Istaklarning amalga oshuvi

Masalan, hammada sodir bo`ladigan va balki sizning ham hayotingizda sodir 
bo`lgan bir holatni olaylik. Biror kishi sizga qarshi ish qildi. Siz unga o`z joyini 
ko`rsatib qo`yishni maqsad qildingiz va u bilan bo`ladigan suhbatda nimalar 
deyishingiz va uni qanday qilib uyaltirishingiz haqida o`ylab qo`ydingiz. Lekin u 
bilan yuzma-yuz kelganingizda qo`lingizdan hech nima kelmaydi. Chunki xuddi 
o`sha odam sizning nima deyishingizni oldindan bilgandek har bitta gapingizga 
juda qiyomiga keltirib javob beradi. Natijada hayolingizdagi ssenariyingiz bir 
pulga qimmat bo`lib chiqadi. 
Ko`pchilik hollarda bizning organizmimiz va hayotimizga biz hissiyotlarimiz 
jismoniy faktorlarga nisbatan ko`proq ta`sir o`tkazadi va organizmda juda katta 
o`zgarishlarga olib kelishi mumkin. Shunday qilib aniq va xuddi mavjudday 
vizuallashtira olish xususiyati bizning psixikamizning muhim xususiyatidir. 
Masalan, ko`pchilik (taxminan 80%) kasalliklarning kelib chiqishi nervlarga 
bog`liq ekanligi aniqlangan. Ya`ni ularning paydo bo`lishiga hech qanday 
jismoniy sabab yo`q. Bundan tashqari platsebo effektini ham xuddi shu narsa bilan 
izohlash mumkin. Bunda dori deb berilgan turli ranglardagi tabletkalar shaklidagi 
glukoza juda ko`pchilik kasalliklarga davo bo`lgan. Glukozaning hech qanday 
kasallikni davolay olmasligi to`g`risida gapirishning keragi bo`lmasa kerak. 
Aniq va yorqin vizualizatsiya qobiliyatini shakllantirish uchun amaliyot talab 
qilinadi. Xonadagi biror buyumga qarang va ko`zingizni yumib, uni tasavvur 

---

qilishga harakat qiling. Endi bo`lsa ushbu buyumni birov qo`liga olganligi, 
rangining o`zgarganligi, uning singani, yonib ketgani va boshqa holatlarni tasavvur 
qiling. Agar buni amallay olsangiz yaxshi, amallay olmasangiz yana biroz mashq 
qilishingizga to`g`ri keladi. 
Yuqoridagilardan siz obrazlar bilan ishlay oladigan fikrlash juda muhim ekanligini 
bilib oldingiz. Lekin uning muhimligi o`z-o`zini dasturlash va istaklarimizning 
amalga oshishida katta o`rin egallashidadir. 
Endi bo`lsa sizning xohishlaringizni amalga oshirishga o`tsak. Bunda eng birinchi 
qadam xohishni shakllantirishdir. Xohishni shakllantirishda uning pozitiv 
bo`lishiga katta e`tibor qaratish kerak. Ya`ni unda yo`q, emas va shunga o`xshash 
boshqa qo`shimchalarning bo`lmasligiga erishish kerak. Chunki oldingi 
mavzularda aytganimizday sizning xohishlaringizning amalga oshishida quyi ong 
katta o`rin tutadi. Uning ishlash printsipi bo`lsa yo`q degan qo`shimchani 
tushunmaydi. “Men biror narsani xohlamayman” deyish xuddi taksiga minib, 
“Men Tinchlik ko`chasiga bormoqchi emasman” deganday gap. Chunki taksichiga 
ham quyi ongga ham boradigan manzilingizni aniq aytishingiz kerak. 
Xohishni shakllantirayotib uning nima, qaerda, qachon, kim degan savollarga 
javob berishiga e`tibor bering. Agar biror narsani amalga oshirilish usuli va vaqti 
chegaralanmagan bo`lsa, ularni chegaralashga urinmang yoki keragicha uzoq 
vaqtni belgilang. Aytaylik sizga biror summadagi pul kerak bo`ldi. Uni siz 
olishingiz mumkin bo`lgan usullar talaygina. Masalan, xazina topib olasiz, kimdir 
sovg`a beradi, qarz olasiz, boy kelin yoki kuyov topasiz, mukofot olasiz va 
boshqalar. Xohishda ularning birortasini aniq ko`rsatish xohishning amalga 
oshishida qiyinchiliklarni keltirib chiqaradi yoki uning bajarilishini orqaga surib 
yuborishi mumkin. Boshqa hamma parametrlarni aniq rejalashtirish kerak bo`ladi. 
Xohishning amalga oshishidan boshqa iloji qolmasligi kerak. 
Keyin bu xohishni albatta yozib qo`yish kerak. Yozilmagan xohish – bu faqat 
orzudir. 
Keyin bo`lsa xohishingizni vizuallashtiring. Xohishingizning amalga oshganligini 
aniq va tiniq tasavvur qiling va unda nima his qilishingizni hozirning o`zida his 
qiling. Aynan mana shu erda sizga obrazli fikrlash yordam beradi. 
Mashq:Biror erishmoqchi bo`lgan narsangizni yoki xarakteringizning 
o`zgartirmoqchi bo`lgan tomonlarini tasavvur qiling. Bu narsa amalga oshishi 
mumkin deb hisoblang. O`zingizda bu xohishni amalga oshirishga juda kuchli 
istakni tug`diring. Bu haqda qayta va qayta o`ylab, ishtiyoq va g`ayrat bilan 
to`lib-toshing. Axir sizning hozirgi negativ ishonchlaringiz o`zingizning 
fikrlaringiz va hissiyotlaringiz natijasida yuzaga kelganku. O`zingizda juda 
kuchli hislar va yorqin tasavvur va xohish uyg`ota olsangiz, yangi fikrlar 

---

eskilarining o`rniga joylashib qoladi. 
Bunda siz o`z xohishingiz, maqsadingiz xuddi amalga oshgandek o`zingizni his 
qilishingiz kerak. Ya`ni bu niyatingizning natijasini pozitiv ravishda his 
qilishingiz kerak. Bu sizga tugallanganlikni his qilishga yordam beradi. 
Tugallanganlikni his qilish nimaga kerak? – deb so`raysizmi? Albatta 
niyatingizning amalga oshishi uchunda. Chunki reallik faqat bizning 
tasavvurimizdagina mavjud. 
Aytaylik siz hozir biror xonada o`tiribsiz. Uning eshigidan chiqishingiz bilan 
nimaga ko`zingiz tushadi? Ko`cha eshigidan chiqishingiz bilanchi? U erda qanday 
ko`cha bor, uylar qanaqa? Hammasini ko`z oldingizga keltirdingizmi? Nimaga 
endi siz aynan shu ko`cha va shu uylarni ko`z oldingizga keltirdingiz? Nimaga 
endi uydan chiqishingiz bilan ko`pga yoki o`rmonga ko`zingiz tushishi mumkin 
emas? Bularning hammasining javobi bitta. U ham bo`lsa siz bu ko`cha haqida 
tasavvurga egasiz. Siz aynan shunaqa ekanligiga 100 foiz ishonasiz. 
Endi bo`lsa o`z xohishingizni tasavvur qiling. Ko`pchilikning muammosi pul 
ekanligidan kelib chiqib, mayli pulni tasavvur qiling. Aytaylik birorta tanishingiz 
sizga hech qanday sababsiz 1000 dollar pul sovg`a qilsin. 
Bunda kallangizga keladigan birinchi fikrlarga e`tibor bering. Ular quyidagicha 
bo`lishi mumkin: Qaysi tanishimda buncha pul bor? Kim ham buncha pulni menga 
berardi? Umuman hech narsa talab qilmasdan buni sovg`a qiladigan odam o`zi 
dunyoda bormikan? va shunga o`xshashlar. Bu fikrlar chegaralovchi fikrlardir. 
Ko`rganingizdek, ular hech ham sizdan so`rab o`tirmasdan hayolingizga 
kelaveradi. 
Endi tugallangan xohish nimaligini tushunishingiz osonroq bo`ladi. Tugallangan 
xohish – bu uning amalga oshishiga siz xuddi uyingizdan tashqarida ko`cha 
mavjudligiga ishongandek ishonadigan xohishingizdir. Siz uydan chiqishingiz 
bilan xayolingizdagiga o`xshash ko`chaga chiqishingizga ishonasiz. Xohishni ham 
xuddi shunday ishonch bilan xohlash kerak. Agar salgina ikkilansangiz, hech narsa 
yuz bermaydi. Hech qanday ikkilanishsiz va chegaralovchi fikrlarsiz xohlash 
kerak. Siz aynan shunday bo`lishiga aniq ishonasiz. 
Hozir bu satrlarni o`qiyotib vizualizatsiya qilish bilan hamma xohishlaringiz 
amalga oshadigandek his qila boshladingizmi? Lekin bunga amalda qanday 
erishish mumkin? Sizning vizualizatsiyangiz qay darajada haqiqiy ekanligini 
qaerdan bilasiz? Buni ertaga bilib olasiz.