Microsoft Word kr dunyoning ishlari ziyouz com doc

www.ziyouz.com кутубхонаси 
58
сигирникига ўхшайди. 
Харидор ҳорғин бош чайқади. 
— Ўзимга қолса-ку, беш юзга ҳам олаверардим. Шу болага сўраяпман. — У тағин болага имо 
қилди. Бола ёнғоқларни у қўлидан бу қўлига олар, юпқа, қонсиз лабларини пичирлатиб санар 
эди. — Ҳеч кими йўқ бечоранинг, — деди харидор овозини пасайтириб. — Савоб бўлар деб 
бошига дўппи обердим. Отаси фронтда ўлган. Яқинда онасиям қазо қилди: сил эди бечора. 
Етмиш яшар кампир бувиси билан қолди. Мен қўшниси бўламан. Кампир бечоранинг кигиз 
тагига йиғиб қўйган жиндек пули бор экан. Шунга биттагина эчки оберинг, деб ялинди. Савоб 
учун тушдим бозорга. 
Гоҳ болага, гоҳ онамга қараб карахт бўлиб қолдим. Бола ҳамон ёнғоқларини санар, ойим ҳам 
унга тикилиб қолган эди. Бирдам онамнинг кўзларида ёш айланди. Бир қўли билан арқондан 
тутганча иккинчи қўли билан боланинг дўпписи устидан бошини силади. 
— Айнония! — деди овози титраб. — Ҳеч нима қилмайди. Ҳали шундоқ йигит бўласанки, сен 
кўрганни ҳеч ким кўрмайди, болам! 
— Мана, бори шу! — харидор бир сўмлик, уч сўмлик пуллардан бир ҳовучини даллолнинг 
қўлига тутқазди. 
— Қанча? — деди даллол. 
— Юз эллик сўм! 
Даллол ойимнинг арқон ушлаб турган қўлини кафтига олиб силкита бошлади. 
— Бор барака денг энди, янга! Бор барака денг! 
У ҳар силтаганда ойим қўли узилиб кетгудек бўлиб бутун гавдаси билан силкинар эди. 
— Ҳеч бўлмаса яна эллик сўм қўшинг, амаки,— деди онам эски чопонли кишига илтижоли 
термилиб. — Зотли мол, онаси ҳар йили иккитадан туғади. 
— Нима қилай, сингил! — харидор тағин бош чайқади. — Менгамас, болага деяпман-ку. Савоб 
учун тушдим бозорга, бор пули шу бўлса, мен нима қилай? 
— Ахир, менам боламга пуфайка обермоқчиман,— деди онам йиғламсираб. 
— Савоб ҳам керак-да одамга, янга! — Даллол ойимнинг қўлини қўйиб юбормай шанғиллади. 
— Дунёга келиб, нима каромат кўрсатдик?! Кўприк солдикми, мачит қурдикми... 
— Тўғри-ку, лекин... Боламга пуфайка... Зотли мол... 
Eнди онамнинг гапини харидор бўлди. 
— Худога шукур денг, сингил. Болангизни бошида отаси бор экан, сиз бор экансиз. Жаям янги 
бўлмаса эскироқ пуфайка оберарсиз. Бу бечоранинг кими бор? 
Ойим болага бир нафас термилиб турдию арқонни секин қўйиб юборди. Бола ҳамон лабларини 
пичирлатиб ёнғоқ санар эди. 
— Манг, янга! Рози бўлинг, — даллол пулни санаб ойимга тутқазди. — Хизмат ҳақимни 
опқолдим. Аммо рози бўлинг. 
Ойим пул чангаллаб турган қўли билан тағин боланинг дўпписи устидан бошини силади. 
— Хафа бўлма, ўргилай! Бувингга мендан салом айтгин. Эчки сотган хотин салом айтди, дегин. 
Даллол бир томонга, эчки етаклаган чопонли одам билан бола иккинчи томонга кетиб, зум 
ўтмай одамлар орасидан ғойиб бўлишди. Онам қўлига туфлаб-туфлаб пулни ҳафсала билан 
санади, нимчасининг чўнтагига солди. Аммо кўнгли тўлмади шекилли, ўша заҳоти чўнтакдан 
қайтариб олиб кўйлагининг ёқаси тагига яширди. Ғуссага чўкиб хўрсинди. 
— Худоданам ўргилай! Бандасининг бошига шунча ғам солмаса нима қипти-я! 
Иккаламиз индамай йўлга тушдик. Ойим қўлимдан тутганча бошини қуйи солиб борар, чамаси 
бояги болани ҳам, ҳозир уйга бориб дадамдан сўкиш эшитишни ҳам ўйлар, ўйлаб ўйига 
етолмас эди. Яна ўша кабобпаз, ошпаз олдидан ўтдик. Кабоб иси сўлагимни оқизса ҳам 
индамадим. Биламан, энди ойим кабоб обермайди. 
Бозор дарвозасига етганда онам тўсатдан тўхтаб қолди. 
— Вой шўрим! — деди ранги ўчиб. 

---

Дунёнинг ишлари (қисса). Ўткир Ҳошимов