Microsoft Word kr dunyoning ishlari ziyouz com doc

www.ziyouz.com кутубхонаси 
64
олмасанг ҳам, — дейди, — олмасанг тугун-терсаги билан уйингга опчиқиб ташлайман, 
кичкиналигингда қулоғини тишлагансан», дейди. Саини қулоғини тишлагандан кўра 
кучугимнинг қулоғини тишлайман. Саида ёмон: ўғил боладан баттар. Ланка тепаётганда бир 
уриб Тойнинг бурнини қонатган. 
Сепкилли хола тўнкарилган пақир устида ўтириб нуқул ҳасрат қилар эди: 
— Кечаси билан тишим ўлгур шундоқ оғриди, шундоқ оғриди, жонимни қўйишга жой 
тополмадим.— У сепкил босган лунжини силаб қўйди. 
— Исириқ дамлаб чайқамадингизми? — деб маслаҳат берди ойим ҳамон энгашиб кирни 
ғижимлар экан. 
— Э, ҳаммасини қилдим! — Сепкилли хола яна инқиллади. — Аччиқтошгаям ғарғара қилдим. 
Қани босилса. 
Икковлари бир зум жимиб қолишди. 
— Уфф! Исиб кетдим! — Ойим кўпикли қўлини сидириб, ёқаси бўғиқ тўркўйлагини ечди-да, 
чеккага ташлади. 
— Ўлмаган қул, баҳоргаям чиқдик, — Сепкилли хола хўрсинди. — Шу йил кузда Ҳакимимнинг 
бошини иккита қилиб қўйсак дегандик. Тўй қилиш осонми? Ҳали униси етмайди, ҳали буниси... 
Отасининг аҳволи бу бўлса... 
Сепкилли хола эридан кўп шикоят қиларди. Чиндан ҳам Исроил мўйлов кўп ичади. Ишининг 
тайини йўқ. Бунинг устига ичиб олдими, тамом, уй ичини тириқтириб қувади. Сепкилли хола 
кўпинча Саидани диконглатиб бизникига қочиб чиқади. Ярим кечада, эри ухлаганидан кейин 
секин уйига чиқиб кетади. 
— Ҳакимжон ҳали ёш-ку, — деди ойим ўйчанлик билан. — Бу йил бўлмаса, янаги йилга бўлар 
тўйи... 
— Шундоқ дейсизу қуда томон шоширяпти. — Сепкилли хола яна инқиллади. — Шу ўлгурни 
олдириб ташлаб қутуламан шекилли. Кеча дадасига тиш қўйдирсаммикан, десам, отангни хумга 
кўмиб қўйган тиллаларини олиб келиб қўйдиравер, дейди... Ҳайронман, бисотимдаги битта 
билагузугимни бераман шекилли. Оғзимни ўрадек очиб юрсам уят бўлар. 
...Варрагимни елимлаб бўлиб, энди қамишини тортиб боғлаган эдим, қарс этиб синди. Қамиш 
синса майли-я, қоғозниям йиртиб юборди. Ўзим катта акамга ялиниб-ялиниб аранг олган эдим. 
Тамом, Ҳаммаси тамом бўлди. Аламимдан йиғлаб юборай дедим. Варракни бир тепган эдим, 
ерга ёпишиб қолди. 
— Ҳа? — деди Сепкилли хола. — Нима қилди, куёв бола? 
— Синди. 
— Акангга айт, бошқасини ясаб бера қолсин. 
Ясайди-я, ясайди! Мендан бошқа иши йўқми? Мактабдан бери келмайди-ку. Алам билан 
варракни яна бир тепдим-да, кўчага чиқиб кетдим. Шу кетганча, кун ботганда қайтиб келдим. 
Ҳовлидаги арқонда қатор қилиб илинган шимлар, кўйлаклар... Бир чеккада бизнинг «қушим 
боши» ўйнаганда лойга қоришавериб, унниқиб кетган дўппи ҳам қийшайиб турибди. Ойим 
нимқоронғида бодом тагида тимирскиланиб юрибди. 
— Ўлсин, эчкиям соғилмади, — деди мени кўриб. — Юр, ушлаб тур. 
Eчкимиз ювош бўлгани билан баъзан «жини» тутиб қолар, соғиб бўлгунча типирчилаб, одамни 
безор қиларди. Шунда кичик акамми, менми биронтамиз чўнқайиб унинг орқа оёқларидан 
маҳкам ушлаб туришга мажбур бўлардик. Ҳеч ҳам ёқмайдиган бу машғулот бугун менинг 
зиммамга тушишини билиб, қочиб қолишни мўлжаллаб турган эдим, ойимнинг жаҳли чиқиб 
кетди: 
— Сен қачон одам бўласан, зумраша! Ёшинг тўққизга чиқибди-ю, кўчада шаталоқ отишдан 
бери келмайсан! Ҳеч фойданг тегмасин, хўпми! 
— Тўққиздамас, саккизда, — дедим чийиллаб. 
— Ўчир овозингни! — Ойим бир дағдаға қилган эди, истар-истамас бориб эчкининг оёғидан 

---

Дунёнинг ишлари (қисса). Ўткир Ҳошимов