Microsoft Word kr dunyoning ishlari ziyouz com doc

www.ziyouz.com кутубхонаси 
67
қайтарма қилдирамиз. Қани, бўйнига олмай кўрсин-чи. 
Ойим бошини қуйи солганча туриб қолди. Чамаси иккиланар эди. 
— Энди, — деди чайналиб, — кўздек қўшни бўлсак... 
— Ҳо-о! — аммам ўрнидан туриб кетди. — Бели оғримаганнинг нон ейишини томоша 
қилинглар! Онагинамдан қолган биттаю битта ёдгорлик йўқ бўлиб кетавераркану қўшнингизга 
жонингиз ачиб қолдими? Менинг совунимга кир ювмабсиз ҳали. Ҳақ жойида қарор топмагунча, 
қўймайман. — У менга ўгирилди-да, овозини мулойимлатди. — Мана, бола билан фол очади. 
Нораста бола ростини айтади. Борасанми? 
Ўрнимдан ирғишлаб туриб кетдим. 
— Бораман! Бораман! — дедим бақириб. 
Бўлмаса-чи, аммамникига борсак, трамвайга тушамиз! Маза қилиб узум ейман! 
Чой ичиб бўлгандан кейин, аммам, ойим, отин хола, мен — тўртовлашиб йўлга чиқдик. Беш-
ёғочга етиб борсак, бўлди. У ёғига трамвайга ўтирамизу жиринг-жиринг қилиб кетаверамиз. 
Маза! 
Мазаликка мазаку-я, бироқ Бешёғочга етиб олгунча анча гап бор-да! Дўмбрободга чиқишимиз 
биланоқ ботинкам оёғимни сиқа бошлади. Ечиб, қўлимга олволдим. Ёзнинг тонг палласида 
ялангоёқ тупроқ кечиб юришнинг завқи бошқача бўлади. Ундек майин, салқин тупроқ 
бармоқларингиз орасидан билқ-билқ отилиб чиқади. Кетаверасиз, кетаверасиз, ҳечам 
чарчамайсиз. 
Лайлактепадан ўтиб Қозирободга борганда қайнама булоқдан муздай тиниқ сув ичдик. Кейин 
Чилонзор келди. Йўлнинг шундоққина бўйида оқиш япроғини чанг босган, тиканлари «тиш 
қайраб» турган чакалакзор — чилон жийдалар (шунинг учун бу ерни Чилонзор дейилади). 
Йўлнинг икки четида нок кўп — нашвати нок, тош нок, гулоби нок. Нок ҳали пишмаган. Фақат 
тагидан ўтаётганингизда тупроққа тўкилган барги товонингизга ёпишиб, ғашни келтиради. 
«Сиймонкўприк»дан ўтишнинг ўзи бир томоша. Терак бўйи чуқурликда сув қорайиб оқади. 
Мўраласангиз бошингиз айланади. Ойим кўприк четига боришга қўймайди: сув чақирармиш, 
одам ўзидан-ўзи тушиб кетармиш... Кўприк ўртасидан от аравалар, эшак аравалар қаторлашиб 
ўтади. Бир томондагиси ўтгунча иккинчи томондагиси пойлаб туради. Аравакашлар сўкинган, 
эшаклар ҳанграган, оғзидан тупуги осилган, устига қоп-қоп сомон тоғдек уюлган туялар ҳам 
ўтиб қолади. Шу кўприкдан ўтилса, трамвайнинг ғийқиллагани эшитилиб туради — уёғи 
Бешёғоч. 
... Аммам айтган фолбинни худди Ача холамга ўхшаган лўли бўлса керак, деб ўйлагандим. Йўқ, 
бошқача экан. Трамвайдан тушгандан кейин икки томонидаги деворлардан пишган ўриклар 
мўралаб турган жинкўчалардан ўтдик. Кейин гулсафсарлар ўсиб ётган аллақандай заҳкаш, 
каталакдек ҳовлига кириб қолдик. Ертўла соясида ётган кучукни кўриб, тўхтаб қолдим. Худди 
ўзимнинг гуржи кучугимга ўхшаш кичкина, фақат қора эмас, оппоқ экан. Негадир акилламади 
ҳам. 
Тўрттовлашиб айвонга чиқдик. Оппоқ рўмол ўраган, кенг енгли кўйлак кийган юмшоққина 
кампир кулимсираб қарши олди. Шу хотиннинг фолбин эканига ишонгим келмасди. 
— Айновний, — деди у юзимдан ўпиб. — Мунча ширин бу бола! 
Айвон вассажуфтига тўрқовоқ илинган, тўрқовоқдаги бедана сайрамас, аммо ҳадеб сакрар, 
ҳар сакраганда шолча устига аллақандай дон тўкилар эди. Беданани томоша қилиб 
ўтирарканман, аммам бўлган воқеани тушунтириб берди. 
— Юринглар, — деди кампир ўрнидан туриб. Кейин менинг елкамга қоқди. 
— Сен ҳам юр, ширин бола. 
Ҳаммамиз биргалашиб девори хомсувоқ қилинган, пастак токчаларига баркашлар, аллақандай 
арабча китоблар тахлаб қўйилган нимқоронғи хонага кирдик. Кампир индамай чиқиб кетди. 
Аммам, ойим, отин хола, мен — ҳаммамиз шапарак кўрпачага тизилишиб ўтирдик. Бир маҳал 
кампир бир қўлида каттакон чинни коса, бир қўлида чойшабга ўхшаш оқ мато кўтариб кирди. 

---

Дунёнинг ишлари (қисса). Ўткир Ҳошимов