Microsoft Word kr dunyoning ishlari ziyouz com doc

www.ziyouz.com кутубхонаси 
56
ипдан тутиб, чўккалаб ўтирар, дам-бадам нос отиб, ўзича аллакимни сўкар эди. Бақувват 
оёқлари узун-узун хўроз эса бўйнини чўзиб, атрофга олазарак қарар, чамаси бошқа хўрозлар 
билан уришишга баҳона қидирарди. Шу пайт айвони катта оқ каламинка шапка кийган, 
чўмичдек бурнининг тешигидан жуни чиқиб турган киши хўрознинг тепасида тўхтади. 
— Чўча чан пул, ака мулло? — деди оёғи билан хўрозга имо қилиб. 
Тажанг киши асабийлик билан бошини кўтарди. Носини тупуриб, кафтининг орқасига лабини 
артди. 
— Шу жўжами! — деди ингичка, тажанг овозда. — Кўзми, пўстакнинг тешигими! 
Бурни чўмичдек харидор пинагини бузмади. 
— Чан пул чўча? — деди яна. 
— Бу жўжамас, хўроз! — Тажанг киши ўрнидан туриб кетди. — Бабах хўроз! Бир тепса одамни 
йиқитади! 
Бурни чўмичдек харидор яна пинагини бузмади. 
— Ҳа, энду чўча-да! Чан пул ўзу? 
Шунда кутилмаган воқеа бўлди. Тажанг киши бабах хўрозни оёғидан юлқиб кўтарди-ю, 
харидорнинг бошига туширди. 
— Мана сенга «чўча!» — деди бақириб. 
Хўрознинг қийқириғи билан харидорнинг додлаши баравар эшитилди. Бошидаги айвони кенг 
шапкаси учиб, тезак устига тушди. Хўрознинг қизил патлари ҳаммаёққа тўзиб кетди. 
Харидор силлиқ бошини чангаллаганча одамлар орасига шўнғиди. Зум ўтмай, шопмўйлов 
милитсионерни бошлаб келди. 
— Мана шу! — деди хўрозни амаллаб бути орасига тиқаётган тажанг кишини кўрсатиб. — 
Бошимга урде! Ҳўкиздек хероз билан урде! Туядек хероз билан урде! Бош ёрилг-о-он! 
— Нима гап, гражданлар? — Шопмўйлов милитсионер чўнтагидан ҳуштак олиб, лунжини 
шиширганча чуриллатди. 
Томошанинг давомини кўришни жуда хоҳлардиму ойим қўймади. 
— Юр, кета қолайлик, — деди секингина. — Бизниям бошимиз балога қолиб юрмасин. 
Одамлар, моллар орасидан ўтиб, нари кетдик. Ана, ниҳоят бизнинг эчкига ҳам харидор 
топилди. Пешонасига қийиқча танғиган киши Қорақулоқни уёғидан ўтиб томоша қилди, 
буёғидан ўтиб томоша қилди. 
— Қанча сўрайсиз? — деди ойимгамас, эчкига қараб. 
— Беш юз сўм. 
— Уч юз! — қийиқча танғиган киши эчкининг бўйнидан силаб қўйди. — Шошиб турибман, 
оламану кетаман. 
— Йўқ, амаки, бу зотли мол, — деди ойим бош чайқаб. — Онаси ҳар йили иккитадан туғади, 
кўп сут беради. Сути ёғли, сигирникига ўхшайди. Беш юздан камига бўлмайди. 
Қийиқча танғиган киши савдолашиб ўтирмай нари кетди. Яна иккита харидор келди. Бири уч 
юз ўн сўмга чиқди, иккинчиси икки юз элликдан ошмади. Кейин эчкимизни ҳеч ким сўрамай 
қўйди. Туриб-туриб зерика бошладим, бир ҳовуч ёнғоғимни у қўлимдан бу қўлимга оламан, бу 
қўлимдан у қўлимга оламан... Кун исиб борар, сув ичгим келарди. Ойим ҳам толиқиб кетди 
шекилли, нуқул атрофга жавдирайди. 
— Даллол топмасак бўлмайди шекилли, ўғлим, — деди руҳи тушиб. 
Худди шуни кутиб тургандек, телпагининг қулоқчинини куя еган, пахтали шимининг 
тиззасигача гўнг бўлиб кетган киши пайдо бўлди. 
— Ҳа, янга, улоқчага харидор чиқмадими? — деди шанғиллаб. 
— Улоқчамас, эчки-ку, — деди ойим ранжиб. — Қаранг, зотли мол, онаси ҳар йили иккитадан 
туғади. Кўп сут беради. Сути қуюқ, сигирникига ўхшайди. 
— Кўриб турибман! — Телпакли киши қўл силтади.— Мушукдеккина эчки экан. Бўғоз бўлганми-
йўқми? 

---

Дунёнинг ишлари (қисса). Ўткир Ҳошимов