

Na oftobu na bir salqin soyani”,
- “Tushlarida quchib qorli qoyani,
Ko`zga surtib alqagan gul poyani”.

- “Ishq baytlari titratib jon tomirni,

Yodga solar yoshlikdagi yomg’irni”,
- “Sevib qancha Toshpo`latdek shoirni,
Havas qilganmikan Mahmud Toirni”.

Buxoriylar bo`stoni go`zal sayr,

Yoqimli xush ifori ruhim chayir,
Ko`ngil ko`kka talpinar misli tayr,
Yana uchrashguncha, azizlar xayr.