Microsoft Word kr dunyoning ishlari ziyouz com doc

www.ziyouz.com кутубхонаси 
75
— Ўзидан сўра! — дедим мен ҳам тўнғиллаб. 
Жўрабоши ердан кесак олиб отган эди, ит ангиллаб қочди. 
— Нега урасан? 
— Халақит беради! — деди жўрабоши зарда билан.— Юр, бўлмаса кеч қоламиз. 
Той иккаламиз беихтиёр унга эргашдик. Қаторлашиб Дарҳон ариғининг бўйига бордик. Ариқ шу 
ердан бурилиб оқар, нарироқда шох-шаббалар устига тупроқ ташлаб ясалган кўприк бор эди. 
Жўрабоши Той иккаламизни мажнунтоллар қуюқ ўсган қоронғи соҳилга олиб тушди. Негадир 
юрагимни қўрқув босди. 
— Нима қиламиз ўзи? — дедим овозимни баландлатиб. 
— Ўчир! — Жўрабоши керосин ҳиди анқиб турган муштини бурнимга тиради. — Ғинг десанг, 
сувга отвораман. 
Шу пайт узоқдан аллакимнинг қадам товуши эшитилди. 
— Келяпти! — деди жўрабоши пичирлаб. Шоша-пиша қовоқ палласини очди. Керосин ҳиди 
қаердан келаётганини энди билдим: қовоқнинг ичи тўла лампамойга ботирилган латта экан. 
Жўрабоши ёнидан гугурт олиб чаққан эди, лоп этиб олов кўтарилди. У чаққонлик билан 
иккинчи паллани ёпди-да, қовоқни сувга қўйиб юборди. Сув юзасида «оғиз-бурни»дан олов 
чиқараётган «калла» қалқиб-қалқиб сузиб кетди. Жўрабошининг ниятини энди тушундим. 
Бояги қадам товушлари Зеби холаники эканини ҳам энди билдим. Қоронғи бўлса-да, катта-
катта қадам ташлашидан, елкасидаги кетмонидан танидим. Ҳушимни йиғиб олгунимча у тупроқ 
кўприк устига келиб қолди. Сув юзида қалқиб келаётган оловли «калла»ни кўрдию таққа 
тўхтади. 
— Вой, вой ўлмасам! — деди-да, кўприк устига таппа ўтириб қолди. — Бис-бис-бисмилло... — 
деди дудуқланиб. Ҳатто товуши ҳам ингичкалашиб кетгандек бўлди. Кейин гандираклаб 
ўрнидан турди-да, овози борича қичқирди. — Дод, вой-дод! 
Ўрнимдан отилиб турдим. 
— Қўрқманг, хола! — дедим бақириб. Аммо жўрабоши билагимдан маҳкам тутиб, керосин ҳиди 
анқиб турган кафти билан оғзимни тўсди. Кўнглим айниб кетди. 
— Қўйвор, эшак! — дедим бўғилиб. — Барибир айтиб бераман! 
— Айтиб кўр-чи! — Жўрабоши яна муштини дўлайтирди. — Жиғингни эзиб қўяман! 
Боядан бери анграйиб турган Той жаҳл билан қўл силтади-да, индамай нари кетди. 
Eртасига чой устида ойим ваҳимали хабарни дадамга айтиб берди: 
— Зеби опа шўрлик бир ҳолатда ётибди. Ажина кўрдим, дейди. Оғзидан олов сочиб бечорага 
даф қилганмиш. Ё кўзига кўринганми... 
Дадам жеркиб берди: 
— Ажинага бало борми? Битта-яримта худобехабар қўрқитгандир-да. 
— Бечорага шу кўргилик ҳам бор экан, — деди ойим изтироб билан. — Ўзининг ғами 
етмасмиди... 
Ҳаммасига мен айбдордек секин бошимни ичимга тортдиму мум тишлаб ўтиравердим. 
Зеби холанинг нима ғами борлигини бир ҳафтадан кейин тушундим. Ўша куни Ҳожи бувининг 
чорбоғида сумалак бўлди. Қийғос гуллаган ўрик тагига шолча ёзилган, ҳамма топганини олиб 
чиққан, хотинлар бир-бирига гап бермай чувиллашар, биз болалар ҳам сумалак ялашдан 
бенасиб қолмаслик учун атрофда ўралашар эдик. Ўшанда Вали билан янги ўйин топиб 
олгандик. Бақувватроқ симни «Ч» рақамга ўхшатиб буклаймиз-да, эски бочкадан чиққан темир 
ҳалқага тираб ғилдиратамиз. Қанча тез югурсак, ғилдирак шунча қаттиқ жаранглайди. Агар 
овозини пасайтирмоқчи бўлсак, бунинг ҳам йўли бор: ғилдиракни сувга ботириб олсак, овози 
чиқмайди. Маза! 
Бир маҳал Зеби холанинг олдида ўтирган ойим имлаб чақириб қолди. 
— Ўртоғинг билан боргин-да, — деди секин, — адангнинг ҳужрасидаги дуторни обке. 
Иккиланиб қолдим. Дуторга ҳеч ким қўл тегизолмас, дадам уни доим ҳужрасида сақлар, баъзан 

---

Дунёнинг ишлари (қисса). Ўткир Ҳошимов