Ájiniyaz atındaģı nmpi mektepke shekemgi tālim fakulteti

Leksikalıq ózgeshelikleri: 1.Rásmiy isler stili óziniń arnawlı terminologiyasına iye. Bundaǵı terminler ilimiy stildegi terminlerdey abstrakt xarakterde emes, al praktikalıq áhmiyeti bar bolǵanlıqtan bir qansha konkret bolıp keledi: instrukciya, qatnas qaǵaz, telefonogramma, buypıq, maǵlıwmatnama, akt, protokol, kún tártibi, qarar, tıńlandı, maqullaw, soranıw, málim etiw hám t.b. 2. Leksika-frazeologiyalıq hám grammatikalıq jaqtan belgili bir formada qáliplesken standart birlikler (shtamplar) kóplep paydalanıladı: tıńlap hám talqılap, esaplı dáwir ishinde, buyrıǵına muwapıq, tómendegi qol qoyıwshılar, eske ala otırıp, ruxsat etiwdi sorayman, qarar qabıl etiw. 3. Hár qıylı qısqarǵan atlıqlar kóplep ushırasadı: in-t, zam, f-ka, zav. Mısalı: Durshekeev tchk Kuybıshev qalasında bolatuǵın mexanizatorlardıń keńesine qatnas zpt aqshanı izińnen jiberemiz tchk direktor (O.Ábdiraxmanov).
Morfologiyalıq ózgeshelikler: 1. Atawısh feyil formaları, hár qıylı qararlarda –sın//-sin affiksli buyrıq meyil formaları jiyi qollanıladı: Kún tártibinde: Mákemeniń jıllıq esabın tıńlaw. Esap qanaatlandırarlıq dep tabılsın. 2. Hújjetlerde emocionallıq hám ekspressivlik máni ańlatıw zárúrligi bolmaǵanlıqtan rásmiy isler stilinde kelbetlikler hám ráwishler kórkemlew quralı sıpatında qollanılmaydı.
Sintaksislik ózgeshelikler: 1. Gápler ıqshamlı, túsinikli bolıp, ondaǵı sózler tuwra orın tártibinde jaylasadı. Mısalı: Maǵlıwmatnama jumıs islew ornına kórsetiw ushın berildi; 2. Geyde gápler úlken bolıp, olar bir neshe birgelkili aǵzalardan (punktlerden, statyalardan) turadı. Mısalı: Sessiyanıń kún tártibine tómendegi máseleler kirgizildi:

1. 
   Hókis qalasın ekonomikalıq hám sociallıq rawajlandırıwdıń 2020-jılǵa mámleketlik jobası hám Hókis qalasın ekonomikalıq hám sociallıq rawajlandırıwdıń 2019-jılǵı mámeketlik jobasınıń orınlanıw barısı haqqında.
   
2. 
   2020-jıl ushın Hókis qalasınıń jergilikli byudjeti hám Hókis qalasınıń 2019-jılǵı jergilikli byudjetiniń orınlanıwı haqqında.
   
3. 
   Xalıq deputatları Hókis qalalıq keńesiniń 2020-jılǵı is jobasın tastıyıqlaw.
   
4. 
   Shólkemlestiriw máselesi. («Erkin Qaraqalpaqstan» gazetasınan).
   

Solay etip, rásmiy isler stili adamlar arasındaǵı rásmiy qatnasıqlardı bildiriw ushın xızmet etedi. Ol hámmege birdey ortaq bolıp qáliplesken konstrukciyalarǵa iye, sonlıqtan da bul stil basqa stillerden ańcat ajıralıp turadı. Rásmiy isler stilinde hár qıylı hújjetler dúziledi. Hár bir hújjetti dúziwdiń ózinshe rejeleri, talapları boladı. Eger hújjet solarǵa sáykes dúzilmese, óziniń hújjetlik qunın, bahasın joytadı. Is qaǵazlarınıń ayırım formaları mekteplerde de úyretiledi.
Rásmiy isler stiline hár qıylı kancelyarizmler de kiredi.
Olar jazba tilde orınlı qollanılıwı kerek, al awızeki sóylew tili ushın olar ulıwma xarakterli emes.
Rásmiy isler stiline tán sózler geyde yumorlıq hám satiralıq shıǵarmalarda qaharmanlarǵa sıpatlama beriw ushın qollanıladı. Mısalı: Mine men mına qararǵa qol qoydım. Tıńla: «Dekabr ayında kárxanamız xızmetkerleri tuwılǵan kún yubileyin belgilemesin, toy-merekege barmasın, hesh kim úylenbesin de, turmısqa da shıqpasın, bir adam da awırmasın, ólmesin». (O. Ábdiraxmanov). Mısalda qarar menen qadaǵan etiwge bolmaytuǵın háreketlerdi rásmiy stil menen beriw arqalı jazıwshı komik obraz jasay alǵan.

Rásmiy isler stili júdá turaqlı, óziniń belgili janrı, leksikası, frazeologiyası hám sintaksislik toparına iye. Xabarlaw mazmunında jazıladı, anıq maǵlıwmat beriw ushın qollanıladı.