Газларни тозалаш қурилмалари

1-МАЪРУЗА

Кириш. “Газларни тозалаш қурилмалари” фанинг асосий вазифаси. Умумий тушунчалар. Чанг тозалаш қурилмаларининг классификацияси.

Ишлаб чиқариш ривожлангандан бери атмосфера ҳавосини ишлаб чиқариш чиқиндиларидан ва ҳар хил газ аралашмаларидан тозалаш муҳим масалалардан бири бўлиб келган. Газ аралашмалар таркибидаги қаттиқ ёки суюқ заррачаларни саноат миқёсида ажратишдан мақсад ҳаво ифлослигини камайтириш, қимматбаҳо маҳсулотларни ажратиб олиш ёки технологияга салбий таъсир этувчи зарарли, ҳамда қурилмаларни бузилишга олиб келувчи моддаларни чиқариб ташлашдир.

Кимё, енгил, тоғ-кон ва озиқ-овқат саноатларнинг асосий технологик жараёнларидан бири ифлосланган газларни тозалашдир. Шунинг учун, турли жинсли газ системаларни ажратиш кимёвий технологиянинг долзарб ва энг кенг тарқалган асосий жараёнларидан биридир.

Ишлаб чиқариш жараёнлари давомида ҳосил бўладиган ҳар хил физик-кимёвий хусусиятларга эга бўлган газ аралашмалари турли жинсли газ, яъни газсимон системаларга қуйидагилар киради: тутунлар, чанглар, туманлар.

Газ ва унда тақсимланган 0,3...5 мкм ўлчамли қаттиқ заррачалардан ташкил топган системалар тутунлар деб номланади. Тутунлар буғ (ёки газ) ларнинг суюқ ёки қаттиқ ҳолатга конденсацияланиш жараёни орқали ўтишда ҳосил бўлади. Ундан ташқари, қаттиқ ёқилғилар ёниши натижасида ҳам пайдо бўлади.

Газ ва унда тақсимланган 3...70 мкм ўлчамли қаттиқ заррачалардан ташкил топган системалар чанглар деб аталади.

Кўпинча чанглар қаттиқ материални майдалаш, аралаштириш ва маълум масофага узатиш пайтида ҳосил бўлади.

Дисперсион газ ва ўлчами 0,3...5 мкм бўлган дисперс суюқлик фазалардан ташкил топган системаларга туманлар дейилади. Туманлар сув буғини совитиш жараёнида, буғнинг конденсацияланиши натижасида ҳосил бўлади.

Тутун, чанг ва туманлар - аэрозоллар деб юритилади.




Саноат миқёсида чанг ҳосил бўлишининг манбалари: қаттиқ жисмларни механик майдалаш (чақиш, эзиш, арралаш, едирилиш ва уларни узатиш), ёқилғилар ёнишида (кул ҳосил бўлиш), буғлар конденсацияланишида, ҳамда газларнинг ўзаро кимёвий таъсири натижасида қаттиқ маҳсулотлар ҳосил бўлиш жараёнида.

Одатда, чанглар таркибида ўлчами 3...100 мкм бўлган қаттиқ заррачалар мавжуд бўлади. Буғлар конденсацияланиши натижасида 0,001...1 мкм ўлчамли майда суюқлик томчилари ҳосил бўлади.

Газларни қуйидаги тозалаш усуллари маълум:

1. оғирлик кучи таъсирида чўктириш (гравитацион тозалаш);

2. инерция кучлари таъсирида чўктириш, яъни марказдан қочма кучлар;

3. фильтрлаш;

4. суюқлик билан ювиб тозалаш;

5. электростатик кучлар таъсирида чўктириш (электр майдон таъсирида).

Биринчи иккита усулда, яъни оғирлик ва марказдан қочма кучлар таъсирида, тозалаш натижасида йирик заррачаларни, қолган усулларда эса - 20 мкм ва ундан ўлчами кичик бўлган заррачаларни ажратиб олиш мумкин.

Ҳар доим ҳам битта газ тозалаш қурилмасида газларни керакли юқори даражада тозалаб бўлмайди. Шунинг учун, амалиётда икки ва кўп босқичли тозалаш қурилмалари қўлланилади.

Газни тозалаш даражаси  қуйидаги тенгламадан аниқланади:

(1)

бу ерда G₁ ва G₂ – бошланғич ва тозаланган газдаги қаттиқ заррачалар массаси, кг/соат; V₁ ва V₂ – бошланғич ва тозаланган газларнинг ҳажмий сарфлари, м³/соат; х₁ ва х₂ – бошланғич ва тозаланган газда қаттиқ заррачалар концентрацияси, кг/м³.