M. DÁWletov, A. DÁWletov, Z. IsMAylova, A. DÁWletova

§ 60. Sın pısıqlawısh
238-shınıǵıw. 
Oqıń. Is-hárekettiń isleniw sanın, sapasın, qalay 
islengenin bildiretuǵın sózlerdi anıqlań. Olardıń qanday sorawlarǵa 
juwap berip kelgenin hám mánisin túsindiriń.
1. Jumsaq mebeller tayarlaw cexı jaqsı islep tur. 2. Onıń 
sózi salmaqlı esitiledi. 3. Hawa rayı ábden buzılǵan. (Ó. A.) 
4. Búgin de ol kóp oylanıp bir áńgimeni yadtan sóyledi. 5. Ol 
basın kóterip qaradı. (J. A.) 6. Ol suwıqlaw sálemlesti. 7. Ol 
tez oyın juwmaqladı. (T. Q.)
Is-hárekettiń isleniw sının, sapasın, qalay islengenin 
bildiretuǵın pısıqlawıshqa sın pısıqlawısh delinedi.
Sın pısıqlawıshı qalay? qáytip? qalayınsha? t.b. 
sorawlarǵa juwap beredi.

---

129
Sın pısıqlawısh, kóbinese sın ráwishi, kelbetlik, hal 
feyil, eliklewish sózlerden qıya seplik qosımtalı hám 
tirkewishli atawıshlar arqalı bildiriledi. M ı s a l ı : Jabayı 
shópleri tazartılıp, ǵawasha nálleri tez rawajlandı. (Q. J.) 
Hawa rayı ábden buzıldı. Ol artına jalt-jalt qaraydı. (Ó. A.) 
Tájibay ata menen jaqsı sóylesti. Trubasher fermada zoo-
texnik bolıp isleydi. (J. S.) Serkebay tunjırawı menen otır.
239-shınıǵıw. 
Kóshirip jazıń. Sın pısıqlawıshlardıń astın sızıp, 
olardıń qanday sóz shaqapları arqalı bildirilgenin hám bayan-
lawıshqa qatnaslı qanday sorawlarǵa juwap beretuǵının anıqlań.
1. Stoldıń ústinde ishektey sozılǵan qamshı jatır. (N. D.) 
2. Qız-jawanlar bir-biri menen jıllı júrekten sóylesedi. (J.A.) 
3. Birneshe kúnlik tayarlıq jumısları tez ótip ketti. (N. D.) 
4. Qandırıp suwǵarılǵan ǵawashalar jaqsı rawajlanǵan. 5. Ap-
paq paxtalar jawdırasıp ashılıp tur. (Ó. A.) 6. Jálmen onıń 
bul háreketine tańlanıw ornına ǵarq-ǵarq kúldi. 7. Jálmen kóz 
astınan Jiyemuratqa qarap otırdı. (T. Q.) 
240-shınıǵıw.
Kóp noqattıń ornına tiyisli sın pısıqlawısh mánili 
sózlerdi qoyıp kóshirip jazıń. Olardıń qanday sózler arqalı bildiril-
genin anıqlań.
1. Úy-ishi bizdi ... qarsı aldı. (I. Y.) 2. Kún ... kóterilip, 
jer-dúnyanı qızdıra basladı. (N. D.) 3. Ol ayaqları tońlap 
qalǵan jılqıday ... qozǵaladı. (T. Q.) 4. Ráwshan buǵan ... 
qaradı. (J. A.) 5. Ol qaytıp ... shıǵıp ketti. (T. Q.) 6. Qızı 
kelip aman-esen, ... tastı ana. (J. A.)