Microsoft Word kr dunyoning ishlari ziyouz com doc

www.ziyouz.com кутубхонаси 
49
Ювиниб келиб, апил-тапил чой ичдим. 
— Болани эҳтиёт қил, — ойим айвон бурчагида ўтириб, тўнкарилган пиёладан ўсма ботириб 
қошига тортаётган опамга тайинлади. 
— Хавотир олманг. — Опам бошини у ёқ-бу ёққа эгиб, бир чети синиқ кўзгуга қиё-қиё 
қараркан, жилмайди. — Ўзим қараб тураман. 
Опам жуда меҳрибон. Ойим йўғида ҳаммамиз опамнинг пинжига тиқиламиз... 
Гузарга чиққанимиздан кейин, энг катта ниятимни секин айтдим: 
— Ойи, кинога тушсам майлими? Тарзанга? 
У ғарчли кавушига чанг қўндирмаслик учун тупроқ кўчадан авайлаб бораркан, орқасига 
қарамасдан сўради: 
— Ким билан тушасан? 
— Собир билан. 
— Тоғангникига бормаймиз. 
Ҳафсалам пир бўлиб тўхтаб қолдим. Бундан чиқди, аммамникига борарканмиз-да. 
Аммамникида мен тенги ўртоғим йўқ. 
— Аммамникига кетяпмизми? — дедим қовоқ-тумшуғим осилиб. 
Ойим бурилиб қаради: 
— Йўқ, опангникига. 
— Опам уйда-ку? — дедим ҳайрон бўлиб. — Яна қанақа опамникига борамиз? 
— Ўқчига. Катта опангникига. 
Қизиқ, қанақа катта опам? Ўзи битта опам бор-ку. 
— Юр, — деди ойим шошириб. — Кун исиб кетмасидан Бешёғочга етиб олайлик. 
Ойимга эргашиб борарканман, алланимани ғира-шира тушунгандек бўлдим. Беш-олти кун 
олдин аммам келган эди. У ойим билан пичир-пичир гаплашган, «ўгай... йиғлади... Ўқчи...» 
деган сўзлар қулоғимга чалинган эди. Демак, Ўқчи деган жойга кетяпмиз. 
Ўқчи дегани икки томони болохонали уйлар билан ўралган тор кўча экан. Бизнинг томонларда 
аллақачон ҳаммаёқ кўкариб кетган, бу ерда бўлса кўча зах, икки четда қоп-қора сув жилға 
бўлиб оқиб ётибди. Анча юрдик. Тез-тез темирчилик дўконлари учрайди. Байрам бўлсаям, 
баъзилари очиқ. Девордаги михларга кетмон, теша, хаскаш илиб қўйилган. Сандонда олов 
гуриллайди. Тарақ-туруқ авжида: яқинига бориб бўлмайди. Охири тагидан қорамойдек лойқа 
сув оқиб ётган, четидаги панжаралари лиқиллаб турган ёғоч кўприкдан ўтдик. Ойим дам-бадам 
тўхтайди. Ҳали у эшикни тақиллатади, ҳали бунисини. 
— Ҳой, ўргилай, Башоратхоннинг уйи шуми? Эри пераводний... 
Биров йўқ, дейди, бирови елка қисиб эшикни беркитади, бир хили эшикни умуман очмайди. 
Шу қадар чарчадимки, оёғимни қимирлатишга мадорим қолмади. Худди, ҳов бирда, уйдаги 
опамга совчи келганида Қаънига борганимиздек. Келмасам бўларкан. Қайтага уйда Хўжа 
биланми, Вали биланми маза қилиб чиллак ўйнаб юрган бўлардим. Кун исиб кетган, сув ичгим 
келарди. Ойимнинг ўзи ҳам кўча четидаги водопроводдан икки марта сув ичди. Сув ичиш осон 
бўлсаям майли экан. Одамлар пақирини кўтариб, қаторлашиб навбат кутиб туради... Байрам 
бўлгани учунми, ясанган-тусанган ўткинчилар тузук-қуруқ гаплашмайди. Ҳамма қаёққадир 
шошади. 
Бир маҳал паранжи-чачвонли хотинга дуч келдик. Ойим яна ўша ялинчоқ оҳангда сўради: 
— Ҳой, барака топгур, Башоратхонни танимайсизми? 
Паранжили хотин тўхтади. Чачвонини юзидан олган эди, қўрқиб кетдим. Бунақанги чўтир 
хотинни биринчи кўришим эди. Негадир хаёлимга чўтирини беркитиш учун паранжи ёпиниб 
юрса керак, деган ўй келди. 
— Қанақа Башор? — деди у рўмолча билан тер босган юзини артиб. 
— Башоратхон-да! — Ойим куйиб-пишиб тушунтирди. — Эри пераводний. Ашхободда ер 
қимирлаганда касалларни поездда олиб келган. 

---

Дунёнинг ишлари (қисса). Ўткир Ҳошимов