Microsoft Word kr dunyoning ishlari ziyouz com doc

www.ziyouz.com кутубхонаси 
50
— Уйини билмайсизми? — чўтир хотин ачиниб бош чайқади. — Дунёда нима кўп, Башор кўп. 
— Йўқ. Эгачим айтувдилар, — деб ойим яна тушунтирди. — Шундоқ кўприкдан ўтгандан кейин 
топасиз, девдилар. 
— Бу кўчада нима кўп, кўприк кўп, айланай,— чўтир хотин елкасини ночор қисди. 
— Ҳайронман, — деди ойим умидсизлик билан. — Нечта эшикни тақиллатдим, ҳеч ерда йўқ. 
Бўлмади, чўтир хотиндан ҳам иш чиқмади. Тағин иккита катта-кичик кўприкдан ўтдик. Юриб-
юриб, чойхона олдидан чиқиб қолдик. Байрам шарофати билан чойхона айниқса гавжум бўлиб 
кетган, сўриларда эркаклар чордана қуриб, сабзи тўғраб ўтиришар, тўрқовоқлардаги 
беданалар авжига чиқиб сайрар, ҳавода жизза ҳиди кезар эди. 
— Бор, болам, — деди ойим ялиниб, — эркакларнинг олдига мен бормай қўя қолай. Сўрагин, 
пераводнийни уйи қайси, дегин, Башор деган хотини бор, дегин, хўпми? 
Сўри олдига бордиму, тўхтаб қолдим. Ҳар ким ўзи билан ўзи овора, қайрилиб ҳам қарамайди. 
Аския.... Қийқириқ... Шўппайиб туриб-туриб қайтиб келдим. Ойим уришмади. Яна кетавердик. 
Каттакон тилла зирак таққан, ялпоқ гулли кўрпабоп матодан кўйлак кийган, қалин қошли 
жувон дуч келганида ойим тағин сўради: 
— Ҳой, оповси, Башоратхонни... 
— Ман намедонам! — деди аёл елка қисиб. 
Охири ойим ҳам ҳолдан тойди. Кўча четидаги япасқи харсанг устига ўтириб, тугунини ечди. 
Кеча ёпган арпа нонидан олиб олган экан. Шундан биттасини ушатиб, она-бола едик. Тағин 
чанқай бошладим. 
— Ойи, сув, — дедим ҳиқиллаб. 
— Шошма, болам, сабр қил. — Ойим юпатди. — Топамиз. Ҳозир топиб оламиз. 
Нон қувват бердими, яна аввалгидек йўлга тушдик. 
Бир маҳал онам тўхтаб қолди. 
— Вой, ўлсин, тағин Бешёғочга чиқиб қолибмиз-ку. 
Қарасам, ростдан ҳам Бешёғоч! Бундан чиқди, айланиб-айланиб яна шу ерга келиб қолибмиз-
да. Бозор олдидаги майдонда одам кўп эди. Ясанган қизлар, папирос тутатган йигитлар... 
Дарахт соясида бир оёқли киши қўлтиқтаёққа суяниб турибди. Олдида эски курси, курсидаги 
саватда обаки. У ингичка бўйнининг томирини ўйнатиб, овози борича бақирарди: 
— Обаки дандон 
Лаблари хандон 
Чайнама, шими, 
Чайнама-а-а! 
Бирпасда чанқоқ ҳам эсимдан чиқиб кетди. 
— Обаки оберинг, — дедим ялиниб. 
Ойим бир зум иккиланиб турди-да, қўлимдан етаклади: 
— Юр. 
Парвардага ўхшатиб кесилган обакини оғзимга солдиму маза қилиб сўра бошладим. Сақичга 
ўхшаган юмшоқ, аммо жуда ширин. 
— Сиз шу ерликмисиз, амаки? — деди ойим қандолатчига термилиб. 
Қандолатчи қўлтиқтаёғига суяниб, чўнтагидан папирос оларкан, шубҳаланиб ойимга қаради: 
— Нима эди? 
— Башоратхонни қидириб келувдик. Эри пераводний, Ашхободда ер қимирлаганда касалларни 
олиб келган. Ўқчида кўприкнинг олдида туради, дейишувди. 
— Номери неччи? — деди қандолатчи папирос тутатиб. 
— Ўшанисини сўрамабман. — Ойим айбдор қиёфада ерга қаради. 
— Ия, қизиқ экансиз-ку, сингил! — чўлоқ қандолатчи овози борича шанғиллади. — Афанди 
эшаги йўқолганида бир қўлида янтоқ, бир қўлида тезак кўтариб, бозор айланган экан, буни еб, 
буни анақа қилганни кўрган борми, деб. Сизникиям шундан бўлди-ку. 

---

Дунёнинг ишлари (қисса). Ўткир Ҳошимов