Microsoft Word kr dunyoning ishlari ziyouz com doc

www.ziyouz.com кутубхонаси 
54
ичишди. 
...Ўшандан кейин биронта байрам шунчалик эсимда қолгани йўқ. 
БОЗОР 
Акаларинг бўлиши ҳам яхши, ҳам ёмон. Яхшилиги шуки, болалардан калтак емайсан. 
Арифметикадан икки олмайсан. Ёмонлиги шуки, нуқул акаларингнинг кийимини киясан. 
Масалан, мана бундай. Катта акамга этик оберишади. Бир йилми, икки йилми ўтгандан кейин 
катта акамнинг оёғи катта бўлиб кетади. Этик кичкина акамга ўтади. Кичкина акамнинг оёғиям 
бир жойда туравермайдида. Ўсади, этик сиғмайди. Ана энди этик бизники! Фақат бизга етиб 
келгунча этикнинг таги Наим сартарошнинг иягидек сип-силлиқ бўлиб кетади. Аслида, буям 
ёмонмас. Қишда яхмалак учишга маза. Аммо тагининг кўчиб кетгани ёмон. Чўлда бир ой юриб 
чанқаган туядек сув демаганни ямламай ютади. Бора-бора укамга дабдаласи чиққан этик 
тегади. Телпак масаласи ҳам шундоқ. Катта акамдан кичкина акамга, кичкина акамдан менга, 
мендан укамга етиб боргунча, телпакмас, тақири чиққан бир парча тери қолади. Валига маза! 
Акаси йўқ, укаси йўқ. Зеби хола унга доим янги кийим олиб беради. Шундоқ дейману, дадамга 
ҳам қийин. Ҳаммамизни баравар ясантира олмайди. Тўғри, гоҳи-гоҳида биз кичкиналарнинг 
ҳам ғамини еб туришади. Куз кунларидан бирида шундай қувончли воқеа бўлди. Кечаси ҳамма 
ётганда дадам билан ойим маслаҳатлашиб қолишди. Ростини айтсам, гап пойлайдиган одатим 
бор. Пойламоқчи эмасдиму, ўзлари гаплашиб қолишди. Эшитиш керакми, керак! 
— Салқин тушиб қолди, — деди ойим ўйчан оҳангда. — Болаларнинг эгнида йўқ, бошида йўқ. 
Айниқса кичкиналарга қийин. 
Дадам анчагача индамади. Чамаси, қаердан пул топишни ўйларди. 
— Эчкини сота қоламиз, — деди ниҳоят бир қарорга келиб. 
— Таканими? — Бу ойимнинг овози эди. 
— Э, уни қанчага оларди? — деди дадам ҳафсаласиз оҳангда. — Наригисини сотамиз. Беш 
юзларга обқолар. 
Тушундим. Бундан чиқди Қорақулоқни сотишмоқчи. Эрта баҳорда эчкимиз одатдагидек иккита 
туққан эди: бири эркак, бири урғочи. Урғочисининг ўзи оқ, қулоғи қора. Ака-укалар унга 
Қорақулоқ деб от қўйганмиз. Эчкимга ачиндим. Яхши, ювошгина эди. Чамамда, ойим ҳам шуни 
ўйларди шекилли, секин гап қўшди: 
— Қочириб олсак болаларга сут мўлроқ бўлармиди? 
— Бошқа иложи йўқ-да! — деди дадам тажангроқ бўлиб. — Жилла қурса, биттасига пуфайка 
олиб бериш керак. Бултур ҳам мактабга акасининг чопонини кийиб борди. 
Ҳа, демак, пуфайка меники бўлади. Негаки, укам ҳали мактабга бормайди. Енгининг учига чарм 
қопланганидан оламан. Синфимизда фақат Валида шунақа пуфайка бор. Зеби хола нақд тўрт 
юз сўмга оберган. Валининг ўзи айтган. 
— Бозор куни Тезакопга олиб тушаман, — деди дадам ишонч билан. 
Бироқ дадам жума куни шамоллаб ётиб қолди. Шанба куниям ўрнидан туролмади. Кечқурун 
яна эчки сотишнинг маслаҳати бўлди. 
— Ўзинг бора қол, — деди дадам ётган жойида. 
Онам мунғайиб қолди. 
— Вой, мен бозорни биламанми? — деди бўшашиб. — Бир-икки марта мол сотиб юрган 
бўлмасам... 
Дадамнинг жаҳли чиқиб кетди. 
— Нима, бозорга тушадиганларнинг шох-бутоғи борми? Ҳаммаям сенга ўхшаган одам-да! Жа 
бўлмаса, битта-яримта даллолнинг қўлига ўн сўм берсанг, сотиб беради. Аммо беш юздан 
камига кўнма. Зотли мол, дегин! 
Eртасига тонг қоронғисида ойим мени секин туртиб уйғотди. 
— Қани, тура қол, болам, эчкини ҳайдашиб борасан. 

---

Дунёнинг ишлари (қисса). Ўткир Ҳошимов